2 Кор. 11 - ХъыбарыфӀыр. ЩӀэдзапӀэр. Уэрэд ЛъапӀэхэр

11-НЭ ЕДЗЫГЪУЭ Апостол нэпцӀхэм Паул зэратепсэлъыхьыр

¹ Сэ си делагъэр фигу тевгъэхуэну сыхуейт, тевгъэхуэнкӀи сыфщогугъ.

² Тхьэм къыбгъэдэкӀ ефыгъулӀэныгъэкӀэ сэ сынывофыгъулӀэ, сыт щхьэкӀэ жыпӀэмэ фэ хъыджэбз къабзэм хуэдэу лӀы закъуэу Мэссихь и пащхьэм физгъэхьэу, абы фыдэкӀуэну фыкъыхезгъэшащ.

³ Ауэ блэжьым Хьэуа зи цӀэр хьилагъэкӀэ зэригъэпцӀам хуэдэу, фэри фи щхьэр зэӀигъыхьэу, Мэссихь щыпкъагъэу хувиӀэм фи щӀыбагъ хуэвгъэзэнкӀэ сошынэ.

⁴ Зыгуэр фи деж къакӀуэу, Хьисэ теухуауэ хъыбару дэ фэдгъэщӀам нэмыщӀ, нэгъуэщӀ хъыбар фигъащӀэмэ, фи гуапэу ар фигу тывогъахуэ. Е Тхьэм и Псэ ЛъапӀэу фи гум илъ дгъэхъуам нэмыщӀ псэ гуэр фи гум илъ игъэхъумэ, ари фи гуапэу фигу тывогъахуэ. Е фи фӀэщ хъуа хъыбарыфӀым фӀэкӀа, нэгъуэщӀ хъыбарыфӀу жыхуиӀэр зыгуэрым фигъащӀэмэ, ари фи гуапэу фигу тывогъахуэ.

⁵ Ауэ а апостол ину жыхуэфӀэхэм нэхърэ зыкӀи нэхъ цӀыкӀуу зыслъытэжыркъым.

⁶ ПсэлъэнкӀэ сымыӀэзэми, щӀэныгъэкӀэ сыӀэзэщ. ЩӀэныгъэкӀэ сызэрыӀэзэр сыт и лъэныкъуэкӀи сыт щыгъуи къыфхуэзгъэнэхуащ.

⁷ И пщӀэр къыфӀызмыхыу, Тхьэм деж къикӀ хъыбарыфӀыр фхуэсӀуатэурэ, фызгъэинын щхьэкӀэ, зызэрызгъэлъахъшэмкӀэ емыкӀу сщӀа?

⁸ Фэ сыфхуэлэжьэн щхьэкӀэ, нэгъуэщӀ члисэ зэхуэсхэм пщӀэ къеӀысхыурэ, абыхэм ахъшэ езгъэгъэкӀуэдащ. Фи деж сыщыщыӀам, сыхуэныкъуами, хьэлъэ зыми сытехъуакъым.

⁹ Македонием къикӀыу къэкӀуа къуэшхэм сызыхуэныкъуэр къысхуащӀащ. Хьэлъэ сызэрыфтемыхъуэным сыт и лъэныкъуэкӀи сыхэтащ икӀи сыхэтынущ.

¹⁰ Мэссихь и щыпкъагъэу си гум илъымкӀэ жызоӀэ, Ахаие хэку псом исхэм ящыщу зыми си щытхъур сӀихын лъэкӀынукъым.

¹¹ Сыт апхуэдэу щӀэсщӀыр? ФӀыуэ фызмылъагъуу ара? Хьэуэ, фӀыуэ фызэрыслъагъур Тхьэм ещӀэ.

¹² Ауэ зэрысщӀам хуэдэу сыт щыгъуи сщӀынущ. «Паул зэрылажьэм хуэдабзэу, дэри долажьэ», жызыӀэу зыщытхъужхэр зыщытхъужыну Ӏэмал естыну сыхуейкъым.

¹³ Апхуэдэ цӀыхухэр апостол нэпцӀхэщ, лэжьакӀуэ гъэпцӀакӀуэхэщ. Мэссихь и апостол хуэдэу, загъэӀу къудейщ.

¹⁴ Ар гъэщӀэгъуэнкъым. Езы шейтӀаным нэхум и мелыӀыч хуэдэу зегъэӀу.

¹⁵ Аращи, шейтӀаным хуэлажьэхэм, щыпкъагъэм хуэлажьэ хуэдэу, загъэӀумэ, ар шынагъуэкъым. Ялэжьа Ӏуэхухэм хуэфащэ кӀэух ягъуэтынущ абыхэм.

Зэрыапостолым щхьэкӀэ Паул ишэча гугъуехьхэр

¹⁶ Аргуэру жызоӀэ, зэхэщӀыкӀ зимыӀэм сыхуэдэу зыми иремылъытэ. Ауэ апхуэдэу сыфлъытэмэ, зэхэщӀыкӀ зимыӀэм фызэрыхущытым хуэдэу, фыкъысхущыт, тӀэкӀу сызыщытхъужын слъэкӀын щхьэкӀэ.

