Апокалипсис 12 - ХъыбарыфӀыр. ЩӀэдзапӀэр. Уэрэд ЛъапӀэхэр

12-НЭ ЕДЗЫГЪУЭ ЦӀыхубзымрэ благъуэжьымрэ

¹ Нэщэнэ гъэщӀэгъуэныщэ уафэм къыщылъэгъуащ итӀанэ: ЦӀыхубз гуэр, дыгъэр фащэу щыгъыу, и лъакъуэхэр мазэм тету, и щхьэрыгъ тажым вагъуэ пщыкӀутӀыр тету, къэхутащ.

² ЦӀыхубзыр лъэщыджэт икӀи лъхугъэр къытелъэдауэ гугъуехьышхуэ ишэчти, кӀийрт.

³ НэгъуэщӀ нэщэнэ гъэщӀэгъуэныщэ гуэр уафэм къыщылъэгъуащ итӀанэ: Благъуэжь абрагъуэ плъыжьу, щхьибл фӀэту, бжьакъуипщӀ тету къэлъэгъуащ. Дэтхэнэ зы щхьэми зы таж щхьэрыгът.

⁴ Вагъуэхэм я Ӏыхьэ щанэр и кӀэмкӀэ уафэм къыщрилъэфажьэри, щӀылъэм къридзыхащ. Сабий пэплъэ цӀыхубзым и пащхьэм благъуэжьыр къиуващ, сабийр къызэрилъхуу иригъэлъэтэхын щхьэкӀэ.

⁵ ЩӀалэ цӀыкӀу къилъхуащ. Абы щӀылъэм тет лъэпкъ псори гъущӀ башкӀэ игъэӀурыщӀэнущ. А сабийр Тхьэмрэ Тхьэм и тахътэмрэ я деж драхьеящ.

⁶ ЦӀыхубзыр щӀэпхъуэжри, Тхьэм абы губгъуэ нэщӀым щыхуигъэхьэзыра увыӀэпӀэм щызэгъащ. Махуэ минрэ щитӀрэ хыщӀкӀэ щагъэшхэнущ ар абдежым.

⁷ Уафэм зауэ къыщыхъеящ. Михаилрэ абы и мелыӀычхэмрэ благъуэжьым езэуащ, благъуэжьри абы и мелыӀычхэри абыхэм къапэуващ.

⁸ Благъуэжьыр Михаил къыпэлъэщакъым, благъуэжьымрэ абы и мелыӀычхэмрэ уафэм щӀыпӀэ къащыхуэнэжакъым.

⁹ Благъуэжь абрагъуэр щӀылъэм кърадзыхащ – иблису икӀи шейтӀану жыхуаӀэ блэжьу щӀылъэм тет цӀыху псори дэзыщэхыр аращ. Ари абы и мелыӀычхэри щӀылъэм кърадзыхащ.

¹⁰ Уафэм макъ лъагэ гуэр къиӀукӀри, мыпхуэдэу жиӀэу зэхэсхащ итӀанэ: «ДымыкӀуэду ди Тхьэм дыкъригъэлащ иджы. Ди Тхьэм и лъэкӀыныгъэшхуэмрэ и Тепщэныгъэшхуэмрэ къэлъэгъуащ иджы, езы Тхьэм и Мэссихь и къаруушхуэри къэлъэгъуащ. Сыт щхьэкӀэ жыпӀэмэ ди къуэшхэр зыгъэмысэу, Тхьэм и пащхьэм жэщи махуи ахэр щызыгъэкъуаншэр щӀылъэм кърадзыхащ.

¹¹ Щынэм лъыуэ щӀэкӀамкӀи, Тхьэм и псалъэхэм щыхьэт зэрахуэхъуамкӀи ди къушхэр шейтӀаным текӀуащ. ЛӀэныгъэм и гъунэгъу хъуами, езыхэм я псэхэм щысхьакъым.

¹² Аращи, фэ, уафэхэри, фэ, уафэхэм щыпсэухэри, фыгуфӀэ! Ауэ фэ, щӀыри хыри, гъуэгу мыгъуэ фытеуващ, сыт щхьэкӀэ жыпӀэмэ иблисыр къыфхуехащ. Зэману езым къыхуэнэжыр зэрымащӀэр ещӀэри, и гум губжьышхуэ илъщ».

¹³ Благъуэжьыр, щӀылъэм къызэрырадзыхар щилъагъум, щӀалэ цӀыкӀур къызыхуэхъуа цӀыхубзым и ужь ихьащ.

¹⁴ МелыӀыч гуэрым бгъэ иным и дамитӀыр цӀыхубзым къритащ, блэжьым и пащхьэм икӀыу, Тхьэм губгъуэ нэщӀым абы щыхуигъэхьэзыра увыӀэпӀэм лъэтэн щхьэкӀэ. Абдежым илъэсищрэ ныкъуэкӀэ щагъэшхэнущ.

¹⁵ ЦӀыхубзыр псым иригъэхьын щхьэкӀэ, псыдзэм хуэдэу, блэжьым и жьэм псыр къыжьэдиутхыкӀащ.

¹⁶ Ауэ щӀыр цӀыхубзым дэӀэпыкъущ, и жьэр зэӀуихри, благъуэжьым и жьэм къыжьэдиутхыкӀа псышхуэр ирифащ.

¹⁷ ЦӀыхубзым ину хуэгубжьри, цӀыхубзым къытехъукӀа нэгъуэщӀ и бынхэм – Тхьэм и унафэхэр зыгъэзащӀэхэмрэ Хьисэ Мэссихь щыхьэт хуэхъухэмрэ – езэуэну кӀуащ благъуэжьыр итӀанэ.