Апостол. 24 - ХъыбарыфӀыр. ЩӀэдзапӀэр. Уэрэд ЛъапӀэхэр

24-НЭ ЕДЗЫГЪУЭ Феликс Ӏэтащхьэм и пащхьэм журтхэр Паул къызэрыщедэуар

¹ Махуитху дэкӀа нэужь, дин пашэшхуэ Ананий, нэхъыжьхэм ящыщ гупрэ уэчыл Тертуллрэ и гъусэу, Кесарие къалэм кӀуащ. Паул зэрагъэкъуаншэхэр Ӏэтащхьэм и пащхьэм къыщаӀуэтащ.

² Паул утыкум къыщрашэм, ар игъэкъуаншэу, Тертулл мыпхуэдэу жиӀэу щӀидзащ: – Уэ, щӀыхьышхуэ зыхуащӀ Феликс, уи фӀыгъэкӀэ мамырыгъэшхуэ диӀэу допсэу; уи нэӀэр тебгъэтурэ, мы къэралыр нэхъ зэкӀэлъыкӀуэ хъуащ.

³ Аращи, сыт щыгъуи, дэнэ дыщыӀэми, фӀыщӀэ пхудощӀ.

⁴ Уезгъэзэшыщэну сигу илъкъыми, уи гуапэу укъыдэдэӀуэну сынолъэӀу, узэрихабзэу, укъытхуэмыткӀийуэ.

⁵ Сыт щхьэкӀэ жыпӀэмэ дэ къызэрытщӀамкӀэ, мы лӀыр емынэ гуэрщ, дунейм журту тету хъуар къызэщӀеӀэтэ, диным ирилажьэ Назарет гупкӀэ зэджэми и унафӀэщӀщ.

⁶ Тхьэм и унэшхуэри игъэуфӀеину хэтащ. Ар дубыдри, ди хабзэм тету хьэкум тетщӀыхьыну дыхуеящ.

⁷ Ауэ Лисий дзэпщыр къакӀуэщ, лъэщыгъэкӀэ ар тӀэщӀихыжри, уи деж зауэлӀхэм къригъэшащ.

⁸ Лисий унафэ ищӀащ а лӀым дридауэгъуу уи деж дыкъэкӀуэну. Абы ущеупщӀкӀэ, ар зэрыдгъэкъуаншэхэм я пэжыр уэри зэбгъэщӀэн плъэкӀынущ.

⁹ Уэчыл Тертулл жиӀа а псалъэхэм журтхэр щыхьэт техъуэурэ, абы дэӀэпыкъуэгъу хуэхъуащ.

Феликс Ӏэтащхьэм и пащхьэм Паул зызэрыщиухеяр

¹⁰ Ӏэтащхьэм Ӏэ къыщыхуищӀым, Паул жиӀащ: – Илъэс куэд щӀауэ, мы лъэпкъым хеящӀэу узэраӀэр сщӀэуэ, зызухейурэ си Ӏуэхур сыпхуэгушхуэу уи пащхьэм нызолъхьэ.

¹¹ Махуэ пщыкӀутӀ и пэкӀэ Тхьэм сыщелъэӀуну Ерусалим сыкъызэрыкӀуар зэрыпэжыр зэбгъэщӀэн плъэкӀынущ.

¹² Тхьэм и унэшхуэм сэ зыми сыщеныкъуэкъуакъым, синэгуэгуми къалэми цӀыхухэр къыщызэщӀэсӀэтакъым.

¹³ Си дауэгъухэм сызэрагъэкъуаншэ Ӏуэху псоми ящыщ гуэр зыри пэжу къыщӀагъэкӀын ялъэкӀынукъым.

¹⁴ Ауэ ди адэжьхэм я Тхьэм сыхуэлажьэурэ, мы цӀыхухэм пхэнжу жыхуаӀэ гъуэгум сызэрырикӀуэр пэжщ. Торэт хабзэм ит псомкӀи бегъымбархэм ятха тхылъхэм ярыт псомкӀи фӀэщхъуныгъэ сиӀэщ.

