1 Мусэ 40 - ХъыбарыфӀыр. ЩӀэдзапӀэр. Уэрэд ЛъапӀэхэр

Исуф лъэхъуэщым къыдыщӀэсхэм я пщӀыхьэпӀэхэм къикӀыр зэрагуригъэӀуар

¹ Абы и ужькӀэ мысыр фирхьэуным и фадэзехьэмрэ и щӀакхъуэгъажьэмрэ къуаншагъэ щалэжьащ я зиусхьэну мысыр фирхьэуным и пащхьэм.

² Яхуэгубжьащ, арати, фирхьэуныр и блыгущӀэтитӀым: фадэзехьэ нэхъыщхьэмрэ щӀакхъуэгъажьэ нэхъыщхьэмрэ.

³ Иритащ ахэр щхьэхъумэхэм я Ӏэтащхьэм, Исуф зрадза хьэпсым.

⁴ Щхьэхъумэхэм я Ӏэтащхьэм ахэр Исуф и пщэ ирилъхьати, ар хуэӀуэхутхьэбзащӀэрт абыхэм. Исащ ахэр хьэпсым зэман зыбжанэкӀэ.

⁵ Хьэпсым ирадзахэм, мысыр фирхьэуным и фадэзехьэмрэ и щӀакхъуэгъажъэмрэ, зэгуэрым ялъэгъуащ пщӀыхьэпӀэхэр, щхьэж езым и пщӀыхьэпӀэ, тӀуми зы жэщым, щхьэж и пщӀыхьэпӀэм къикӀыр щхьэхуэу.

⁶ Пщэдджыжьым абыхэм Исуф къахыхьати, илъэгъуащ ахэр гузэвэгъуэм зэрыхэтыр.

⁷ ЕупщӀащ абдеж езым и гъусэу хьэпсым ис фирхьэун блыгущӀэтхэм: – Щхьэ фи нэгухэр зэхэуфа нобэ? – жиӀэри.

⁸ Абыхэм къыжраӀащ: – Дэ тлъэгъуащ пщӀыхьэпӀэ, ауэ къикӀыр къыджезыӀэн щыӀэкъым. – ПщӀыхьэпӀэхэр зэхэхуныр Тхьэр аракъэ зи Ӏуэхур? – яжриӀащ абыхэм Исуф. – КъысхуэфӀуатэ сэ ахэр.

⁹ Абдеж фадэзехьэ нэхъыщхьэм и пщӀыхьыр хуиӀуэтащ Исуф, жриӀащ абы мыпхуэдэу: – Сэ сепщӀыхьащ жызумей къуэпс си пащхьэм къилъу;

¹⁰ А къуэпсым къудамищ тетт. Ар хэхъуащ, гъэгъахэр къыпидзащ, жызумри хъуащ.

¹¹ Фирхьэуным и фалъэр ӀэщӀэтт си Ӏэм. Сэ жызумыр къасщтэри, фирхьэуным и фалъэм испӀытӀыхьащ, итӀанэ ӀэщӀэслъхьащ фалъэр фирхьэуным.

¹² – Абы къикӀыращи, – жриӀащ Исуф абы, – къудамищыр махуищщ.

¹³ Махуищ дэкӀмэ, фирхьэуным уиутӀыпщыжынурэ уи увыпӀэу щытам уигъэгъэзэжынущ, япэм зэрыпщӀэу щытам хуэдэуи ӀэщӀэплъхьэнущ фалъэр фирхьэуным.

¹⁴ Уигу сыкъэгъэкӀыж атӀэ, уи Ӏуэхухэр фӀы хъуа нэужь, фӀы къысхуэщӀэ, фирхьэуным си гугъу хуэщӀи, сишыж мы хьэпсым.

¹⁵ Сыт щхьэкӀэ жыпӀэмэ сэ сыкърадыгъукӀащ журт щӀыналъэм; мыбы хьэпсым сыщӀрадзэн зыри щысщӀакъым.

¹⁶ ЩӀакхъуэгъажьэ нэхъыщхьэм абы пшӀыхьэпӀэр фӀыкӀэ зэрызэхихур илъэгъуати, къыжриӀащ Исуф: – Сэри мыпхуэдэу сепщӀыхьащ: си щхьэм тет хуэдэт щӀакхъуэ хужь зрылъ матэ хъарищ;

¹⁷ Ищхьэ дыдэм тет матэм илът фирхьэуным и шхыныгъуэу щӀакхъуэгъажьэм и ӀэрыкӀ сыт хуэдэри; къуалэбзухэм яуӀурт ахэр, си щхьэм тет матэм здилъым.

¹⁸ Исуф жэуап къитри, жиӀащ: – Абы къикӀыращ: матищыр махуищщ;

¹⁹ Махуищ дэкӀмэ, фирхьэуным уи щхьэр пиупщӀынурэ упилъэнущ жыгым; къуалэбзухэми яуӀунущ уи лыр.

²⁰ Ещанэ махуэм, фирхьэуныр къыщалъхуа махуэм, абы ищӀащ ефэ-ешхэ и къулыкъущӀэхэм папщӀэ, абдеж игъакӀуэри, хьэпсым къыщӀригъэщыжащ езым и къулыкъущӀэхэм ящыщу фадэзехьэмрэ щӀакхъуэгъажьэмрэ;

²¹ Арати, къригъэгъэзэжащ фадэзехьэ нэхъыщхэм и увыпӀэм, икӀи абы ӀэщӀигъэуващ фадэ бжьэр фирхьэуным.

²² Ауэ щӀакхъуэгъажьэ нэхъыщхьэр пилъащ, Исуф абы и пщӀыхьэпӀэр къызэрыхузэхихуауэ.

²³ АрщхьэкӀэ фадэзехьэ нэхъыщхьэм игу къэкӀыжакъым Исуфыр, щыгъупщэжащ ар.