Апостол. 19 - ХъыбарыфӀыр. ЩӀэдзапӀэр. Уэрэд ЛъапӀэхэр

19-НЭ ЕДЗЫГЪУЭ Ефес къалэм цӀыхухэр Тхьэм и псалъэхэм Паул щригъэдаӀуэу зэрыщытар

¹ Аполлос Коринф къалэм щыщыӀэм, Паул ипщэ хэкухэм якӀуэцӀрыкӀри, Ефес къалэм нэсащ. Абы ХьисэкӀэ фӀэщхъуныгъэ зиӀэ цӀыху гуэрхэр къыщигъуэтри, еупщӀащ:

² ФӀэщхъуныгъэ фиӀэ щыхъум, Тхьэм и Псэ ЛъапӀэр фи гум илъ хъуа? – Тхьэм и Псэ ЛъапӀэр щыӀэуи зэхэтхакъым, – къыжраӀащ абыхэм.

³ Умэхъын хабзэу зефхьэм къикӀыр сыт? – еупщӀащ Паул абыхэм. – Иуан зытепсэлъыхьа умэхъын хабзэрщ, – къыжаӀащ абыхэм.

⁴ Иуан зи гуэныхьхэм хущӀегъуэжахэр иумэхъыу щытащ, – жиӀащ Паул. – Езым и ужькӀэ къэкӀуэну Мэссихь ХьисэкӀэ фӀэщхъуныгъэ яӀэн зэрыхуейр цӀыхухэм яжриӀащ.

⁵ Ар щызэхахым, Зиусхьэн Хьисэ и цӀэкӀэ зрагъэумэхъащ.

⁶ Паул и Ӏэхэр щатрилъхьэм, Тхьэм и Псэ ЛъапӀэр къахуехри, ямыщӀэ бзэхэмкӀэ къепсэлъащ. Тхьэм и псалъэхэр ягухэм кърилъхьэурэ, ахэр къажригъэӀащ.

⁷ ЦӀыху пщыкӀутӀ хуэдиз хъурт ахэр.

⁸ Паул синэгуэгум щӀыхьэри, тегушхуауэ цӀыхухэм едауэурэ, Тхьэм и Тепщэныгъэшхуэм* теухуа хъыбарыр я фӀэщ ищӀу мазищкӀэ яхуиӀуэтащ.

⁹ Ауэ абыхэм цӀыху ерыщ гуэрхэр яхэтащ, цӀыхухэм я пащхьэм Зиусхьэным и гъуэгум ӀейкӀэ щытепсэлъыхьрэ, фӀэщхъуныгъэ яӀэ хъуну ямыдэу. Ар щилъагъум, Паул абыхэм къахэкӀыжри, ХьисэкӀэ фӀэщхъуныгъэ зиӀэхэр къахишащ, Тыранн зи цӀэм и еджапӀэм Тхьэм и псалъэхэм махуэ къэс щригъэдаӀуэуи щӀидзащ.

¹⁰ Паул Асие хэкум ис алыдж псоми журт псоми Зиусхьэн Хьисэ теухуа хъыбарыфӀыр илъэситӀ енкӀэ яхуиӀуэтащ.

Скевэ и къуэхэр, жин бзаджэхэр цӀыхухэм хахуну зэрыщӀэкъуар

¹¹ Тхьэм Паул Ӏуэху телъыджэ дыдэхэр иригъащӀэрт.

¹² Паул и щӀыфэм еӀуса напэӀэлъэщӀхэри щыгъын щӀыӀутелъхэри сымаджэхэм тралъхьэрт. ЩытралъхьэкӀэ, ахэр хъужырт, ахэр зыӀыгъ жин бзаджэхэри яхэкӀыжырт.

¹³ Ауэ цӀыхухэм жин бзаджэхэр хахуурэ къэзыкӀухьу щыта журт гупым Хьисэ и цӀэр жаӀэурэ, жин бзаджэхэр цӀыхухэм хахуну щӀэкъурт. – Хьисэу зи хъыбар Паул жиӀэм и цӀэкӀэ мы цӀыхум фыхэкӀыну унафэ фхузощӀ, – жаӀэрт абыхэм.