¹⁵ Щыпкъагъэ зиӀи зимыӀи Тхьэм къызэригъэтэджыжынум мыбдеж щыт лӀыхэр Тхьэм зэрыщыгугъым хуэдэу, сэри Тхьэм сыщогугъ.

¹⁶ Аращи, Тхьэми цӀыхухэми я дежкӀэ гукъабзагъэкӀэ, мыхъумыщӀэ лъэпкъ зыдэзмыщӀэжу, сызэрыпсэуным сыт щыгъуи сыхущӀокъу.

¹⁷ – Илъэс куэдкӀэ Ерусалим сыщымыӀауэ, си лъэпкъым псапэ тыхь хуэсхьыну икӀи къурмэн сщӀыну аргуэру сыкъэкӀуащ.

¹⁸ Апхуэдэу сщӀыурэ, Торэт хабзэм и унафэм тету зызгъэкъэбзэжауэ, Тхьэм и унэшхуэм сыщӀэту мы цӀыхухэр къысӀущӀащ. ЦӀыхубэм сыхэтакъым, цӀыхухэри сэ къэзгъэукхъуакъым.

¹⁹ Асие хэкум щыщ журт гуп абы щыӀащ. Абыхэм сызэрагъэкъуэншэн щыӀэмэ, мис иджы уи пащхьэм нахуэу ар щыжаӀэн хуеящ.

²⁰ Е мыбдеж щытхэм жрыраӀэ Тхьэмадэ Хасэшхуэм и пащхьэм сыщрашэм щӀэпхъаджагъэу сщӀауэ къыздалъэгъуар.

²¹ «ЛӀахэр къызэрытэджыжынумкӀэ фӀэщхъуныгъэ зэрызиӀэм щхьэкӀэ нобэ хеящӀэм и пащхьэм сифшащ», жысӀэу, мы цӀыхухэм сахэту макъышхуэкӀэ къызэрыжысӀарауэ къыщӀэкӀынщ сызэрагъэкъуаншэр.

²² Апхуэдэу щыхъум, Зиусхьэным и гъуэгур фӀыуэ зыщӀэ Феликс а Ӏуэхум щыхэплъэну пӀалъэр игъэкӀуатэурэ жиӀащ: – Лисий дзэпщыр къызэрыкӀуэу, фи Ӏуэхум хьэкум тесщӀыхьынщ.

²³ Феликс дзэ пашэм унафэ хуищӀащ Паул яхъумэну, ауэ гугъу ирамыгъэхьыну, и гъусэхэр къыкӀэлъигъэплъын щхьэкӀэ, ахэр абы деж къэкӀуэну хуит ищӀыну.

Паул Феликсрэ Друзиллэрэ зэрепсэлъар

²⁴ Махуэ зыбжанэ дэкӀауэ, Феликс и щхьэгъусэ Друзиллэ и гъусэу къэкӀуащ. Друзиллэ журтт. Феликс и цӀыхухэм Паул къаригъашэри, ар едэӀуащ Мэссихь ХьисэкӀэ фӀэщхъуныгъэ уиӀэ зэрыхъуну щӀыкӀэм зэрытепсэлъыхьым.

²⁵ Щыпкъагъэм, зышыӀэныгъэм, къемэтмахуэм теухуауэ Паул псалъэу щыщӀидзэм, Феликс къащтэри, жиӀащ: – Иджы кӀуэж, пӀалъэр къэсмэ, укъезгъэшэнщ.

²⁶ ЗригъэутӀыпщыжын щхьэкӀэ, ар Паул Ӏулъхьэ къритыным щыгугъырт. Арати, куэдрэ къригъашэурэ, епсалъэрт.

²⁷ ИлъэситӀ дэкӀауэ, Феликс и пӀэм Порций Фест зи цӀэр иуващ. Феликс журтхэм фӀы гуэр яхуищӀэну хуейти, Паул лъэхъуэщым къыщӀинащ.