1 Мусэ 7 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ ЖриӀащ Зиусхьэным Нухь: – Фихьэ уэри уи унагъуэри кхъухьым; сыт щхьэкӀэ жыпӀэмэ уэращ Си дежкӀэ пэжыгъэ зезыхьэу нобэрей цӀыхухэм яхэслъэгъуар.

² Здэщтэ сыт хуэдэ псэущхьэ къабзэми щыщу блырыбл, зэхъузэбзу, псэущхьэ мыкъабзэм щыщу тӀурытӀ, зэхъузэбзу.

³ Апхуэдэуи къуалэбзухэм ящыщу блырыбл, ахэри зэхъузэбзу, абыхэм я лъэпкъыр щӀылъэ псом къытенэн папщӀэ.

⁴ – Сыт щхьэкӀэ жыпӀэмэ махуибл дэкӀмэ, Сэ ескӀыхынущ щӀылъэм уэшхыр махуэ плӀыщӀрэ жэщ плӀыщӀкӀэ; икӀи тезгъэкӀуэдыкӀынущ щӀыгум Сэ къэзгъэщӀауэ щыӀэ псэущхьэ псори.

⁵ Нухь игъэзэщӀащ Зиусхьэным къыхуигъэува унафэ псори.

Тхьэм и тезыр – псыдзэр

⁶ Нухь илъэс щих хъурт псыдзэм щӀылъэр щызэщӀищтам щыгъуэ.

⁷ Псыдзэм хэмыхуэн папщӀэ, Нухь и къуэхэри, и фызри, и къуэхэм я фызхэри щӀыгъуу кхъухьым ихьащ.

⁸ Псэущхьэ къабзэхэми псэущхьэ мыкъабзэхэми ящыщу, бзухэми, хьэпщхупщ псоми ящыщу

⁹ тӀурытӀ, псори зэхъузэбзу, ихьащ кхъухьым, Тхьэм Нухь къызэрыхуигъэувам тету.

¹⁰ Махуибл дэкӀри, псыдзэр къиуащ щӀылъэм.

¹¹ Нухь илъэс щих щыхъуа гъэм и етӀуанэ мазэм, епщыкӀубланэ махуэм къызэрыкӀащ щыхупӀэ лъащӀэншэ абрагъуэм и къиупӀэу хъуар, зэӀукӀащ уафэ щхьэгъубжэхэри.

¹² Тешхащ щӀылъэм уэшхыр махуэ плӀыщӀрэ жэщ плӀыщӀкӀэ.

¹³ А махуэ дыдэм ихьащ кхъухьым Нухьи и къуэхэу Щэми, Хъами, Ефэти, Нухь и фызри, и къуэхэм я фызищри я гъусэу.

¹⁴ Ахэр кхъухьым ихьащ хьэкӀэкхъуэкӀэ псори езыхэм я лъэпкъыу, сыт хуэдэ Ӏэщхэри езыхэм я лъэпкъыу, хьэпщхупщ псори езыхэм я лъэпкъыу, лъатэ псори езыхэм я лъэпкъыу, къуалэбзу псори, дамэ зытет псори я гъусэу.

¹⁵ Ихьащ Нухь и кхъухьым псэ зыӀут псэущхьэ лӀэужьыгъуэу щыӀэу хъуам щыщу тӀурытӀ.

¹⁶ Аращи, сыт хуэдэ псэущхьэми щыщу хъурэ бзырэ ихьащ кхъухьым Тхьэм Нухь къазэрыхуигъэувам тету. ИтӀанэ Зиусхьэным кхъухьым и бжэр абыхэм якӀэлъыхуищӀыжащ.

¹⁷ Псыдзэр телъэдащ щӀылъэм махуэ плӀыщӀкӀэ, псым къыхэхъуэурэ кхъухьыр иӀэтри ар щӀылъэм теӀэтыкӀа хъуащ.

¹⁸ Псыр нэхъ хуабжь хъу зэпытт икӀи икъукӀэ зыщиубгъурт щӀылъэм; кхъухьыр щесырт псы щӀыӀум.

¹⁹ Псыдзэр апхуэдизкӀэ егъэлеяуэ щӀылъэм хуабжь щыхъуати, щӀылъэм псыри уафэ псом и щӀагъ щӀэт бгы лъагэ псори щӀихъумащ абы.

²⁰ ӀэфракӀэ пщыкӀутхукӀэ абыхэм я щхьэм псым зыщиӀэтри, бгыхэр щӀигъэнащ.

²¹ ХэкӀуэдащ щӀылъэм щызекӀуэ псэущхьэу хъуари, къуалэбзухэри, Ӏэщри, хьэкӀэкхъуэкӀэхэри, щӀылъэм къыщызыпщыхь псэущхьэу хъуари, цӀыху псори.

²² ЩӀыгу гъущэм тету гъащӀэ зиӀэр хэкӀуэдащ.

²³ КӀуэдащ щӀыгу щхьэфэм тета сыт хуэдэ псэущхьэри; цӀыхум къыщыщӀэдзауэ хьэкӀэкхъуэкӀэхэми, Ӏэщми, хьэпщхупщхэми, къуалэбзухэми нэсу, псори текӀуэдыкӀащ щӀылъэм: къэнар Нухь закъуэрэ абы и гъусэу кхъухьым ихьахэмрэщ.

²⁴ Псыдзэр щӀылъэм нэхъ хуабжь щыхъу зэпыту екӀуэкӀащ махуищэрэ щэ ныкъуэрэ хуэдизкӀэ.