¹⁴ Журт дин пашэшхуэу Скевэ зи цӀэм и къуиблми апхуэдэу ящӀырт.

¹⁵ – Хьисэ соцӀыху, Паул и хъыбари зэхэсхащ, ауэ фэ хэт фыщыщ? – жэуап яритыжащ жин бзаджэм.

¹⁶ Жин бзаджэм иӀыгъ лӀыр къажьэхэлъэри, а псоми къатекӀуащ. АпхуэдизкӀэ хьэкӀэкхъуэкӀагъэ ярищӀати, пцӀанэрэ зэхэуӀауэ унэм къыщӀэжыжащ.

¹⁷ Мы хъыбарыр Ефес къалэм дэс алыджхэми журтхэми щызэхахым, псори шынагъуэшхуэм хэхуащ. Апхуэдэу щыхъум, Зиусхьэн Хьисэ и цӀэм щӀыхьышхуэ хуащӀу щӀадзащ.

¹⁸ ФӀэщхъуныгъэ зиӀэ хъуахэм ящыщ куэд къакӀуэри, ялэжьа бзаджагъэмкӀэ, цӀыхухэм зэхахыу, заумысыжащ.

¹⁹ Удыгъэ Ӏуэхум хэт цӀыху куэдым я тхылъхэр зэхуахьэсри, цӀыху псоми ялъагъуу ягъэсащ. А тхылъхэм я уасэхэр къыщалъытэм, дыжьын ахъшэ мин щэ ныкъуэ хъуащ.

²⁰ Апхуэдэу, Зиусхьэным и псалъэхэм ину заубгъуурэ, цӀыху нэхъыбэм ялъэӀэсащ.

Ефес къалэм зэрыхьзэриишхуэ къызэрыщыхъуар

²¹ Мы Ӏуэху псори къэхъуа нэужь, Паул, Македоние, Ахаие хэкухэм кӀуэцӀрыкӀыу, Ерусалим кӀуэну мурад ищӀащ. – Ерусалим сынэса нэужь, Рим къалэшхуэми сыкӀуэн хуейщ, – жиӀащ.

²² Паул и дэӀэпыкъуэгъухэм ящыщу Тимофейрэ Ерастрэ Македоние хэкум нэхъапэ игъэкӀуащ. Езым Асие хэкум тӀэкӀурэ зыщиӀэжьащ.

²³ Зиусхьэным и гъуэгум щхьэкӀэ зэрыхьзэрий ин къэхъуащ а махуэхэм;

²⁴ сыт щхьэкӀэ жыпӀэмэ Димитрий и цӀэу, дыщэкӀ гуэр а къалэм дэсащ. Артемидэ жыхуаӀэ тхьэ гуащэ нэпцӀым и тхьэлъэӀупэ унэ цӀыкӀунитӀэр дыжьыным къыхищӀыкӀыурэ, дыщэкӀхэм а Димитрийм ахъшэ куэд къаригъэлэжьырт.

²⁵ Димитрий а дыщэкӀхэри апхуэдэ ӀэщӀагъэ зиӀэ нэгъуэщӀхэри зэхуишэсри яжриӀащ: – Си гъусэхэ, мы Ӏуэхум ди къулеигъэр къызэрыхэкӀыр фощӀэ.

²⁶ Мы Паул зи цӀэм Ефес къалэм и мызакъуэу, Асие хэкум, зэрыщыту, къанэ щӀагъуэ щымыӀэу, «ЦӀыхухэм ящӀа тхьэ сурэтхэр тхьэ пэжу щыткъым», жиӀэм, цӀыху куэдым ар я фӀэщ ищӀурэ зэрыщигъэуар фэ фолъагъу икӀи зэхывох.

²⁷ ЦӀыхухэм ди ӀэщӀагъэр зэрамыдэжыну къудейр аракъым шынагъуэр, атӀэ Артемидэ тхьэ гуащэшхуэм и тхьэлъэӀупӀэ унэшхуэм нэмыплъ зэрыратынурщ, Асие хэку псоми дуней псоми щыдгъэлъапӀэ Артемидэ и щӀыхьышхуэр зэрыкӀуэдыжынуращ шынагъуэр.

