1 Мусэ 6 - ХъыбарыфӀыр. ЩӀэдзапӀэр. Уэрэд ЛъапӀэхэр

Тхьэм и къуэхэмрэ цӀыху абрагъуэхэмрэ

¹ ЦӀыхум щӀылъэм щыбагъуэу щӀадзащ. Абыхэм пхъухэр къахуэхъурт.

² Тхьэм и къуэхэм къалъэгъуащ цӀыхухэм япхъухэр зэрыдахэр, икӀи ящтэрт ахэр я фызхэу, щхьэж къызэрыхихкӀэ.

³ ЖиӀащ Зиусхьэным: – ЦӀыхухэр игъащӀэкӀэ псэуну хуит сщӀынукъым, сыт щхьэкӀэ жыпӀэмэ абыхэм лӀэныгъэ къащӀэлъщ; ирехъу абыхэм я гъащӀэ махуэхэр илъэсищэрэ тӀощӀрэ.

⁴ А зэманми абы и ужькӀи щӀым тетт цӀыху абрагъуэхэр, Тхьэм и къуэхэр цӀыхухэм япхъухэм я деж щӀыхьэу, ахэр яхуэлъхуэу щыхуа зэманым. Ахэр цӀыху лъэщхэт, ижь-ижьыж лъандэрэ цӀыху щэджащэхэт.

ЦӀыхухэм я гуэныхьымрэ пэжыгъэ зиӀэ Нухьрэ

⁵ Къилъэгъуащ Зиусхьэным щӀылъэм тет цӀыхухэм я бзаджагъэр зэрыин дыдэр; абыхэм я гум илъхэри я мурадхэри сыт щыгъуэ зэманми зэрыӀейр.

⁶ Арати, хущӀегъуэжащ Зиусхьэныр щӀылъэм цӀыхур къызэрыщигъэщӀам, икӀи и гум щӀыхьэжащ ар.

⁷ ЖиӀащ Зиусхьэным: – ТезгъэкӀуэдыкӀынщ щӀылъэм Сэ къэзгъэщӀа цӀыхухэр, хьэкӀэкхъуэкӀэхэри, Ӏэщхэри, хьэпщхупщхэри, уэгум щызелъатэхэри згъэкӀуэдынщ; сыт щхьэкӀэ жыпӀэмэ Сэ сыхущӀегъуэжащ ахэр къызэрызгъэщӀам.

⁸ Ауэ Зиусхьэныр нэфӀкӀэ къеплъащ Нухь.

⁹ Мис Нухь и хъыбарыр: Нухь мыхъумыщӀагъэ лъэпкъ зыхэмылъ цӀыху пэжу а зэманым псэу цӀыхухэм яхэтащ; щыпкъагъэкӀэ Тхьэм хуэпсэущ Нухь.

¹⁰ Къыхуэхъуащ абы къуищ: Щэт, Хъам, Ефэт сымэ.

¹¹ АрщхьэкӀэ дуней цӀыхухэр зэхэуцӀэпӀа хъуащ Тхьэм дежкӀэ, ем зэщӀищтащ дунейр.

¹² Теплъащ Тхьэр щӀылъэм – зэхэуцӀэпӀащ ар: щӀылъэм тет дэтхэнэ зы цӀыхуми и гъуэгур зэӀигъэхьэжати.

¹³ ЖриӀащ Тхьэм Нухь: – ЩӀылъэм тет цӀыху псоми кӀэух яхуэсщӀыну гухэлъ сиӀэщ, абыхэм къабгъэдэкӀ ем дунейр зэщӀищтащи. ЗгъэкӀуэдынущ иджы цӀыхухэр щӀылъэм щӀыгъуу.

¹⁴ – Гофер жыгым къыхэщӀыкӀи, ухуэ кхъухь уи щхьэм папщӀэ; кхъухьыр зэпрыхукӀ пэш щхьэхуэ-щхьэхуэхэу, и кӀуэцӀи и щӀыфи мэзыш щыхуэ.

¹⁵ Ухуэ ар мыпхуэдэу: кхъухьым и кӀыхьагъыр ӀэфракӀэ щищу; и бгъуагъыр ӀэфракӀэ тхущӀу, и лъагагъыр ӀэфракӀэ щэщӀу.

¹⁶ ХуэщӀ кхъухьым гъуанэ, зы ӀэфракӀэкӀэ ищхьэкӀэ дэхьеяуэ, бжэи хэлъхьэ кхъухьым и бгъумкӀэ; щыухуэ абы и лъащӀэӀуэкӀэ етӀуанэ, ещанэ къату псэупӀэхэр.

¹⁷ ТезутӀыпщхьэнущ Сэ щӀылъэм псыдзэшхуэ, псэ зыӀуту уафэ щӀагъым щыщыӀэ псэущхьэ псори згъэкӀуэдын папщӀэ; щӀылъэм щыщыӀэ псоми я гъащӀэр абдеж щаухынущ.

¹⁸ – Ауэ зэгурыӀуэныгъэ Сэрэ уэрэ ди зэхуакум дэслъхьэнурэ уихьэнущ уэ кхъухьым, уи къуэхэри, уи фызри, уи къуэхэм я фызхэри пщӀыгъуу.

¹⁹ Ишэ апхуэдэуи кхъухьым псэущхьэ псоми ящыщу тӀурытӀ, ахэр уи гъусэу псэууэ къэнэн папщӀэ; зэхъузэбзу щрет ахэр.

²⁰ Къуалэбзухэм ящыщ, Ӏэщхэм ящыщ, щӀылъэм къыщызыпщыхьхэми ящыщ, а псори езыхэм я лъэпкъыу, псоми ящыщу тӀурытӀ нихьэнущ уи деж, псэууэ къэнэн папщӀэ.

²¹ Яшх хабзэ шхыныгъуэр къыздэщтэ, гъэтӀылъ, ар фхуэхъунщ уэри абыхэми шхын.

²² ИгъэзэщӀащ Нухь а псори; Тхьэм унафэ къызэрыхуищӀам хуэдэу ищӀащ.