Уэрэд 100 - ХъыбарыфӀыр. ЩӀэдзапӀэр. Уэрэд ЛъапӀэхэр

100-нэ Уэрэд Пащтыхьым Тхьэр зэригъэгугъар

Даут и уэрэд

¹ Уэрэд яхужысӀэнщ Тхьэм хуэщыпкъагъэмрэ цӀыхухэм яхуэзахуагъэмрэ; Уэр папщӀэ, Зиусхьэн, уэрэд жысӀэнщ сэ.

² Сызэрагъэкъуншэн зыри щымыӀэн папщӀэ, си нэӀэ тезгъэтынщ си гъуэгу: «Сыт щыгъуэ укъэкӀуэну Уэ си деж?» Сигу зэрыкъабзэу, си унэ сыщыпсэунщ.

³ ЕмыкӀу къызыпыкӀын Ӏуэху си пащхьэ къизгъэхуэнкъым: Тхьэм хуэмыщыпкъэхэм я Ӏуэху схуэлъагъуркъым; зыщыздзеинщ абыхэм я Ӏуэху.

⁴ Гу къуаншэм зыщыздзеинщ сэ; Ӏуэху бзаджэ зыхэзгъэхуэнкъым.

⁵ И гъунэгъур щэхуу зыубыр сэ зыбгъэдэсхунщ; и нэплъэгъукӀэ пагэу, игукӀэ зыкъызыфӀэщӀыжыр схуэшэчынкъым.

⁶ Тхьэм хуэщыпкъэу щӀыгум тетхэм нэфӀкӀэ сеплъынщ, дапщэщи къысщӀыгъуну; къуаншагъэ зимыӀэу и гъуэгу ирикӀуэр къысхуэлэжьэнщ.

⁷ Хьилагъэ хэлъу зекӀуэр си унэ щыпсэункъым; пцӀы зыупс дэтхэнэми си пащхьэ зыщигъэщыпкъэжын лъэкӀынкъым.

⁸ Бзаджэу щӀыгум тет псори лъапсэкӀуэд сщӀынщ пщэдджыжьым жьыуэ. БзаджащӀэхэр псори Зиусхьэным и къалэм дэзгъэкӀуэдыкӀынщ.