2 Кор. 10 - ХъыбарыфӀыр. ЩӀэдзапӀэр. Уэрэд ЛъапӀэхэр

10-НЭ ЕДЗЫГЪУЭ Паул апостол тепщэныгъэу иӀэр

¹ ЗэрыжыфӀэмкӀэ сэ, Паул, фи пащхьэм сит щыхъукӀэ, сошынэ, ауэ сыфпэжыжьэ щыхъукӀэ, согушхуэ – сэ Мэссихь и гущабагъэрэ и ӀэсагъэкӀэ сыныволъэӀу.

² Мы дунейм и цӀыхухэм яхуэдэу фыщыт, жаӀэурэ дызыгъэкъуаншэ цӀыхухэм фи деж сыныщыкӀуэкӀэ гушхуэныгъэ схэлъу садэгъуэгурыкӀуэну си гум зэрилъым хуэдэу, фэри гушхуэныгъэ хэлъу сыщӀывдэгъуэгурыкӀуэн щыщӀагъэ щывмыгъэӀэну сыныволъэӀу.

³ Сыт щхьэкӀэ жыпӀэмэ мы дунейм дытет пэтми, мы дунейм и цӀыхухэм я гум илъыр ди гум илъу дызауэркъым.

⁴ Ӏэщэу дызэрызауэр мы дунейм и Ӏэщэкъым, бзаджагъэм и быдапӀэхэр зэхакъутэну Тхьэм къыбгъэдэкӀ къару яхэлъщ а Ӏэщэхэм. Гупсысэ пхэнжхэри,

⁵ цӀыхухэм Тхьэр зэращӀэным пэувыну зыкъэзыӀэт пагэныгъэ псори догъэкӀуэд, сыт хуэдэ гуращэри Мэссихь хуэӀурыщӀэну доубыд.

⁶ Фэ фи дэӀуэныгъэр нэсауэ зэрыхъуу, хэт мыдаӀуэми, хуэфащэр едгъэпшыныжыну дыхьэзырщ.

⁷ Фи нэм иубыдыращ флъагъу къудейр. Фэ фщыщ гуэрым и псэм Мэссихь щыщу и фӀэщ хъумэ, апхуэдабзэу дэри ди псэм Мэссихь зэрыщыщым ирегупсыс.

⁸ ФызмыгъэкӀуэдыну, ауэ гурэ псэкӀэ нэхъ лъэкӀыныгъэ фэзгъэгъуэтыну Зиусхьэным къызита тепщэныгъэм теухуауэ куэдыщэкӀэ сызыщытхъужу щӀэздзами, сукӀытэжыркъым.

⁹ Си тхылъхэмкӀэ фызэрызгъэшынэным сыхэт хуэдэу къыфщыхъуну сыхуейкъым.

¹⁰ Сыт щхьэкӀэ жыпӀэмэ зыгуэрым мыпхуэдэу къыжеӀэ: «И тхылъхэмкӀэ пхъашэщ икӀи лъэщщ, ауэ езыр лъэкӀыныгъэ зимыӀэщ, къыжиӀэхэми пщӀэ хуащӀыркъым».

¹¹ Апхуэдэу къыжызыӀэм мыр ирещӀэ: Фи деж дыщымыӀэу ди тхылъхэмкӀэ къыжытӀэр фи деж дыщыщыӀэкӀэ дгъэзэщӀэнущ.

¹² Зи щхьэм щытхъужхэм запытщӀыжыну е захуэдгъэдэну дытегушхуэркъым. Зым адрейм зригъэпщэнри, зыхуигъэдэнри губзыгъагъэкъым.

¹³ Гъунэ имыӀэу дызыщытхъужыну дыхуейкъым, Тхьэм къытхуигъэува Ӏуэхум и гъунапкъэхэми дыфӀэкӀынукъым. А Ӏуэхум и гъунапкъэхэм фэ фитщ.

¹⁴ Дэ диӀэ гъунапкъэхэм дыфӀэкӀыркъым, фи деж дынэмыкӀуэгъами ярейуэ. Мэссихь теухуа хъыбарыфӀыр къыфлъэзыгъэӀэсыну фи деж япэу нэкӀуар дэращ.

¹⁵ Тхьэм къытхуигъэува Ӏуэхум и гъунапкъэхэм я щӀыбкӀэ адрей цӀыхухэм ялэжьа ӀуэхумкӀэ дызыщытхъужыркъым, ауэ фи фӀэщхъуныгъэр нэхъ быдэ хъууэ, фи деж щыдлэжьа Ӏуэхум зызэриубгъуным дыщогугъ, Тхьэм къытхуигъэува гъунапкъэхэм елъытауэ.

¹⁶ Аращи, нэгъуэщӀ цӀыхум иӀэ гъунапкъэхэм щилэжьа ӀуэхумкӀэ дызыщымытхъужу, фи щӀыбкӀэ щыӀэ хэкухэми хъыбарыфӀыр цӀыхухэм щалъэдгъэӀэсынущ.

¹⁷ Ауэ зым зыр щытхъужмэ, Зиусхьэнымрэ абы илэжьамрэ щретхъу.

¹⁸ Сыт щхьэкӀэ жыпӀэмэ зи щхьэм щытхъужыракъым Зиусхьэным ищтэр, атӀэ езы Зиусхьэныр зыщытхъуращ.