Апостол. 17 - ХъыбарыфӀыр. ЩӀэдзапӀэр. Уэрэд ЛъапӀэхэр

17-НЭ ЕДЗЫГЪУЭ Фессалоникэ къалэм и цӀыхухэм Паулрэ и гъусэхэмрэ гугъуехь зэрырагъэшэчар

¹ Паулрэ и гъусэхэмрэ Амфипол, Аполлоние къалэхэм къаблэкӀри Фессалоникэ къалэм къэкӀуащ. Журтхэм абы синэгуэгу щаӀащ.

² Паул, зэрихабзэу, абыхэм я синэгуэгум щӀыхьэри, Тхьэм и псалъэу тхахэм щыщ къахуеджэурэ, щэбэт махуищкӀэ абыхэм щедэуащ.

³ Мэссихь, гугъуехь ишэча нэужь, лӀахэм къахэтэджыкӀыжын хуейуэ зэрыщытар захригъэщӀыкӀыурэ, яхуигъэнэхуащ. – Хьисэ зи хъыбар фхуэсӀуатэр Мэссихьыращ, – жиӀащ.

⁴ Журтхэм ящыщ зыкъомым фӀэщхъуныгъэ яӀэ хъури, Паулрэ Силэрэ гъусэ зыхуащӀащ. Абыхэм нэмыщӀ, Тхьэр зыгъэлъапӀэ алыджхэм ящыщ куэдми, цӀыхубз цӀэрыӀуэхэм ящыщ куэдми фӀэщхъуныгъэ яӀэ хъуащ.

⁵ Ауэ фӀэщхъуныгъэ зиӀэ мыхъуа журтхэр фыгъуэрти, цӀыху зэхуэсыпӀэм лӀы напэншэхэр къыщагъуэтщ, цӀыху гупышхуэ зэхуашэсри, абыхэм къалэм дэсхэр къызэщӀагъэстащ. Иасон и унэм ежалӀэри, Паулрэ Силэрэ къыщӀашу, цӀыхухэм я пащхьэм кърашэну мурад ящӀащ итӀанэ.

⁶ Ахэр щамыгъуэтым, Иасонрэ къуэшхэм ящыщ гуэрхэмрэ къалэ къулыкъущӀэхэм я пащхьэм иралъафэри, кӀийурэ мыпхуэдэу жаӀащ: – Дуней псори зэӀызыщӀэ мы цӀыхухэр мыбы къэкӀуащ иджы.

⁷ Иасон и унэм иригъэблэгъащ ахэр. «НэгъуэщӀ пащтыхь, Хьисэ зи цӀэр, щыӀэщ», жаӀэурэ кесарым и унафэхэм поув.

⁸ Апхуэдэу щыжаӀэм, цӀыхубэри къалэ къулыкъущӀэхэри къагъэпӀейтеящ.

⁹ Къалэм къулыкъущӀэхэм Иасонрэ и гъусэхэмрэ тхьэ ирагъаӀуэри, къаутӀыпщыжащ абы и ужькӀэ.

Верие къалэм дэс цӀыхухэм ящыщ куэд Хьисэ и гъуэгу зэрытехьар

¹⁰ Жэщ зэрыхъуу, къуэшхэм Паулрэ Силэрэ Верие къалэм ягъэкӀуащ. Зэрынэсу, ахэр журтхэм я синэгуэгум щӀыхьащ.

¹¹ Фессалоникэ дэсхэм нэхърэ, Верие дэсхэм щыпкъагъэ нэхъ яхэлът. Тхьэм и псалъэхэм я гуапэу еувэлӀащ. Паул жиӀахэр Тхьэм и псалъэу тхахэм техуэрэ темыхуэрэ зэхагъэкӀын щхьэкӀэ, Тхьэм и псалъэу тхахэм махуэ къэси хэплъэрт.

¹² Журтхэм ящыщ куэдми, алыдж цӀыхубз цӀэрыӀуэхэмрэ цӀыхухъухэмрэ ящыщ зыкъомми фӀэщхъуныгъэ яӀэ хъуащ.

¹³ Паул Верие къалэм дэс цӀыхухэр Тхьэм и псалъэхэм иригъэдаӀуэу зэрыщытар Фессалоникэ щыщ журтхэм къыщащӀэм, Верие къакӀуэри, цӀыхубэр зэщӀагъэплъащ икӀи къагъэпӀейтеящ.

¹⁴ Къуэшхэм Паул хы Ӏуфэм ягъэкӀуащ занщӀэу, Силэрэ Тимофейрэ Верие къалэм къыдэнащ.

¹⁵ Паул зышэхэм ар Афинэ къалэм нагъэсащ. Силэрэ Тимофейрэ езым деж псынщӀэу къэкӀуэну Паул зышахэм унафэ яхуищӀа нэужь, абыхэм ягъэзэжащ.

Афинэ къалэм дэс цӀыхухэм я пащхьэм Паул къызэрыщыпсэлъар

¹⁶ Афинэ къалэм Силэрэ Тимофейрэ щапэплъэу, тхьэ нэпцӀ сурэтхэр къалэм дэзу щилъагъум, ар Паул игу къеуащ.

¹⁷ Паул журтхэмрэ Тхьэр зыгъэлъапӀэхэмрэ синэгуэгум щепсалъэрт, зэхуэсыпӀэм щызэӀущӀэхэми махуэ къэси щедауэрт.

