Уэрэд 104 - ХъыбарыфӀыр. ЩӀэдзапӀэр. Уэрэд ЛъапӀэхэр

104-нэ Уэрэд Тхьэмрэ и цӀыху лъэпкъымрэ

¹ ЩӀыхь хуэфщӀ Зиусхьэным; Абы и цӀэм зыхуэвгъазэ; Абы игъэхъахэр ялъэвгъэӀэс цӀыху лъэпкъ псоми.

² Уэрэд къыхухэвдзэ Абы, щӀыхь уэрэд хужыфӀэ; Ӏуэху щӀагъуэхэу зэфӀихахэм ящывгъэгъуазэ.

³ Абы и цӀэ лъапӀэм фригуфӀэ! Зиусхьэным лъыхъуэхэм ягухэр зэлърещтэ гуфӀэгъуэм.

⁴ Зиусхьэнми Абы и гуащӀэми захуэвгъазэ, Абы гъунэгъу зыхуэфщӀ сыт щыгъуи.

⁵ Фэ, Тхьэм и ӀурыщӀэ Ибрэхьим къытепщӀыкӀахэр, Абы къыхиха Екъуб къытепщӀыкӀахэр –

⁶ и Ӏуэху щӀагъуэхэр фигу ивгъэлъ, и телъыджэхэр, хьэкуму ищӀахэр.

⁷ Ар ди Зиусхьэнщ, ди Тхьэщ. ЩӀыгу псоми хьэкумхэр щещӀэ Абы.

⁸ ЗэгурыӀуэныгъэу и лъэпкъым дищӀар Абы егъэзащӀэ игъащӀэм, щӀэблэ минхэр къызэригъэгугъахэр:

⁹ Ибрэхьим зэгурыӀуэныгъэу дищӀар, Исхьэкъ псалъэ быдэу иритар.

¹⁰ ХабзэкӀэ Зиусхьэным къигъэщыпкъэжащ мыкӀуэдыж зэгурыӀуэныгъэу Абы Екъуб къызэригъэгугъар;

¹¹ «Ханаан щӀыгур фи ӀыхьэфӀу уэ уэстынщ», – жиӀэу.

¹² Я бжыгъэкӀэ ахэр мащӀэу, мащӀэ дыдэу, хэхэс цӀыхухэу щытащ,

¹³ зы хэкум икӀырти, нэгъуэщӀ хэкум ихьэрт, зы пащтыхьыгъуэм икӀырти, нэгъуэщӀ цӀыху лъэпкъым хыхьэрт.

¹⁴ Ягу зыми хригъэгъэщӀакъым Зиусхьэным; пащтыхьхэми яхуигъэбыдащ:

¹⁵ «ФемыӀусэ Сэ къыхэсхахэм, евмыщӀэ бзаджагъэ си бегъымбархэм».

¹⁶ ЩӀыгум гъаблэ къыщигъэхъури, щхьэмыж псори къыщызэфӀэщӀэм,

¹⁷ абыхэм япэ иту цӀыху игъэкӀуэгъащ: пщылӀ папщӀэу яшэгъа Исуф.

¹⁸ Абы и лъакъуэхэр ӀэхъулъэхъукӀэ япхри, и пщэми гъущӀ пщэхъу иралъхьащ;

¹⁹ Тхьэм и псалъэр къэщыпкъэжыху, Зиусхьэным и псалъэм ар игъэунэхуащ.

²⁰ Пащтыхьым игъакӀуэри, цӀыху лъэпкъхэр зи Ӏэ илъым ар иригъэутӀыпщыжащ.

²¹ Езым и унэ абы и Ӏэ ирилъхьащ, пашэ яхуищӀащ и мылъку псоми,

²² езым игу къызэрыжиӀэу, ипщхэр игъэсэну, и нэхъыжьхэм акъыл яхилъхьэну.

²³ Мысырым кӀуащ Екъуб абы щыгъуэ, хамэ щӀыгум итӀысхьащ.

²⁴ Тхьэм Езым и цӀыху лъэпкъыр лъэщ дыдэу игъэбэгъуащ, и бийхэм нэхърэ нэхъ гуащӀэшхуэ яхэлъ ищӀащ.

²⁵ Езым къыхиха лъэпкъыр ялъэгъу мыхъуу, Езым хуэӀурыщӀэхэм пцӀыкӀэ дызекӀуэу ищӀащ Абы.

²⁶ ИгъэкӀуащ Мысырым Езым и ӀурыщӀэ Мусэ, Езым къыхиха Хьэрун.

²⁷ Нэщэнэ гъэщӀэгъуэныщэхэр яригъэгъэлъэгъуащ, хамэ щӀыгум телъыджэхэр щаригъэщӀащ.

²⁸ КӀыфӀыр яхуигъакӀуэри, хэкур игъэункӀыфӀащ, Абы и псалъэм къыпэувыжащ ахэр.

²⁹ Лъы ищӀщ я псыхэри, я бдзэжьейхэр игъэлӀащ Абы.

³⁰ Абыхэм я щӀыгум хьэндыркъуакъуэхэр из ищӀащ, я пащтыхь сэрейхэми щигъэбэгъуащ ахэр.

³¹ Абы жиӀати, гъудэбадзэмрэ бадзапцӀэхэмрэ я хэкум бэ дыдэ щыхъуащ.

³² Уэшхым и пӀэкӀэ уэфыр, узылыбжьэ мафӀэри я щӀыгум къигъэкӀуащ,

³³ я санащхьи я ахъуо жыги иутащ, къинэмыщӀ жыгхэри я щӀыгум щрищӀыкӀащ.

³⁴ ЖиӀати, мацӀи хьэпщхупщи бжыгъэ ямыӀэу къэкӀуащ;

³⁵ я щӀыгу тет уцыр зэкӀэ ящхащ абыхэм, я губгъуэхэм ярыт лэжьыгъэри лъэрыщӀыкӀ ящӀащ.

³⁶ Абыхэм ящыпэлъху псори, гуащӀэу яхэлъари я щӀыгум тригъэкӀуэдыкӀащ.

³⁷ Дыжьыни дыщи яӀыгъыу, израил цӀыхухэр къришыжащ, лъэрымыхьи яхэтакъым абыхэм.

³⁸ Ахэр къыщикӀыжым, мысыр цӀыхухэр гуфӀащ; сыту жыпӀэмэ абыхэм я шынагъуэ мысыр цӀыхухэм къалъэӀэсат.

³⁹ Пшэр тепхъуэну абыхэм къахуиубгъуащ, мафӀэри – жэщыр къахуигъэнэхуну.

⁴⁰ ЩӀэлъэӀуати, ныбгъухэр къаритащ, уафэм къахуригъэха ерыскъыкӀэ игъэшхащ.

⁴¹ Мывэр зэгуигъэкӀри, псы къыщӀигъэжащ, къум гъущэм псыуэ щежэхащ,

⁴² сыту жыпӀэмэ Абы игу ихуатэкъым и псалъэ лъапӀэу Езым и ӀурыщӀэ Ибрэхьим иритыгъар.

⁴³ И цӀыху лъэпкъыр, къыхихахэр, гуфӀэгъуэм хэту, уэрэд жаӀэурэ, къришыжащ.

⁴⁴ Къаритащ хамэ лъэпкъхэм я щӀыгухэр, нэгъуэщӀ лъэпкъхэм я гъавэми къаӀуигъэщӀащ,

⁴⁵ Абы щапхъэу къахуигъэувахэр ягъэзэщӀэн, игъэува хабзэхэри ящымыгъупщэн папщӀэ. ЩӀыхь хуэфщӀ Зиусхьэным!