Апокалипсис 15 - ХъыбарыфӀыр. ЩӀэдзапӀэр. Уэрэд ЛъапӀэхэр

15-НЭ ЕДЗЫГЪУЭ Иужьрей гугъуехьышхуэхэр мелыӀычхэм къызэрахьыр

¹ Абы и ужькӀэ нэгъуэщӀ нэщэнэ ин икӀи гъэщӀэгъуэныщэ уафэм щыслъэгъуащ: МелыӀычиблым иужьрей гугъуехьышхуиблыр къахьырт. Тхьэм и губжьыр уха мэхъу абыхэмкӀэ.

² ЗэхэткӀухьа мафӀэмрэ абджымрэ къыхэщӀыкӀауэ, хым и плъыфэ иӀэу зыгуэр слъэгъуащ итӀанэ. Хьэщхьэвылъэм, абы и сурэтым, абы и цӀэм и бжыгъэм ятекӀуэгъа цӀыхухэр абджым къыхэщӀыкӀа хым и Ӏуфэм Ӏутт. Тхьэм ярита шыкӀэ пшынэхэр яӀыгъыу,

³ Тхьэм хуэлажьэ Мусэмрэ Щынэмрэ я уэрэдыр жаӀэрт: «ЛъэкӀыныгъэшхуэ псори зиӀэ Зиусхьэну Тхьэ, уэ блэжь Ӏуэхухэр Ӏуэхушхуэщ икӀи Ӏуэху гъэщӀэгъуэныщэщ. Уи гъуэгухэр гъуэгу захуэщ икӀи гъуэгу пэжщ, уэ цӀыху лъапӀэхэм урапащтыхьщ.

⁴ Уэ, Зиусхьэн, къыпщымышынэ цӀыхуи щӀыхьышхуэ къыпхуэзымыщӀ цӀыхуи щыӀэкъым. Сыт щхьэкӀэ жыпӀэмэ лъапӀэ закъуэу щыӀэр уэращ. ЩыпкъагъэкӀэ хьэкум зэрыпщӀэр нахуэ зэрыхъуам щхьэкӀэ, лъэпкъ псори уи пащхьэм ихьэнурэ уагъэлъэпӀэнущ».

⁵ Сыщыплъэм, Тхьэм и унэшхуэу щыхьэтыгъэм и шэтырыр Ӏухауэ уафэм щыслъэгъуащ итӀанэ.

⁶ Гугъуехьышхуиблыр къэзыхь мелыӀычиблыр Тхьэм и унэшхуэм къыщӀэкӀащ. Щыгъын хужьыбзэ лыду ящыгът, дыщэм къыхэщӀыкӀа бгырыпххэри я бгым щӀэпхат.

⁷ ИгъащӀэкӀэ щыӀэну Тхьэм и губжьыр зэрыт фалъиблу дыщэм къыхэщӀыкӀар псэущхьиплӀым я зым мелыӀычиблым яритащ.

⁸ Тхьэм и щӀыхьышхуэмрэ и лъэкӀыныгъэшхуэмрэ я Ӏугъуэр Тхьэм и унэшхуэм щӀэз хъуащ. МелыӀычиблым къахь гугъуехьышхуиблыр яухыху, Тхьэм и унэшхуэм щӀыхьэн зыми лъэкӀакъым.