Марк 11 - ХъыбарыфӀыр. ЩӀэдзапӀэр. Уэрэд ЛъапӀэхэр

11-НЭ ЕДЗЫГЪУЭ ЩӀыхьышхуэ иӀэу, Хьисэ Ерусалим зэрыдыхьар

¹ Хьисэрэ и гъуэгу ирикӀуэхэмрэ Ерусалим пэгъунэгъу хъуащ. Елеон Ӏуащхьэм и лъапэм тес жылэхэу Виффагиерэ Вифаниерэ щынэсым, Хьисэ и гъуэгу ирикӀуэхэм ящыщу цӀыхуитӀ япэ иригъэщащ,

² мыпхуэдэу яжриӀэри: – Фяпэ ит жылэм фыдыхьэ. Фызэрыдыхьэу, цӀыху зэи зытемытӀысхьа шыд шыщӀэ епхауэ фрихьэлӀэнущ. Ар къыкӀэрыфтӀэтыкӀи, къафшэ.

³ «Сыт фщӀэр?» жиӀэу зыгуэрым къывжиӀэмэ, «Зиусхьэныр абы хуейщ», жефӀи, ар къэфшэну хуит фищӀынущ асыхьэту.

⁴ Ахэр кӀуэри, куэбжэм епхауэ, шыд шыщӀэ уэрамым щрихьэлӀэри, къыкӀэратӀэтыкӀащ.

⁵ Абдежым щытхэм ящыщ гуэрхэм жаӀащ: – Сыт шыд шыщӀэр къыщӀыкӀэрыфтӀэтыкӀыр?

⁶ Хьисэ зэрыжиӀам тету жэуап щратыжым, шыд шыщӀэр къашэну хуит ящӀащ.

⁷ Шыд шыщӀэр Хьисэ деж къашэри, я щыгъынхэр тралъхьащ. Хьисэ шыд шыщӀэм шэсащ.

⁸ ЦӀыху куэдым я щыгъынхэр Хьисэ гъуэгум хутраубгъуэрт, хадэхэм ит жыгхэм къудамэхэр къыпаупщӀурэ гъуэгум хутралъхьэрт нэгъуэщӀхэми.

⁹ Хьисэ и пэ иту кӀуэхэми, и ужь иту кӀуэхэми макъышхуэкӀэ жаӀащ: Хьусаннэ! Зиусхьэным и цӀэкӀэ къакӀуэм щӀыхьышхуэр ейщ!

¹⁰ Ди адэшхуэу Даут и тепщэныгъэу къакӀуэм щӀыхьышхуэр ейщ! Хьусаннэ! Тхьэу Лъагэм щӀыхьышхуэр ейщ!

¹¹ Хьисэ Ерусалим дыхьэри, Тхьэм и унэшхуэм щӀыхьащ итӀанэ. Псори къызэпиплъыхьа нэужь, махуэр хэкӀуэтати, къалэм дэкӀри, и гъуэгу ирикӀуэ цӀыху пщыкӀутӀыр и гъусэу, Вифание жылэм кӀуащ.

Хьисэ ахъуо жыгым зэребгар

¹² ЕтӀуанэ махуэм ахэр Вифанием щыдэкӀыжым, Хьисэ къэмэжэлӀащ.

¹³ ПщӀащэ зыпыт зы ахъуо жыг жыжьэу щилъагъум, пшхы хъун къыпыкӀамэ еплъыну кӀуащ. Жыгым щынэсым, тхьэмпэ фӀэкӀ зыри пигъуэтакъым, ахъуом и хъугъуэтэкъыми.

¹⁴ Апхуэдэу щыхъум, Хьисэ жыгым жриӀащ: – Нобэ щыщӀэдзауэ уэ къыппыкӀауэ зыри зыми игъащӀэкӀэ иремышх. И гъуэгу ирикӀуэхэм ар зэхахащ.

Хьисэ сатуущӀэхэр Тхьэм и унэшхуэм къызэрыщӀихуар

¹⁵ Ерусалим нэсащ. Хьисэ Тхьэм и унэшхуэм щӀыхьэри, сатуущӀэхэри щэхуакӀуэхэри къыщӀихуу щӀидзащ. Ахъшэ зыхъуэжхэм я Ӏэнэхэмрэ тхьэрыкъуэ зыщэхэм я шэнтхэмрэ щхьэпридзащ.

¹⁶ Тхьэм и унэшхуэм хьэпшып гуэри зыми щызэрихьэну идакъым Хьисэ.

¹⁷ ЦӀыхухэм Ӏуэхугъуэхэр яригъащӀэурэ, мыпхуэдэу яжриӀащ: – Тхьэм къызэрыжиӀэр и псалъэ тхахэм хэткъэ: «Сэ си унэр лъэпкъ псоми тхьэлъэӀупӀэ яхуэхъунущ»? Ауэ фэ ар «хъунщӀакӀуэ тӀысыпӀэм» ещхь фщӀащ.

