1 Мусэ 5 - ХъыбарыфӀыр. ЩӀэдзапӀэр. Уэрэд ЛъапӀэхэр

Ӏэдэмрэ абы къытехъукӀахэмрэ я хъыбар

¹ Тхьэм цӀыхур къыщигъэщӀам, Тхьэм ещхьыну ар къигъэхъуащ.

² ЦӀыхухъурэ бзылъхугъэу ахэр къигъэщӀащ, и нэфӀ абыхэм ящыхуэри ахэр къыщигъэщӀа махуэм цӀэуэ цӀыху яфӀищащ абыхэм.

³ Ӏэдэм, илъэсищэрэ щэщӀкӀэ псэуауэ, къыхуэхъуащ къуэ, езым и теплъэ иӀэу, езым ещхьу, цӀэуэ фӀищащ абы: Щэт.

⁴ Щэт къыхуалъхуа нэужь, Ӏэдэм илъэс щий къигъэщӀащ, къыщӀэхъуащ абы къуэхэмрэ пхъухэмрэ.

⁵ Ӏэдэм къигъэщӀащ илъэс щибгъурэ щэщӀрэ; итӀанэ ари дунейм ехыжащ.

⁶ Щэт, илъэсищэрэ тхукӀэ псэуауэ, Енощ къыхуэхъуащ.

⁷ Енощ къалъхуа нэужь, Щэт псэужащ илъэс щийрэ блыкӀэ, икӀи къыхуэхъуащ къуэхэри пхъухэри.

⁸ Щэт къигъэщӀащ илъэс щибгъурэ пщыкӀутӀрэ; итӀанэ ари лӀащ.

⁹ Енощ, илъэс бгъущӀкӀэ псэуауэ, Къэнан къыхуэхъуащ.

¹⁰ Къэнан къалъхуа нэужь, Енощ псэужащ илъэс щийрэ пщыкӀутхукӀэ, икӀи къыхуэхъуащ къуэхэри пхъухэри.

¹¹ Енощ къигъэщӀащ илъэс щибгъурэ тхурэ; итӀанэ ари лӀащ.

¹² Къэнан, илъэс блыщӀкӀэ псэуауэ, Махъалалэл къыхуэхъуащ.

¹³ Махъалалэл къалъхуа нэужь, Къэнан псэужащ илъэс щийрэ плӀыщӀкӀэ, икӀи къыхуэхъуащ къуэхэри пхъухэри.

¹⁴ Къэнан къигъэщӀащ илъэс щибгъурэ пщӀырэ; итӀанэ ари лӀащ.

¹⁵ Махъалалэл, илъэс хыщӀрэ тхукӀэ псэуауэ, Ерэд къыхуэхъуащ.

¹⁶ Ерэд къалъхуа нэужь, Махъалалэл псэужащ илъэс щийрэ щэщӀкӀэ, икӀи къыхуэхъуащ къуэхэри пхъухэри.

¹⁷ Махъалалэл къигъэщӀащ илъэс щийрэ бгъущӀрэ тхурэ; итӀанэ ари лӀащ.

¹⁸ Ерэд, илъэсищэрэ хыщӀрэ тӀукӀэ псэуауэ, Хъанох къыхуэхъуащ.

¹⁹ Хъанох къалъхуа нэужь, Ерэд псэужащ илъэс щийкӀэ, икӀи къыхуэхъуащ къуэхэри пхъухэри.

²⁰ Ерэд къигъэщӀащ илъэс щибгъурэ хыщӀрэ тӀурэ, итӀанэ ари лӀащ.

²¹ Хъанох, илъэс хыщӀрэ тхукӀэ псэуауэ, Матущэлахъ къыхуэхъуащ.

²² Матущэлахъ къалъхуа нэужь, илъэс щищкӀэ Хъанох Тхьэм щыпкъагъэкӀэ хуэпсэуащ икӀи къыхуэхъуащ къуэхэри пхъухэри.

²³ Хъанох къигъэщӀащ илъэс щищрэ хыщӀрэ тхурэ.

²⁴ Апхуэдизрэ хуэпсэуащ Хъанох Тхьэм; итӀанэ щымыӀэж хъуащ ар, Тхьэм иштэжати.

²⁵ Матущэлахъ, илъэс щищрэ блыкӀэ псэуауэ, Лэмэх къыхуэхъуащ.

²⁶ Лэмэх къалъхуа нэужь, Матущэлахъ псэужащ илъэс щиблрэ ищӀрэ тӀукӀэ, икӀи къыхуэхъуащ къуэхэри пхъухэри.

²⁷ Матущэлахъ къигъэщӀащ илъэс щибгъурэ хыщӀрэ бгъурэ; итӀанэ ари лӀащ.

²⁸ Лэмэх, илъэсищэрэ ищӀрэ тӀукӀэ псэуауэ, къуэ къыхуэхъуащ.

²⁹ Нухь цӀэуэ фӀищащ абы, мыр жиӀэри: «Абы дигъэтыншыжынщ ди ӀуэхукӀи Зиусхьэным нэлат зриха щӀыгум телэжьэнымкӀи».

³⁰ Нухь къалъхуа нэужь, илъэс щитхурэ бгъущӀрэ тхукӀэ псэужащ Лэмэх икӀи къыхуэхъуащ къуэхэри пхъухэри.

³¹ Лэмэх къигъэщӀащ илъэс щиблрэ блыщӀрэ блырэ; итӀанэ ари лӀащ.

³² Нухь, илъэс щитху хъуауэ, къыхуэхъуащ Щэм, Хъам, Ефэт сымэ.