1 Мусэ 9 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Тхьэм и нэфӀ Нухьрэ абы и къуэхэмрэ ящыхуэри, яжриӀащ абыхэм: – Фылъхуэ-фыпӀэ, фыбагъуэ, щӀылъэм тез фыхъу.

² – Къыфщышынэнущ икӀи къыфхуэкӀэзызынущ щӀылъэм тет хьэкӀэкхъуэкӀэ псори, уэгум ит къуалэбзу псори, щӀылъэм щызекӀуэ псори, хым хэс бдзэжьей псори; фи ӀэмыщӀэ ихуащ ахэр.

³ Псэууэ зекӀуэ псори фхуэхъунущ шхын; удз щхъуантӀэр зэрывэстам хуэдэу фызот ахэр фэ.

⁴ Ауэ лъы зыхэлъ лы фымышх, ар абы и псэращи.

⁵ Зыгуэрым цӀыху иукӀмэ, згъэпшынэнущ, хьэкӀэкхъуэкӀэми цӀыхур иукӀмэ, згъэпшынэнущ.

⁶ Хэт цӀыхум илъ игъажэми, абы и лъыр цӀыхурщ зыгъэжэнур, цӀыхур Тхьэм езым и теплъэу къигъэщӀащи.

⁷ – АтӀэ фэ фылъхуэ-фыпӀэ, фыбагъуэ, икӀи тез фыхъу щӀылъэм, икӀи икъукӀэ фыщыбагъуэ абдежым.

⁸ ЯжриӀащ Тхьэм Нухьи абы и къуэхэми:

⁹ – Мис, Сэ фэри иужькӀэ къыфтехъукӀыну щӀэблэхэми зэгурыӀуэныгъэ фызощӀылӀэ,

¹⁰ фэ фи гъусэу псэ зыпыт дэтхэнэми, къуалэбзухэми, Ӏэщхэми, щӀым тету фи гъусэ хьэкӀэкхъуэкӀэ псоми, кхъухьым къикӀа псоми, щӀылъэм тет псэущхьэ псоми зэгурыӀуэныгъэ язоухылӀэ;

¹¹ Си зэгурыӀуэныгъэ фызоухылӀэ: псэ зыпыт дэтхэнэри дяпэкӀэ псыдзэм зэи зэрыхэзмыгъэкӀуэдэнумкӀэ, икӀи щӀылъэр изылъэсыкӀын псыдзэ зэи зэрыщымыӀэжынумкӀэ.

¹² ЖиӀащ Тхьэм итӀанэ: – Сэ фэри, фэ къыфщӀыгъуу псэ зыпыт дэтхэнэми, къэхъуну щӀэблэхэри къыхиубыду, зэгурыӀуэныгъэ фэзухылӀэр къэзыгъэпэж нэщэнэр мис:

¹³ Сэ хызолъхьэ Си лэгъупыкъур пшэм, ар Сэрэ щӀылъэмрэ дякум дэлъ зэгурыӀуэныгъэм и нэщэнэу щытын папщӀэ.

¹⁴ Сэ щӀылъэм пшэ нытезгъэхьэмэ, а пшэм къыщылъэгъуэнущ лэгъупыкъур.

¹⁵ КъэкӀыжынущ итӀанэ си гум фэри псэ зыпыт адрей псоми зэгурыӀуэныгъэу фэзухылӀауэ щытар; псыр зэи къиужынукъым, сыт хуэдэ псэ зыпытри хэмыкӀуэдэн папщӀэ.

¹⁶ Лэгъупыкъури хэтынущ пшэм, Сэри ар къэслъагъуурэ сигу къэкӀыжынущ Сэрэ дэтхэнэ псэ зыпыту щӀылъэм тетымрэ ди зэхуакум дэлъ мыкӀуэдыжын зэгурыӀуэныгъэр.

¹⁷ ЖриӀащ Тхьэм Нухь адэкӀэ: – Аращ Сэрэ дэтхэнэ псэ зыпыту щӀылъэм тетымрэ ди зэхуакум Сэ дэзгъэува зэгурыӀуэныгъэм и нэщэнэр.

Чэф хъуа Нухьрэ и къуэхэмрэ

¹⁸ Нухь и къуэхэу кхъухьым къикӀыжауэ щытахэр Щэм, Хъам, Ефэт сымэт. Хъам КъэнаӀан и адэт.

¹⁹ Щыри Нухь и къуэт, абыхэм къатепщӀыкӀыжащ щӀылъэм щыпсэу псори.

²⁰ Нухь щӀым телэжьыхьу щӀидзэри игъэтӀысащ жызум хадэ.

²¹ Абы санэ ирифри чэф хъуауэ щӀэлът и шэтырым пцӀанэу.

²² Къилъэгъуащ Хъам, КъэнаӀан и адэм, и адэр зэрыпцӀанэр, икӀи къыщӀэкӀыжри яжриӀэжащ и къуэшитӀым.

²³ Щэмрэ Ефэтрэ щыгъын къащтэщ, я дамэм тралъхьэри, щӀыбкӀэ икӀуэтурэ щӀыхьэри я адэр щӀахъумащ; ахэр лъэныкъуэкӀэ къэгъэзати, ялъэгъуакъым я адэр зэрыпцӀанэр.

²⁴ Нухь санэм кърита чэфыр пкърыкӀыжауэ къэушри къищӀащ и къуэ нэхъыщӀэм кърищӀар;

²⁵ ЖиӀащ абы итӀанэ: – Тхьэм и ней КъэнаӀан къыщыхуэ; и къуэшхэм я пщылӀхэм я пщылӀыж хъунущ ар.

²⁶ ИтӀанэ жиӀащ: – Зиусхьэну Щэм зыхуэлажьэ Тхьэм щӀыхьыр ейщ! КъэнаӀан абы и пщылӀ ирехъу.

²⁷ Ирегъэбагъуэ Тхьэм Ефэт, икӀи щӀретӀысхьэ ар Щэм и шэтырхэм; ауэ КъэнаӀан абы и пщылӀ ирехъу.

²⁸ Псыдзэм и ужькӀэ псэуащ Нухь илъэс щищрэ тхущӀкӀэ.

²⁹ Нухь, илъэс щибгъурэ тхущӀрэ къигъэщӀа нэужь, дунейм ехыжащ.