¹⁷ Иджы жысӀэр Зиусхьэныракъым жызэзыгъыӀэр. Сытегушхуэрэ сызыщытхъужмэ, зэхэщӀыкӀ зимыӀэм хуэдэу сопсалъэ.

¹⁸ Мы дунейм и цӀыхухэм я хабзэм хуэдэу, цӀыху куэдыр зэрызыщытхъужым щхьэкӀэ сэри сызыщытхъужынущ.

¹⁹ Фэ фызэрыӀущым щхьэкӀэ зэхэщӀыкӀ зимыӀэхэр фи гуапэу фигу тывогъахуэ.

²⁰ Зыгуэрым фигъэпщылӀми, е вгъэшхэну фыхигъэзыхьми, е фихъунщӀэми, е фи пащхьэм зыщигъэпагэми, е фи нэкӀум къеуэми, ари фигу тывогъахуэ.

²¹ Си напэр сыуэ къыжысӀэн хуейщ: апхуэдэ Ӏуэхухэр тщӀэну лъэкӀыныгъэ диӀакъым. ЦӀыху гуэр Ӏуэху гуэркӀэ зыщытхъужыну тегушхуэмэ, сэри а ӀуэхумкӀэ сызыщытхъужыну сытогушхуэ – зэхэщӀыкӀ зимыӀэм хуэдэу сопсалъэ.

²² Ахэр журтхэ? Сэри сыжуртщ. Ахэр израил цӀыхухэ? Сэри сыизраил цӀыхущ. Ахэр Ибрэхьим къытехъукӀа цӀыхухэм ящыщ? Сэри сащыщщ.

²³ Ахэр Мэссихь хуэлажьэрэ? Абыхэм нэхърэ нэхъыбэу сыхуолажьэ – акъыл зимыӀэм хуэдэу сопсалъэ. Абыхэм нэхърэ нэхъыбэрэ сылэжьащ, нэхъыбэри лъэхъуэщым сисащ, цӀыхухэр нэхъыбэри щӀопщкӀэ къызэуащ, ажалым и гъунэгъу нэхъыбэри сыхъуащ.

²⁴ ЩӀопщ уэгъуэ плӀыщӀым зы щыщӀэу журтхэр пӀалъэ-пӀалъэкӀэ тхуэ къызэуащ.

²⁵ Тепщэныгъэ зиӀэ римхэр башкӀэ щэ къызэуащ. ЦӀыхухэм саукӀын щхьэкӀэ, мывэкӀэ зэ къызэуащ, сызэрытӀысхьа кхъухьхэм ящыщу щыр псым щӀилъэфащ, толъкъуным зы жэщрэ зы махуэрэ сыхэлъащ.

²⁶ Гъуэгум куэдрэ сытетащ. Псыхэм сащызэпрыкӀым, шынагъуэм сыхэтащ, хъунщӀакӀуэхэми сахуэзэу, си лъэпкъ щыщхэми сащӀыгъуу, хамэ лъэпкъ щыщхэми сащӀыгъуу, шынагъуэм сыхэтащ; къалэхэми сыдэсу, губгъуэ нэщӀхэми ситу, хыми сытету шынагъуэм сыхэхуащ; къуэш нэпцӀхэми сахэту, шынагъуэм сыхуэхуащ.

²⁷ Куэду сызэрылэжьам сригъэшащ, сымыжейуэ жэщ куэд згъэкӀуащ; сымэжэлӀащ, псыи сыхуэлӀащ, шхын щызмыгъуэт куэдрэ къысхуихуащ; дунейр щыщӀыӀэми, ирикъуну зыщыстӀэгъэн симыӀэу сыщытащ.

²⁸ Ӏуэху псоми нэмыщӀу, члисэ зэхуэс псоми сахуэгузэващ, махуэ къэси согузавэ.

²⁹ Хэт гурэ псэкӀэ лъэкӀыныгъэ имыӀэми, сэ абы сригъусэщ. Хэт гуэныхьым зыӀэпишэми, сэ си гур мафӀэм ис къысщохъу абы щхьэкӀэ.

³⁰ Сызыщытхъужын хъумэ, лъэкӀыныгъэ и лъэныкъуэкӀэ сызэрыгуащӀэмащӀэрщ сызэрызыщытхъужынур.

³¹ Тхьэуэ ди Зиусхьэн Хьисэ Мэссихь и Адэу мыкӀуэдыжын щӀыхьышхуэр зейм пцӀы зэрызмыупсыр ещӀэ.

³² Арет пащтыхьым хуэлажьэ Ӏэтащхьэм и цӀыхухэм саубыдын щхьэкӀэ, Дамаск къалэм и куэбжэхэр яригъэхъумащ.

³³ Ауэ къалэ блыным хэт щхьэгъубжэкӀэ матэм сису си ныбжьэгъухэм сыкърагъэлэлэхри, Ӏэтащхьэм сыкъыӀэщӀэкӀыжащ.