¹⁸ Дин пашэшхуэхэмрэ торэт егъэджакӀуэ пашэхэмрэ Хьисэ жиӀар щызэхахым, ар зэрагъэкӀуэдыну щӀыкӀэм егупсысу щӀадзащ; сыт щхьэкӀэ жыпӀэмэ Хьисэ яригъащӀэу щыта Ӏуэхухэр цӀыху куэдым яфӀэтелъыджэти, дин пашэшхуэхэмрэ торэт егъэджакӀуэ пашэхэмрэ Хьисэ щышынэрт.

¹⁹ Пщыхьэщхьэр щыхъум, Хьисэрэ абы и гъуэгу ирикӀуэхэмрэ къалэм дэкӀыжащ.

Ахъуо жыг гъуар

²⁰ Пщэдджыжьым ахъуо жыгым къыщыблэкӀыжым, и лъабжьэм нэсу ар зэрыгъуар ялъэгъуащ.

²¹ Хьисэ и псалъэр игу къэкӀыжри, Петр абы къыжриӀащ: – Равви, еплъ, узэбга ахъуо жыгыр гъуащ.

²² – ТхьэмкӀэ фӀэщхъуныгъэ фи гум ивгъэлъ, – яжриӀащ Хьисэ абыхэм.

²³ Пэжыр нывжызоӀэ, зыгуэрым и гум шэч къримыгъыхьэу, жиӀэр къэхъункӀэ фӀэщхъуныгъэ иӀэу, мы Ӏуащхьэм «ЗыкъэӀэти, хым зыхэдзэ!» жриӀэмэ, ар къехъулӀэнущ.

²⁴ Абы къыхэкӀкӀэ вжызоӀэ, Тхьэм сыт ищӀыскӀи фыщелъэӀукӀэ, Тхьэм ар къызэрыфхуищӀэнумкӀэ фи гум фӀэщхъуныгъэ ивгъэлъи, къыфхуищӀэнущ.

²⁵ Тхьэм фыщелъэӀукӀэ, фигу зыгуэрым ебгъамэ, хуэвгъэгъу, фи Адэ лъапӀэу уафэм щыӀэм фэ мыхъумыщӀагъэу фщӀар къыфхуигъэгъун щхьэкӀэ.

²⁶ Ауэ фэ абы хуэвмыгъэгъумэ, фи Адэ лъапӀэу уафэм щыӀэм фэри мыхъумыщӀагъэу фщӀар къыфхуигъэгъунукъым.

Хьисэ и тепщэныгъэр къезытамкӀэ журт пашэхэр къызэреупщӀар

²⁷ Хьисэрэ абы и гъуэгу ирикӀуэхэмрэ Ерусалим къэкӀуэжащ. Хьисэ Тхьэм и унэшхуэм здыщӀэтым, дин пашэшхуэхэр, торэт егъэджакӀуэ пашэхэр, нэхъыжьхэр абы къыбгъэдыхьэри,

²⁸ къеупщӀащ: – Мы Ӏуэхухэр блэжьыну хуитыныгъэ дэнэ къыздипхар, хьэмэрэ ахэр блэжьыну тепщэныгъэ хэт уэ къозытар?

²⁹ – Сэри фэ Ӏуэхугъуэ гуэркӀэ сынывэупщӀынущ, – яжриӀащ Хьисэ. – Жэуап къызэфтыжмэ, сэри нывжесӀэнщ мы Ӏуэхухэр злэжьыну хуитыныгъэ къыздисхар.

³⁰ Иуан цӀыхухэр иумэхъын щхьэкӀэ хэт къэзыгъэкӀуар? ЦӀыхухэра, хьэмэрэ Тхьэра? КъызжефӀэт.

³¹ – «Тхьэращ Иуан къэзыгъэкӀуар», жытӀэмэ, «НтӀэ, Иуан жиӀахэр сыт фи фӀэщ щӀэмыхъуар?» жиӀэнущ, – зэчэнджэщыжурэ, жаӀэрт абыхэм.

³² – Хьэмэ «ЦӀыхухэращ Иуан къэзыгъэкӀуар», жетӀэн? – Ахэр цӀыхухэм ящышынэрт; цӀыху псоми Иуан пэжу бегъымбару ялъытэрти.

³³ Арати: – ТщӀэркъым, – къыжраӀащ Хьисэ. – Апхуэдэу щыщыткӀэ, сэри нывжесӀэнукъым мы Ӏуэхухэр злэжьыну хуитыныгъэ къыздисхар, – яжриӀащ Хьисэ абыхэм.