¹⁸ Епикурейхэмрэ стоикхэмрэ ящыщ философ гуп Паул къедауэу щӀадзащ. – Мы щхьэгъавэм сыт жиӀэну зыхуейр? – жаӀащ зыкъомым. – Мы лӀым тхьэ хамэхэм я хъыбар къиӀуатэ хуэдэщ, – жаӀащ адрейхэм. Апхуэдэу щӀыжаӀар Паул Хьисэрэ лӀахэр къызэрытэджыжынумрэ теухуа хъыбархэр цӀыхухэм яхуиӀуатэу зэрыщытарщ.

¹⁹ А философхэм ареопаг Ӏуащхьэм деж щызэӀущӀэ хасэм Паул здашэри къыжраӀащ итӀанэ: – Уэ цӀыхухэм ебгъащӀэ ӀуэхущӀэхэр къыдгурыбгъэӀуэн?

²⁰ Псалъэ гъэщӀэгъуэнхэр къыджыбоӀэ. Абыхэм къикӀыр тщӀэн ди гуапэщ.

²¹ Афинэ къалэм щыщ псоми, абы дэс хамэхэми хъыбарыщӀэхэр яӀуэтэнымрэ едэӀуэнымрэ зыпащӀ щыӀэтэкъым, а Ӏуэхуми зэман куэд яфӀэфӀыпсу трагъэкӀуадэрт.

²² Ареопаг Ӏуащхьэм щызэӀущӀэ хасэм и пащхьэм къиувэри, Паул жиӀащ: – Афинэ дэс лӀыхэ! Фэ тхьэ куэдыр сыт и лъэныкъуэкӀи ину вгъэлъапӀэу солъагъу;

²³ сэ къэскӀухьурэ, фи тхьэлъэӀупӀэхэм сыщеплъым, мыпхуэдэу зытетха къурмэнщӀыпӀэ гуэр срихьэлӀащ: «ДымыщӀэ Тхьэм щхьэкӀэ». Аращи, фэ фымыщӀэ Тхьэм и хъыбарыращ сэ фхуэсӀуатэр.

²⁴ – Тхьэуэ дунейри дунейм тетхэри къэзыгъэщӀар уафэми щӀылъэми я Зиусхьэнырщ. Ар цӀыхухэм я ӀэкӀэ ящӀа тхьэлъэӀупӀэ унэшхуэхэм щӀэскъым.

²⁵ ЦӀыхухэм я ӀэкӀэ езым зыгуэр къыхуащӀын хуейкъым. Аращ псэ зыӀут псори щызыгъэӀэри, жьы къезыгъапщэри, зыхуэныкъуэ псори езыгъэгъуэтри.

²⁶ Тхьэм зы цӀыху закъуэм цӀыху лъэпкъ псори къыхигъэхъукӀащ, ахэр дунейм дэнэкӀи щыпсэун щхьэкӀэ. Я тетыгъуэхэмрэ я псэупӀэхэмрэ гъунапкъэ яхуэхъунур игъэуващ.

²⁷ Тхьэм цӀыхухэр къыщӀигъэщӀар ахэр езым лъыхъуэурэ икӀи Ӏэбэрабэурэ, Ӏэмал гуэркӀэ къагъуэтын щхьэкӀэщ. Апхуэдэу щыт пэтми, Тхьэр дэ тщыщ дэтхэнэми пэжыжьэкъым,

²⁸ «Езыращ дызыгъэпсэури, дызезыгъакӀуэри, дыщызыгъэӀэри», зыгуэрым зэрыжиӀам хуэдэу. «Дэри дрибынщ», фэ фи тхакӀуэхэм ящыщ зыкъомым зэрыжаӀам хуэдэу.

²⁹ – Аращи, Тхьэм дызэрибыным щхьэкӀэ, цӀыхухэм я ӀэпэӀэсагъэрэ акъылыфӀагъэкӀэ дыщэм, дыжьыным, мывэм къыхащӀыкӀа сурэтхэм Тхьэр яхуэдгъадэ хъунукъым.

³⁰ БлэкӀа зэманхэм, цӀыхухэм щӀэныгъэ ямыӀэу щыщытам, Тхьэр абыхэм нэ ӀейкӀэ къеплъыгъакъым, атӀэ цӀыху псоми, дэнэ щыӀэми, я гуэныхьхэм хущӀегъуэжыну унафэ къахуещӀ иджы;

³¹ сыт щхьэкӀэ жыпӀэмэ Тхьэм зы махуэ игъэуващ. Езым къигъэлъэгъуа лӀым дунейм и цӀыху псоми хьэкум захуэ ятригъэщӀыхьынущ а махуэм. Апхуэдэу зэрыхъунур Тхьэм цӀыху псоми ягуригъэӀуащ а лӀыр лӀахэм къахигъэтэджыкӀыжурэ.

³² ЛӀахэр къызэрытэджыжынум и хъыбарыр Паул жиӀэу щызэхахым, языныкъуэхэр Паул щыдыхьэшхащ, языныкъуэхэм жаӀащ: – Уэ мы жыпӀа хъыбарым дедэӀуэну дыхуейщ дяпэкӀи.

³³ Апхуэдэу, Паул абыхэм яхэкӀыжащ.

³⁴ Зыкъомым Паул гъусэ зыхуащ, фӀэщхъуныгъэ яӀэ хъуащ. Ареопаг Ӏуащхьэм щызэӀущӀэ хасэм щыщ Дионисий, Дамар и цӀэу цӀыхубз гуэр, нэгъуэщӀ зыкъоми а фӀэщхъуныгъэ зиӀэ хъуахэм яхэтт.