Уэрэд 103 - ХъыбарыфӀыр. ЩӀэдзапӀэр. Уэрэд ЛъапӀэхэр

103-нэ Уэрэд Дунейр къэзыгъэщӀам и щӀыхь

¹ ЩӀыхь хуэщӀ, сигу, Зиусхьэным! Зиусхьэну си Тхьэ, Уэ гъэщӀэгъуэн дыдэу уинщ! Лъытэныгъэшхуэри щӀыхьри уи фащэщ.

² Уэ нэхунэр зыщыботӀагъэ фащэу, пшэхэр уиӀэщ шэтыру;

³ псы щӀыӀум уи псэупӀэ щыбогъэув, пшэхэр уи хьэрыгъажэщ, жьыбгъэ дамэхэмкӀэ къыбокӀухь Уэ.

⁴ Жьыбгъэхэр къэбгъэщӀащ макъгъэӀуу, Уи Ӏуэхузехьэу – мафӀэ зэщӀэблэхэр.

⁵ Лъабжьэ быдэхэм тебгъэуващ Уэ щӀыгур; кӀэзызынкъым ар игъащӀэкӀэ.

⁶ Хышхуэр фащэу тепхъуащ, бгыхэм псыхэр ятепхъуащ.

⁷ Уащыхуэгубжьым, абыхэм щӀатхъужащ, уи щыблэ макъым псынщӀэу ӀуигъэкӀыжащ;

⁸ ЩӀыпӀэу Уэ яхуэбгъэнэхуам – бгыхэм докӀ, кӀейхэм ирокӀуэ псыхэр.

⁹ ЗэпаупщӀын зыхуимыт гъунапкъэр Уэ яхуэбгъэнэхуащ, ЩӀыгур зэщӀабгъэну абыхэм къебгъэгъэзэжынкъым.

¹⁰ КӀейхэм ядэбгъэхьащ псынэхэр: бгы зэхуакухэм щожэх псыхэр,

¹¹ ираф губгъуэм ис хьэкӀэкхъуэкӀэхэм, шыд Ӏэлхэми ирагъэкӀ я псыхуэлӀэр.

¹² Псыхэм япэблагъэу мэпсэу уэгу бзухэр, я уэрэд макъ къыхоӀукӀ къудамэхэм.

¹³ Уи лъагапӀэм ущыӀэу бгыхэр уогъэнщӀ, Уэ уи ӀэщӀагъэхэм я фӀыгъэкӀэ щӀым зегъэнщӀ.

¹⁴ Былымым папщӀэ удзыр уогъэкӀ Уэ, щхъуантӀагъэри – цӀыхум къащхьэпэну, шхыныр щӀыгум къыхихын папщӀэ,

¹⁵ санэу цӀыхум и гур зыгъэжаныр, дагъэу абы и нэгу зыгъэлыдыр, игу быдэ зыщӀ щӀакхъуэр.

¹⁶ ЗагъэнщӀ Зиусхьэным и жыгхэм, Ливаным щыкӀ ашэхэм.

¹⁷ Бзухэм абгъуэ щащӀ абыхэм, псейр и псэупӀэщ псыхэуэм.

¹⁸ Бгы лъагэхэр мэз бжэнхэм ейщ; тхьэкӀумэкӀыхь хъумапӀэщ абрэмывэхэр.

¹⁹ Зэманхэр къигъэнэхуэну мазэр Уэ къэбгъэщӀащ; дыгъэр щыкъухьэнум щыгъуазэщ.

²⁰ Уэ кӀыфӀыр уодзри, жэщ мэхъу. А зэмыным къожьэ хьэкӀэкхъуэкӀэхэр.

²¹ Къуентхъ щхьэкӀэ аслъэнхэр мэгурым, Тхьэм зыхуагъазэ абыхэм яшхын папщӀэ.

²² Дыгъэр къыкъуокӀри, абыхэм ягъэзэж; я гъуэхэм йокӀуэж.

²³ И Ӏуэху, и ӀуэхущӀэн пщыхьэщхьэ нэс пылъыну цӀыхур къыдокӀ.

²⁴ Сыту бэ хъурэ уи ӀэщӀагъэхэр, Зиусхьэн! АкъылыфӀагъэ хэлъу псори бгъэпсащ; псэ зэптахэр щӀыгум тезщ.

²⁵ Мы хыр ин дыдэщ, гъунэншэщ, пхуэлъытэнукъым псэ зыпыту абы хэсхэр – псэущхьэ инхэмрэ цӀыкӀухэмрэ зэгъусэу.

²⁶ Кхъухьхэр тетщ абы, хы псэущхьэу Левиатанщ, хым щыджэгуну Уэ къэбгъэщӀари хэсщ.

²⁷ Ахэр псори Уэ къожьэ, шхын и чэзум ептыну.

²⁸ Иботри, пӀах; уи Ӏэ пшиймэ, загъэнщӀ абыхэм фӀыкӀэ;

²⁹ уи нэгу щӀыбоуфэри мэшынэ; я псэ хэпхмэ малӀэ, къызыхэкӀа щӀым хохьэж.

³⁰ Уэ псэ иботри, къогъэхъуж, апхуэдэу щӀыгум тет псори уогъэкӀыж.

³¹ ИгъащӀэкӀэ щреӀэ щӀыхьыр Зиусхьэным деж; Зиусхьэным Ӏуэхуу ищӀам щрегуфӀыкӀ.

³² ЩӀыгум къоплъри – ар мэкӀэзыз; бгыхэм ятеӀэбэмэ, Ӏугъуэм зыкъыщеӀэт абыхэм.

³³ Сыпсэуху, уэрэд хужысӀэнщ Зиусхьэным, уэрэд хужысӀэнщ си Тхьэм, сыпсэуху.

³⁴ Си гупсысэхэр игу ирырехь, сыту жыпӀэмэ сызыгъэгуфӀэр Зиусхьэныр арщ.

³⁵ ГуэныхьыщӀэхэр щӀым трекӀуэдыкӀ, цӀыху бзаджэхэри афӀэкӀ щремыӀэж. Зиусхьэным щӀыхь хуэщӀ, сигу, Зиусхьэным щӀыхьыр ейщ.