1 Мусэ 47 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Арати, Исуф кӀуэри, хъыбар иригъэщӀащ фирхьэуным, мыр жиӀэурэ: – Си адэри, си къуэшхэри, я Ӏэщ цӀыкӀуи я Ӏэщышхуи, нэгъуэщӀ сыт яӀэми, псори къыздащтэри къикӀащ Ханаан щӀыналъэм; иджы ахэр щыӀэщ Гощэн щӀыналъэм.

² Исуф и къуэшхэм ящыщу цӀыхуитху здишэри, ахэри иригъэлъэгъуащ фирхьэуным.

³ ЕупщӀащ фирхьэуныр абы и къуэшхэм: – Сыт фи ӀэщӀагъэ? – Дымэлыхъуэщ уи унэӀутхэр, дэри ди адэхэри, – жраӀащ абыхэм фирхьэуным.

⁴ Абыхэм фирхьэуным жраӀащ адэкӀи: – Дэ дыкъэкӀуащ мы щӀыналъэм дыщыпсэуну, сыт щхьэкӀэ жыпӀэмэ щыӀэкъым хъупӀэхэр уи унэӀутхэм я Ӏэщхэм папщӀэ Ханаан щӀыналъэм, гъаблэ ткӀий зэрыщыӀэм къыхэкӀкӀэ. Аращи, хуит дыщӀ уи унэӀутхэр Гощэн щӀыналъэм дитӀысхьэну.

⁵ Фирхьэуным Исуф къыжриӀащ абдеж: – Уи адэри уи къуэшхэри уи деж къэкӀуащ.

⁶ Мысыр щӀыналъэр уи пащхьэ илъщ; щӀыналъэм и щӀыпӀэ нэхъыфӀым деж щыгъэтӀыс уи адэри уи къуэшхэри; щрепсэу ахэр Гощэн щӀыналъэм. Абыхэм зэфӀэкӀ зиӀэ яхэтмэ, пэрыгъэувэ ахэр си Ӏэщым, кӀэлъыплъыну.

⁷ ИтӀанэ Исуф и адэ Екъуб къишэри иригъэлъэгъуащ ари фирхьэуным; икӀи Тхьэм и нэфӀ щыхуэну Екъуб фирхьэуным хуелъэӀуащ.

⁸ Фирхьэуным Екъуб жриӀащ: – Сыт уи ныбжь?

⁹ Екъуб фирхьэуным жриӀащ: – Сэ дунейм сызэрытетрэ мэхъу илъэсищэрэ щэщӀрэ; мащӀэщ икӀи насыпыншэщ си гъащӀэ махуэхэр, нэсакъым ахэр си адэхэм къапсэуа гъащӀэм.

¹⁰ Тхьэм и нэфӀ къыщыхуэну Екъуб фирхьэуным хуелъэӀури, къыщӀэкӀыжащ фирхьэуным деж.

¹¹ Арати, увыпӀэ яхуищӀащ Исуф и адэми и къуэшхэми, щаритащ абыхэм щӀапӀэ Мысыр щӀыналъэм и Ӏыхьэ нэхъыфӀ дыдэ РаӀымэсэс щӀыналъэм, фирхьэуным унафэ зэрищӀам тету.

¹² ИгъэнщӀырт Исуф гъавэкӀэ езым и адэри, и къуэшхэри, и адэм и унагъуэ псори, дэтхэнэ унагъуэм сабий исым я бжыгъэм елъытауэ.

Мысырым гъаблэ къызэрыщыхъуар

¹³ ЩыӀэтэкъым гъавэ щӀылъэ псом; гъаблэр икъукӀэ ткӀий хъуат, икӀи тхьэмыщкӀагъуэр къалъысат гъаблэм къыхэкӀыу Мысыр щӀыналъэми Ханаан щӀыналъэми.

¹⁴ ЦӀыхухэм гъавэ къыщащэхуурэ, Исуф зэхуихьэсащ Мысыр щӀыналъэми Ханаан щӀыналъэми илъ дыжьыну хъуар, щӀихьащ Исуф дыжьыныр фирхьэун унэм.

¹⁵ Арати, дыжьыныр щаухащ Мысыр щӀыналъэми Ханаан щӀыналъэми. Дыжьыныр щаухым, мысыр цӀыху псори кӀуащ Исуф деж: – Къыдэт гъавэ, – жаӀэри, – сыт дэ уи пащхьэ дыщылӀэн щӀыхъуейр, ди дыжьыныр зэрыдухам папщӀэ?

¹⁶ – Фи Ӏэщыр къэфхуи, – жиӀащ Исуф, – фэстынщ фи Ӏэщым и уасэу гъавэ, дыжьыныр фыухамэ.

