1 Мусэ 46 - ХъыбарыфӀыр. ЩӀэдзапӀэр. Уэрэд ЛъапӀэхэр

Екъуб Мысырым зэрыкӀуар

¹ Арати, Израил, езым иӀэ псори здрихьэжьэри, кӀуащ Бэр-Шэвэ, хуищӀащ къурмэн езым и адэ Исхьэкъ и Тхьэм.

² Тхьэр Израил жэщым къыхуэлъагъуэри, къыжриӀащ: – Екъуб! Екъуб! – Сымис сэ, – жиӀащ абы.

³ – Сэрщ Тхьэр, уи адэм и Тхьэр, – жиӀащ Тхьэм. – Умышынэ Мысырым укӀуэн; абдежым уэ къыщыптезгъэхъукӀынущ лъэпкъ ин дыдэ.

⁴ Сэ сыпщӀыгъуу сынэкӀуэнущ Мысырым; апхуэдэуи Сэ укъисшыжынущ абы. Исуф езым и ӀэкӀэ зэтрипӀэжынущ уи нэхэр.

⁵ Екъуб къибгынащ Бэр-Шэвэ; ирашэжьащ Израил и къуэхэм Екъуб, езыхэм я адэр, я сабийхэри, я фызхэри, фирхьэуным къарита шыгухэмкӀэ ар здашэнум нагъэсын папщӀэ.

⁶ Къащтащ абыхэм я Ӏэщри, Ханаан щӀыналъэм щызыӀэрагъэхьа мылъкури, Мысырми нэсащ, Екъуби езым къытехъукӀа бын псори абы и гъусэу.

⁷ Езым и къуэхэри, и къуэрылъхухэри, ипхъухэри, и пхъурылъхухэри, езым къытехъукӀа псори здишащ абы Мысырым.

Екъуб и бынхэр

⁸ Мис Екъуб и къуэхэу Мысырым кӀуахэм я цӀэхэр, Екъубрэ абы и къуэхэмрэ: Екъуб и щыпэлъху Рубэн.

⁹ Рубэн и къуэхэр: Хъанох, Палыу, Хъэцрон, Къармый.

¹⁰ Симеон и къуэхэр: Емуел, Ямин, Охад, Яхин, Цохар, Ханаан бзылъхугъэм и къуэ Шаул.

¹¹ Лэуий и къуэхэр: Гъэршэн, Къохат, Мэрарый.

¹² Иудэ и къуэхэр: Ер, Онан, Шэлэ, Пэрэц, Зэрахь; Еррэ Онанрэ щылӀащ Ханаан щӀыналъэм. Пэрэц и къуэхэт Хэцрон, Хъамул.

¹³ Иссашхар и къуэхэр: Толэ, Пуа, Яшуб, Щимрэн.

¹⁴ Зэбулун и къуэхэр: Сэрэд, Елон, Яхьлэел.

¹⁵ Ахэр Леа и къуэхэу Паддан-Арам Екъуб къыщыхуилъхуахэрщ; Динэ, абы и пхъур. Леа къуэрэ пхъууэ иӀащ цӀыху щэщӀрэ щырэ.

¹⁶ Гад и къуэхэр: Цыфион, Хьагъый, Шуный, Ецбон, Ерый, Ародый, Арэлый.

¹⁷ Ащэр и къуэхэр: Имнэ, Ишуэ, Ишыуй, Бэрие, абыхэм я шыпхъу Сэрахь. Бэрие и къуэхэр: Хъэбэр, Малхъыел.

¹⁸ Ахэр Лабан ипхъу Леа иритауэ щытыгъа Зилпа и къуэхэщ. Абы ахэр Екъуб къыхуилъхуащ, цӀыху пщыкӀух хъууэ.

¹⁹ Екъуб и фыз Рахэл и къуэхэр: Исуфрэ Биниаминрэ.

²⁰ Мысыр щӀыналъэм Исуф къыщыхуэхъуащ Мынасэрэ Ефраимрэ, Он къалэм щыщ тхьэгъэпс Потиферахь ипхъу Асэнат къилъхуахэр.

²¹ Биниамин и къуэхэр: Бэлахь, Бэхэр, Ащбэл; Гъэрэ, НаӀаман, Ехьый, Рощ, Мупим, Хъуппим, Ард.

²² Ахэр Рахэл и къуэхэу Екъуб къыхуэхъуахэрщ, псори цӀыху пщыкӀуплӀ хъууэ.

²³ Дан и къуэр: Хьушым.

²⁴ Нафталый и къуэхэр: Яхцэел, Гъуный, Ецэр, Щылэм.

²⁵ Ахэр Лабан ипхъу Рахэл иритауэ щытыгъа унэӀут бзылъхъугъэ Билхьэ и къуэхэщ. Абы ахэр Екъуб къыхуилъхуащ, псори цӀыхуибл хъууэ.

²⁶ Екъуб и гъусэу Мысырым кӀуа цӀыхухэр, езым къытехъукӀахэр, Екъуб и къуэхэм я фызхэр хэмыту, псори хъурт цӀыху хыщӀрэ хырэ.

²⁷ Исуф и къуэхэу абы Мысырым къыщыхуэхъуахэр цӀыхуитӀ хъурт. Екъуб и унагъуэм щыщу Мысырым кӀуахэр псори зэхэту цӀыху блыщӀ хъурт.

Екъуб Мысырым щыщ Гощэн щӀыгум зэритӀысхьар

²⁸ Екъуб Иудэ езым япэ Исуф деж игъэкӀуащ, езы Исуф Гощэн хэкум хуэкӀуэ гъуэгур къаригъэлъагъун папщӀэ.

²⁹ Гощэн щӀылъэм къыщыкӀуэм, Исуф шыгур зэщӀригъэщӀэри, Гощэн щӀыналъэм кӀуащ, езым и адэ Израил пежьэну. Ар къыщилъагъум, и адэм и пщэм зридзэри, куэдрэ гъащ Исуф.

³⁰ Абдежым жриӀащ Израил Исуф: – СылӀэнщ иджы сэ, уи напэр къэслъагъужауэ; уэ иджыри узэрыпсэур сдъэгъуащи.

³¹ ИтӀанэ яжриӀащ Исуф и къуэшхэми, и адэми, я унагъуэхэми: – Сэ сыкӀуэнщ, фирхьэуным хъыбар езгъэщӀэнщ, жесӀэнщ абы: «Ханаан щӀыналъэм къикӀа си къуэшхэри си адэм и унагъуэри къэкӀуащ си деж.

³² А цӀыхухэр мэлыхъуэхэщ, Ӏэщ зэрахуэ; я Ӏэщ цӀыкӀуи я Ӏэщышхуи, яӀэ псори къыздашащ абыхэм».

³³ – Фирхьэуным фриджэу: «Сыт фи ӀэщӀагъэр фэ?» – жиӀэрэ къывэупщӀмэ,

³⁴ фэ жыфӀэ: «Дэ, уи унэӀутхэр, дыӀэщыхъуэщ дыщыщӀалэм къыщыщӀэдзауэ иджыри къэс, дэри ди адэхэри», фэ Гощэн щӀыналъэм фыщагъэтӀысын папщӀэ. Мысыр цӀыхухэм я дежкӀэ гуемыӀущ дэтхэнэ мэлыхъуэри.