Апокалипсис 10 - ХъыбарыфӀыр. ЩӀэдзапӀэр. Уэрэд ЛъапӀэхэр

10-НЭ ЕДЗЫГЪУЭ МелыӀычымрэ тхылъ цӀыкӀу зэӀухамрэ

¹ ЛъэкӀыныгъэ зиӀэ, нэгъуэщӀ мелыӀыч гуэр уафэм къехыу слъэгъуащ итӀанэ; уафапшэр фащэу щыгът, лэгъупыкъури щхьэщытт, и нэкӀури дыгъэм хуэдэт, и лъакъуэхэри мафӀэ пкъохэм хуэдэт.

² Тхылъ цӀыкӀу гуэр зэӀухауэ иӀыгът. Лъакъуэ ижьыр хым хигъэувэрт, лъакъуэ сэмэгур щӀым тригъэувэрт.

³ Аслъэнхэр зэрыгъуахъуэм хуэдэу, макъышхуэкӀэ къэгуоуащ. Ар къыщыгуом, уафэгъуагъуиблым я макъхэр къэӀуащ.

⁴ Уафэгъуагъуиблым я макъхэр къэӀуа нэужь, жаӀар стхыну сыхуеящ, ауэ уафэм къикӀыу макъ гуэрым жиӀэу зэхэсхащ: – Уафэгъуагъуиблым жаӀар умытхыу, ущэху.

⁵ Зи лъакъуэ лъэныкъуэр хым хэзыгъэувауэ, адрей лъакъуэ лъэныкъуэри щӀым тезыгъэувауэ слъэгъуа мелыӀычым и Ӏэ ижьыр уафэм дриӀэтеящ.

⁶ Тхьэуэ сыт щыгъуи щыӀэ, уафэхэмрэ уафэхэм щыӀэ псомрэ, щӀымрэ щӀым тет псомрэ, хымрэ хым хэс псомрэ къэзыгъэщӀам и цӀэкӀэ а мелыӀычым тхьэрыӀуэ ищӀри, мыпхуэдэу жиӀащ: – Зэман куэд къэнэжакъым.

⁷ Ауэ ебланэ мелыӀычыр и бжьамиишхуэм къыщепщэну махуэхэм Тхьэм, езым хуэлажьэ бегъымбархэм къазэрыжригъэӀам хуэдэу, и мурад щэхур игъэзэщӀэнущ.

⁸ Уафэм къиӀукӀыу зэхэсха макъым, аргуэру къэпсалъэурэ, къызжиӀащ: КӀуэи, зи лъакъуэ лъэныкъуэр хым хэзыгъэувауэ, адрей лъакъуэ лъэныкъуэри щӀым тезыгъэува мелыӀычым иӀыгъ тхылъ цӀыкӀу зэӀухар къеӀых.

⁹ Арати, мелыӀычым деж сыкӀуэри жесӀащ: – А тхылъ цӀыкӀур къызэт. – Мэ, узот, шхы, – къызжиӀащ абы. – Уи лъатэкӀэ дыджынущ, ауэ уи жьэмкӀэ фом хуэдэу ӀэфӀ хъунущ.

¹⁰ Тхылъ цӀыкӀур мелыӀычым къеӀысхри сшхащ. Си жьэмкӀэ фом хуэдэу ӀэфӀу щытащ, ауэ сшха нэужь, си лъатэм дыдж къыщыхъуащ.

¹¹ Мыпхуэдэу къызжиӀащ итӀанэ: – Къэрал Ӏэджэми, лъэпкъ Ӏэджэми, бзэ Ӏэджэми, пащтыхь Ӏэджэми ятеухуауэ Тхьэм уи гум кърилъхьа хъыбару къэхъуну Ӏуэхугъуэхэм теухуахэр цӀыхухэм яхуэпӀуэтэн хуейщ.