¹⁷ Арати, къахурт абыхэм я Ӏэщыр Исуф деж; яритырт Исуфи гъавэр шыхэми, Ӏэщ цӀыкӀу хъушэхэми, Ӏэщышхуэ хъушэхэми, шыдхэми я уасэу; а гъэм апхуэдэурэ игъэнщӀащ ахэр гъавэкӀэ, я Ӏэщыр къаӀрихыурэ.

¹⁸ ДэкӀащ а гъэр; адрей илъэсми къакӀуэри, къыжраӀащ абы: – ЩыдбзыщӀынкъым ди зиусхьэным ди дыжьыныр зэрыдухар, ди Ӏэщ хъушэхэри уэ, ди зиусхьэным, къыпӀэщӀыхьащ; зыри къыщытхуэнэжакъым ди зиусхьэным и пащхьэм, ди щхьэмрэ ди щӀыгухэмрэ мыхъумэ.

¹⁹ Сыт уи пащхьэм дыщыкӀуэдын щӀыхуейр дэ, дэри ди щӀыгухэри? Дыщэху дэри ди щӀыгухэри гъавэкӀэ; икӀи дэри ди щӀыгухэри фирхьэуным унэӀут дыхуэхъунщ, ауэ уэ къыдэт жылэ, дэ дымылӀэу дыпсэун, щӀылъэри нэщӀ мыхъун папщӀэ.

²⁰ Къищэхуащ Исуф Мысыр щӀыналъэ псори фирхьэуным папщӀэ. Ящэжащ мысыр цӀыхухэм щхьэж и губгъуэр, гъаблэ къазэрытехъуам къыхэкӀыу. Апхуэдэ щӀыкӀэкӀэ лъысащ щӀыгур фирхьэуным.

²¹ ИщӀащ абы лъэпкъыр унэӀут, Мысырым и зы гъунэм къыщыщӀэдзауэ адрей гъунэм нэсу.

²² Тхьэгъэпсхэм я закъуэщ зи щӀыгу къимыщэхуар, сыт щхьэкӀэ жыпӀэмэ фирхьэуным абыхэм яритауэ яӀэт гъавэ Ӏыхьэ, икӀи ахэр ирипсэурт фирхьэуным ярита гъавэ Ӏыхьэм; абы къыхэкӀыуи ящакъым я щӀыгур.

²³ ЯжриӀащ Исуф цӀыхухэм итӀанэ: – Фирхьэуным папщӀэ иджы сэ фыкъэсщэхуащ фэри фи щӀыгури; жылэхэр фызотри, тефсэ щӀыгум.

²⁴ Гъавэ хыжыгъуэр къэсмэ, къыхуэфшэ фирхьэуным Ӏыхьэ тхуанэр; ӀыхьиплӀыр къыфхуэнэнущ фэ губгъуэхэм щыхэфсэну, фэри, фи унэхэм исхэми, фи сабийхэми фшхыну.

²⁵ – Уэ къебгъэлащ ди гъащӀэр, – жаӀащ абыхэм, – нэфӀкӀэ укъыдэплъащ, ди зиусхьэн, дыхурехъу фирхьэунми унэӀут.

²⁶ Абдеж щигъэуващ Исуф Мысыр щӀыналъэм хабзэу, уеблэмэ иджырей махуэм къэсу: Ӏыхьэ тхуанэр фирхьэуным етын, тхьэгъэпсхэм я щӀыгуу фирхьэуным ейуэ щымытыр хэмыту.

Екъуб и иужьрей илъэсхэр

²⁷ Щыпсэурт Израил Мысыр щӀыналъэм, Гощэн щӀыгум, телэжьыхьырт а щӀыгум; багъуэурэ, ар лъэпкъышхуэ хъуащ.

²⁸ Щыпсэуащ Екъуб Мысыр щӀыналъэм илъэс пщыкӀублкӀэ; хъурт Екъуб и махуэхэр, абы и гъащӀэ махуэхэр, илъэсищэрэ плӀыщӀрэ блырэ.

²⁹ Къэсащ Екъуб щылӀэну пӀалъэр, абы езым и къуэ Исуф къриджэри, жриӀащ: – НэфӀкӀэ укъызэплъмэ, уи Ӏэр си куэ щӀагъым щӀэлъхьи, тхьэлъанэ щӀы фӀыкӀэ, пэжыгъэкӀэ укъызэрысхущытынумкӀэ: Мысырым сыщыщӀумылъхьэж.

³⁰ Си адэжьхэм сабгъурыгъуэлъхьэжын щхьэкӀэ, Мысырым сипхыжынщи, сыщыщӀэплъхьэжынщ абыхэм я кхъэлэгъунэм. – СщӀэнщ уи псалъэм тету, – жиӀащ Исуф.

³¹ – Тхьэлъанэ къысхуэщӀ, – жиӀащ Екъуб. Тхьэлъанэ хуищӀащ Исуф. И щхьэнтэм зригъэщӀурэ, Тхьэм щӀыхь хуищӀащ Израил.