Маттэ 24 - ХъыбарыфӀыр. ЩӀэдзапӀэр. Уэрэд ЛъапӀэхэр

24-НЭ ЕДЗЫГЪУЭ Тхьэм и унэшхуэр зэрызэтекъутэнур Хьисэ къызэрыжиӀар

¹ Хьисэ Тхьэм и унэшхуэм къыщӀэкӀыжри, ежьэж щыхъум, Тхьэм и унэшхуэм хэт унэхэр ирагъэлъагъуну Хьисэ и гъуэгу ирикӀуэхэр щхьэхуэу къыбгъэдыхьащ.

² – Мы псори флагъурэ? – яжриӀащ Хьисэ абыхэм. – Пэжыр нывжызоӀэ, мывитӀ къызэтемынэжу, псори зэтекъутэнущ.

Гугъуехь куэдым я къежьапӀэр

³ Хьисэ Елеон Ӏуащхьэм тесу, и гъуэгу ирикӀуэхэр я закъуэ къыбгъэдыхьэри къеупщӀащ абы щыгъуэ: – КъыджеӀэт, а жыхуэпӀа Ӏуэхухэр сыт щыгъуэ къыщыхъунур, икӀи уэ дунейм укъызэрыкӀуэжынумрэ мы дунейм и кӀэухыр къызэрыкӀуэнумрэ я нэщэнэхэр сыт?

⁴ – Зыми фыкъызэримыгъэпцӀэным фыхуэсакъ! – яжриӀащ Хьисэ.

⁵ – Си цӀэр зыфӀащурэ, «Мэссихьыр сэращ» жаӀэу, цӀыху куэд къэкӀуэнущ, цӀыху куэди къагъэпцӀэнущ.

⁶ Гъунэгъууи жыжьэуи зауэ хъыбар щызэхэфхынущ, ауэ фыщӀэшынэн щыӀэкъым. А Ӏуэхухэр къэхъун хуейщ, ауэ дунейм и кӀэухыр иджыри къэсауэ аркъым.

⁷ Зы лъэпкъыр адрей лъэпкъым, зы къэралри адрей къэралым езэуэну къызэщӀэтэджэнущ. Гъабли къэхъунущ, щӀыр щӀыпӀэ-щӀыпӀэхэмкӀи хуабжьу щыхъеинущ.

⁸ А Ӏуэху псори гугъуехь куэд шэчыным я къежьапӀэ къудейщ.

⁹ – ЦӀыхухэм фэ гугъуехь фагъэшэчын щхьэкӀэ, тепщэныгъэ зиӀэхэм фырагъэубыдынурэ фрагъэукӀынущ икӀи сэ си цӀэр зэрывгъэлъапӀэм щхьэкӀэ лъэпкъ псори жагъуэгъу къыфхуэхъунущ.

¹⁰ ЦӀыху куэд фӀэщхъуныгъэм и гъуэгум текӀынущ абы щыгъуэ; зым адрейр тепщэныгъэ зиӀэхэм яригъэубыдынущ, зым адрейр илъагъу мыхъу хъунущ.

¹¹ Бегъымбар нэпцӀ куэд къежьэнущ, цӀыху куэди къагъэпцӀэнущ.

¹² Бзаджагъэм къызэрыхэхъуэм къыхэкӀкӀэ, цӀыху куэдым я фӀылъагъуныгъэр упщӀыӀунущ.

¹³ Ауэ икӀэм нэсыху теубыдэныгъэ зиӀэр Тхьэм мыкӀуэду къригъэлынущ.

¹⁴ Тхьэм и Тепщэныгъэшхуэм теухуа хъыбарыфӀым щӀылъэ псом тет цӀыхухэр ирагъэдэӀуэн хуейуэ щытщ, цӀыху лъэпкъ псоми я пащхьэм щыхьэт щыхъун щхьэкӀэ. Дунейм и кӀэухыр къэсынущ абы и ужькӀэ.

Гузэвэгъуэшхуэр

¹⁵ – Аращи, Даниил бегъымбарыр зытепсэлъыхьа «Зэхэзыкъутэ ГущыкӀыгъуэур» щӀыпӀэ лъапӀэм иту щыфлъагъукӀэ (еджэм ар къыгурыреӀуэ),

¹⁶ Иудей хэкум ис цӀыхухэр Ӏуащхьэхэм ирекӀуэлӀэж.

¹⁷ Унащхьэм тетыр къехыжмэ, зыгуэр здищтэн щхьэкӀэ, унэм щӀремыхьэж.

