1 Мусэ 49 - ХъыбарыфӀыр. ЩӀэдзапӀэр. Уэрэд ЛъапӀэхэр

Екъуб и нэфӀ и къуэхэм зэращигъэхуамрэ ар зэрылӀамрэ

¹ Арати, Екъуб и къуэхэр къриджэри, яжриӀащ: – Фыкъызэхуэс, къэкӀуэну махуэхэм къыфщыщӀынур вжесӀэнущ.

² Фыкъызэхуэси, фыкъедэӀу, Екъуб и къуэхэ, федэӀу Израил, фи адэм!

³ Рубэн, си щыпэлъху! Уэ узибыдапӀэщ, си цӀыхухъу къарум урищӀэдзапӀэщ. ЩӀыкӀи лъэщыгъэкӀи псоми уращхьэщ.

⁴ Ауэ уэ псы къиуам ещхь ухъуащ, уефӀэкӀынукъым абыхэм. Сыт щхьэкӀэ жыпӀэмэ уилъащ уи адэм и гъуэлъыпӀэм; уэ буцӀэпӀащ си гъуэлъыпӀэр, абы уигъуалъхьэри.

⁵ ЩымӀонрэ Лэуийрэ зэшщ, гущӀэгъуншагъэм и Ӏэщэщ абыхэм я джатэхэр.

⁶ Абыхэм я чэнджащэ сыхыхьэркъым, я зэхуэсым сыхэлажьэркъым. Сыт щхьэкӀэ жыпӀэмэ ахэр щыгубжькӀэ, цӀыху яукӀ, езыхэм я щхьэзыфӀэфӀыгъэкӀэ зэпаупщӀ танэм и хуэхэр.

⁷ Нэлат ялъысащ абыхэм я губжьым, сыт щхьэкӀэ жыпӀэмэ гущӀэгъуншэти; я къанлыгъэми нэлат ялъысащ, сыт щхьэкӀэ жыпӀэмэ ябгэти; щызэхэзгъэкӀынущ ахэр Екъуб и хэкум, Израил хэкум щызэбгрызгъэкӀынущ ахэр.

⁸ Иудэ, уэ къыпщытхъунущ уи къуэшхэр! Уэ уи Ӏэр уи бийхэм я пщэм телъщ; щхьэщэ къыпхуащӀынущ уи адэм и къуэхэм.

⁹ Аслъэн шыру Иудэр, си къуэр, щакӀуэ къокӀыж, къищэкӀуар ишхауэ. ЗригъэщӀащ абы, гъуэлъащ, аслъэныхъумрэ аслъэныбзымрэ хуэдэу: хэт къигъэушын ар?

¹⁰ БгъэдэкӀынукъым тепщэныгъэ башыр Иудэ икӀи пщы башыр абы и къуэхэм, тыгъэ къыхуащӀыурэ, цӀыху лъэпкъхэри абы и жыӀэм едэӀуэнущ.

¹¹ Абы ирепх жызумыпкъым езым и шыд джылур, жызумыпкъэ нэхъыфӀми – езым и шыдыбзым къилъхуар. ЕтхьэщӀ санэкӀэ и щыгъыныр, жызум Ӏэрамэхэм ялъкӀэ – езым и щыгъыныр.

¹² Егъэлыд абы и нэр санэм, хужь ещӀ и дзэр шэм.

¹³ Зэбулун щыпсэунущ хы Ӏуфэм, кхъухь тедзапӀэм, абы и гъунапкъэхэри нос Сидон къалэм.

¹⁴ Иссашхар псы дэжыпӀэхэм я зэхуакум дэлъ шыд лъэщт, лъэрызехьэт. Иссашхар – ар шыд къарууфӀэу хьэлъэ телъхэм яку дэлъ шыд лъэшщ.

¹⁵ ЗыхищӀащ абы гупсэхужыпӀэр зэрыфӀыр, щӀыгур зэрыгурыхьыр, и плӀэм хьэлъэр ирилъхьэри, щӀидзащ лэжьэн пщылӀым хуэдэу.

¹⁶ Дан езым и лъэпкъым хьэкум трищӀэнущ, Израил и лӀакъуэхэм ящыщ зыуэ.