²⁸ А псалъэхэр щызэхахым, хуабжьу губжьри, лӀы гупышхуэр зэрыгъэкӀиящ: – Ефес къалэм и Артемидэ лъапӀэ дыдэщ!

²⁹ Къалэм зэрыхьзэриишхуэ къыщыхъуащ. Македонием щыщу Паул и гъусэ Гаийрэ Аристархрэ яубыдщ, здахури, цӀыху псори щызэхэт зэхуэсыпӀэм и утыкум ирашащ.

³⁰ Паул цӀыхухэм яхыхьэну хуеящ, ауэ ХьисэкӀэ фӀэщхъуныгъэ зиӀэхэм хуадакъым.

³¹ Асие хэкум и къулыкъущӀэхэм ящыщу Паул и благъэхэм хъыбар кърагъащӀэри къелъэӀуащ: «ЗэхуэсыпӀэм умыкӀуэ!» – жаӀэурэ.

³² Зым зы, адрейхэми нэгъуэщӀ гуэр жаӀэурэ, цӀыхухэр зэрыгъэкӀийрт; сыт щхьэкӀэ жыпӀэмэ абдеж кърихьэлӀа цӀыхухэр зэрыгъэплъати. Нэхъыбэм щӀызэӀущӀар ящӀэртэкъым.

³³ Журтхэм Александр зи цӀэр цӀыху гупышхуэм къыхрагъэшри, цӀыхухэм я пащхьэм ирагъэуващ. Александр и Ӏэр къиӀэтри, цӀыхухэм я пащхьэм къыщыпсэлъэну хуеящ.

³⁴ Ауэ ар зэрыжуртыр къыщащӀэм, сыхьэтитӀкӀэ цӀыху псори зы макъкӀэ зэрыгъэкӀиящ: – Ефес къалэм и Артемидэ лъапӀэ дыдэщ! – жаӀэурэ.

³⁵ ИкӀэм-икӀэжым къалэм и тхакӀуэм цӀыхухэр игъэсабырыжри жиӀащ: – Ефес дэс лӀыхэ! Тхьэ гуащэшхуэ Артемидэрэ абы и сурэту уафэм къехамрэ я хъумакӀуэу Ефес къалэр зэрыщытыр зымыщӀэ цӀыху щыӀэ?

³⁶ Ефес къалэр абыхэм я хъумакӀуэу зэрыщытым шэч хэлъкъыми, фысабыри, Ӏуэхум щхьэпсынщӀагъэ хэвмылъхьэ.

³⁷ Мы лӀыхэр тхьэлъэӀупӀэ унэшхуэхэм емыдыгъуарэ, ди тхьэ гуащэм хуэмышхыдауэ, мыбдежым къэфшащ.

³⁸ Димитрийрэ абы щӀыгъу сурэтыщӀхэмрэ цӀыху гуэрым дауэгъу хуэхъуну хуеймэ, цӀыхухэм я дэуэн Ӏуэхухэм Ӏэтащхьэхэр щыхэплъэ махуэхэр щыӀэщ. Я зэхуакум дэуэн Ӏуэху дэлъмэ, зэрыредауэ.

³⁹ Абы нэмыщӀ фызыхуейӀамэ, къалэм дэсхэм я хасэу хабзэм тетым а Ӏуэхур зэхигъэкӀын хуейщ.

⁴⁰ Нобэ къэхъуа Ӏуэхухэм щхьэкӀэ, «ЗыкъывоӀэт» жаӀэу рим тепщэныгъэ зиӀэхэм дагъэкъуэншэнкӀэ шынагъуэ щыӀэщ. Мы зэрыхьзэрийр къызэрытӀэтар къытхуагъэгъуну щхьэусыгъуэ зыри диӀэкъым. Абы а псалъэр иуха нэужь, цӀыхухэр зэбгригъэкӀыжащ.