¹⁸ Губгъуэм итми, и щыгъын щӀыӀутелъыр здищтэн щхьэкӀэ, къремыгъэзэж.

¹⁹ ЦӀыхубз лъэщыджэхэмрэ сабий быдзафэ зиӀэхэмрэ гъуэгу мыгъуэ теувэнущ а махуэхэм.

²⁰ Фыщежэжьэнур щӀымахуэм е щэбэт махуэм темыхуэн щхьэкӀэ, Тхьэм фелъэӀу;

²¹ а махуэхэм гузэвэгъуэшхуэ къэхъунущи. Дунейр къыщыхъуам къыщыщӀэдзауэ иджыри къэсыху щыӀакъым дяпэкӀи щыӀэнукъым апхуэдэ гузэвэгъуэшхуэ.

²² А махуэхэр нэхъ мащӀэ мыхъуатэмэ, зы цӀыхуи мыкӀуэду къелынутэкъым. Езым къыхиха цӀыхухэм я хьэтыркӀэ Тхьэм а махуэхэр нэхъ мащӀэ ищӀынущ.

²³ А махуэхэм «Мис, Мэссихь мыбы щыӀэщ», жиӀэу, е «Мэссихь модэ щыӀэщ», жиӀэу зыгуэрым къывжиӀэмэ, фи фӀэщ фымыщӀ;

²⁴ Мэссихь нэпцӀхэмрэ бегъымбар нэпцӀхэмрэ къежьэнущи. Абыхэм нэщэнэ гъэщӀэгъуэнхэри Ӏуэху телъыджэхэри къагъэлъагъунущ, Тхьэм къыхиха цӀыхухэри ягъэпцӀэн мурадкӀэ, ялъэкӀмэ.

²⁵ Мис, а Ӏуэхухэр къэхъун и пэкӀэ абыхэм я хъыбар нывжесӀащ.

²⁶ – Аращи, «Мис, Мэссихь губгъуэ нэщӀым щыӀэщ», къыщывжаӀэкӀэ, абы фымыкӀуэ «Мис, Мэссихь пэшым щӀэтщ», къыщывжаӀэкӀи фи фӀэщ фымыщӀ;

²⁷ къуэкӀыпӀэмкӀэ къыщыхъуэпскӀ уафэхъуэпскӀым къухьэпӀэм нэсыху дунейр зэригъэнэхум хуэдэу, ЦӀыху Лъэпкъым и Къуэр къыщыкӀуэжыну махуэри хъунущи.

²⁸ ФщӀэркъэ хьеуан псэхэлӀэр здэщыӀэм бгъэжьхэри зэрыщызэхуэсынур.

ЦӀыху Лъэпкъым и Къуэм дунейм къызэригъэзэжынур

²⁹ – А гузэвэгъуэшхуэ махуэхэм я ужь дыгъэр напӀэзыпӀэм ункӀыфӀынущ, мазэри къэунэхужынукъым. Вагъуэхэри уафэм къехуэхынущ, уафэм щыӀэ къарухэри къызэщӀэхъеенущ.

³⁰ ЦӀыху Лъэпкъым и Къуэм и нэщэнэ уафэм къыщылъэгъуэнущ икӀи дунейм тет лъэпкъ псори гъыурэ я бгъэм еуэжынущ абы щыгъуэ. ЦӀыху Лъэпкъым и Къуэр, пшэхэм хэтрэ лъэкӀыныгъэшхуэрэ щӀыхьышхуэрэ иӀэу, къакӀуэу цӀыхухэм ялъагъунущ.

³¹ Бжьамиишхуэм и макъ жаныр къэӀунущ итӀанэ икӀи ЦӀыху Лъэпкъым и Къуэм и мелыӀычхэр иригъэжьэнущ икӀи абыхэм дуней лъэныкъуиплӀкӀи, зы уафэ гъунэм щыщӀэдзауэ адрей уафэ гъунэм нэсыху, езым къыхиха цӀыхухэр къыхашурэ, абы къыхузэхуашэсынущ.

Ахъуо жыгым щыпкъагъэу къыдгуригъаӀуэр

³² – Ахъуо жыгым къыщыщӀымкӀэ зыгурывгъаӀуэ: абы и къудамэхэм псы къыщӀыхьэу, и пщӀащэхэр къыпыкӀэ щыхъукӀэ, гъэмахуэр къызэрыблэгъар къывощӀэ.