¹⁷ Дан хъунущ гъуэгум телъ блэ, лъагъуэм телъу, шур щӀыбкӀэ къригъэхуэхын папщӀэ, шы лъакъуэм еуэ блэ.

¹⁸ СымыкӀуэду сыкъебгъэлыну сыпщогугъ, Зиусхьэн!

¹⁹ Гад къытебэнэнущ хъунщӀакӀуэхэр, ауэ абы ахэр иригъэкӀуэтыжынурэ кърихуэкӀынущ.

²⁰ Ащэр дежкӀэ бэвыщэщ абы и гъавэр, икӀи абы пащтыхьым хуишэнущ шхын Ӏэфхэр.

²¹ Нафталий къурш бжэн зэкӀужщ; абы и шыр дахэщ.

²² Исуф куэд къызыпыкӀэ жыгым и къудамэщ, псы къыщӀэжыпӀэм щхьэщыту куэд къызыпыкӀэ жыгым и къудамэщ, абы и къудамэхэм зыщаукъуэдиящ блыныщхьэм.

²³ И жагъуэ ящӀащ абы, шабзэшэкӀэ еуащ абы, шабзауэхэри къебиящ абы.

²⁴ Ауэ шэщӀауэ къэнащ абы и шабзэр, икӀи ткӀийщ абы и Ӏэ лыпцӀэхэр, Екъуб и Тхьэ лъэщым и хьэтыркӀэ. Езыращ Ӏэхъуэри Израил къэзыхъумэ мывэбгри.

²⁵ Уи адэм и Тхьэр уэ къыбдэӀэпыкъунущ. Псори ЗыхузэфӀэкӀыр Езыращ. Абы и нэфӀ къыпщигъэхуэнущ, ипщэкӀэ щыӀэ уафэм къикӀ фӀыгъэхэмкӀэ и нэфӀ къыпщигъэхуэнущ, ищӀагъыкӀэ щыӀэ кууупӀэм и фӀыгъэхэмкӀи, былымрэ бынымрэ я фӀыгъэхэмкӀи Абы и нэфӀ къыпщигъэхуэнущ.

²⁶ ИгъущӀэкӀэ бгыжьхэм я лъагагъэрэ мысэхыж Ӏуащхьэхэм я гуакӀуагъэмрэ ящхьэщыкӀыж уи адэм и нэфӀ къыплъигъэс. Трелъ ахэр Исуф и щхьэм икӀи зэкъуэшхэм ящыщу къыхахам и натӀэм.

²⁷ Биниамин дыгъужь хьэщхьэрыӀуэщ, пщэдджыжьым ешх къиубыдар икӀи пщыхьэщхьэм егуэш къуентхъыр.

²⁸ Мис Израил и лӀакъуэ пщыкӀутӀыр зэрыщыту; мис абыхэм я адэм къажриӀари; и нэфӀ ящигъэхуащ абыхэм, къалъигъэсащ и нэфӀ щыхуэныгъэр, щхьэж езым ейр.

²⁹ ИкӀи унафэ яхуищӀащ Екъуб абыхэм, мыр яжриӀэу: – Сэ сыхогъуэлъхьэж си лъэпкъым; сыщыщӀэфлъхьэж си адэхэм я деж бгъуэнщӀагъым, хет цӀыху Ефрон и губгъуэм деж щыӀэм.

³⁰ Ханаан щӀыналъэм деж Мамрэ къыщыпэщылъ Махпэлэ губгъуэм ит бгъуэнщӀагъыращ ар. А бгъуэнщӀагъыр губгъуэм щӀыгъуу Ибрэхьим хет цӀыху Ефрон деж къыщищэхуащ, езыр щыщӀалъхьэжын папщӀэ.

³¹ Абдежым щыщӀалъхьэжащ Ибрэхьимрэ абы и фыз Сарэрэ; абдежым щыщӀалъхьэжащ Исхьэкърэ абы и фыз Ребеккэрэ; щыщӀэслъхьэжащ абдежым Леа.

³² А губгъуэри абы ит бгъуэнщӀагъри къыщащэхуащ хет цӀыхухэм я деж.

³³ Екъуб и къуэхэм яхуищӀ унафэр иухри, ирилъхьэжащ и лъакъуэхэр гъуэлъыпӀэм, дунейм ехыжри, хыхьэжащ езым и лъэпкъым.