³³ Фэри, мы Ӏуэху псори щыфлъагъукӀэ, ЦӀыху Лъэпкъым и Къуэр гъунэгъуу, куэбжэм деж зэрыщытыр зэвгъащӀэ.

³⁴ Пэжыр нывжызоӀэ, мы лъэпкъыр мыкӀуэдыж щӀыкӀэ, мы Ӏуэху псори къэхъунущ.

³⁵ Уафэмрэ щӀылъэмрэ кӀуэдыжынущ, ауэ си псалъэхэр кӀуэдыжынукъым.

А махуэмрэ а сыхьэтымрэ къыщысынур зыми ищӀэркъым

³⁶ – А махуэр е а сыхьэтыр къыщысынур зыми ищӀэркъым. Уафэхэм щыӀэ мелыӀычхэми ящӀэркъым, Тхьэм и Къуэми ищӀэркъым. Адэ лъапӀэм и закъуэщ ар зыщӀэр.

³⁷ Нухь бегъымбарым и махуэхэм Ӏуэхухэр зэрыщытам хуэдэу, ЦӀыху Лъэпкъым и Къуэр дунейм къыщыкӀуэжынум дежи Ӏуэхухэр абы тетынущ.

³⁸ Псыдзэр къащӀэмыуауэ, а махуэхэм цӀыхухэр шхэрт икӀи ефэрт, къашэрт икӀи дэкӀуэрт. Абы тетащ Нухь кхъухьым щитӀысхьа махуэр нэсыху.

³⁹ Къэхъунур ямыщӀэурэ, псыдзэр къащӀэуэри, ахэр псори ихьащ икӀи итхьэлащ. ЦӀыху Лъэпкъым и Къуэр дунейм къыщыкӀуэжынум дежи апхуэдэущ Ӏуэхухэр зэрыщытынур.

⁴⁰ ЦӀыхуитӀ губгъуэм итынущ абы щыгъуэ, зыр мелыӀычхэм уафэм яхьынущ, адрейр къагъэнэнущ.

⁴¹ ЦӀыхубзитӀ зы щхьэлым щыхьэжэнущ, зыр мелыӀычхэм уафэм яхьынущ, адрейр къагъэнэнущ.

⁴² – Аращи, фымыжейуэ фысакъ, Зиусхьэныр дунейм къыщыкӀуэжыну махуэр фщӀэркъыми.

⁴³ Ауэ мыр зэвгъащӀэ: Унэр зейм дыгъуакӀуэр къыщыкӀуэну сыхьэтыр ищӀэу щытатэмэ, жеинтэкъым икӀи и унэм щӀигъыхьэу щӀэлъыр иригъэдыгъунтэкъым.

⁴⁴ Абы къыхэкӀкӀэ, фэри фыхьэзырын хуейщ, ЦӀыху Лъэпкъым и Къуэр фыщымыгугъэ сыхьэт гуэрым дунейм къэкӀуэжынущи.

Узыщыгугъ хъун унэӀут е узыщыгугъ мыхъун унэӀут

⁴⁵ – Хэт атӀэ, зэхэщӀыкӀ иӀэрэ, зыщыгугъ хъун унэӀуту тепщэм езым и унэӀутхэм унафэщӀ яхуищӀар, шхын ичэзум къаритын щхьэкӀэ?

⁴⁶ А унэӀутыр гъуэгу махуэ теуващ, тепщэр къэкӀуэжрэ апхуэдэу ищӀэу кърихьэлӀэжмэ.

⁴⁷ Пэжыр нывжызоӀэ, тепщэм и мылъку псори а унэӀутым и ӀэмыщӀэ ирилъхьэнущ.

⁴⁸ Ауэ а унэӀутым бзаджагъэкӀэ игукӀэ «Си тепщэр къэгувэнущ» жиӀэу

⁴⁹ адрей унэӀутхэм яхэуэу икӀи ефакӀуэхэм ядефэу-ядешхэу щиублэкӀэ,

⁵⁰ а унэӀутым тепщэр къэкӀуэжыну щимыгугъэ махуэм икӀи щыпэмыплъэ сыхьэтым ар къэсынущ.

⁵¹ А унэӀутыр хьэлэчу иубэрэжьынущ тепщэм икӀи бзитӀщхьитӀхэм гугъуехь щадишэчыну щӀыпӀэм игъэкӀуэнущ. Абы гъы макърэ дзэ зэрыгъэшх макърэ къыщыӀунущ.