1 Мусэ 38 - ХъыбарыфӀыр. ЩӀэдзапӀэр. Уэрэд ЛъапӀэхэр

Иудэрэ Тамарэрэ

¹ А зэманым Иудэ и къуэшхэм къабгъэдэкӀри щытӀысащ Адуллам къалэм щыщу Хьирэ зи цӀэм и гъунэгъуу.

² Иудэ абдежым къыщилъэгъуащ ШыуаӀ зи цӀэ ханаан цӀыху гуэрым и пхъур; ар ищтащ, щӀыхьащ абы деж.

³ Ар лъэщыджэ хъури, къилъхуащ къуэ; фӀищащ абы цӀэуэ Ер.

⁴ Аргуэру лъэщыджэ хъури, къилъхуащ къуэ; фӀищащ абы цӀэуэ Онан.

⁵ Аргуэру къуэ къилъхури фӀищащ абы цӀэуэ Шэлэ. Иудэ щыӀэт Хъэзиб щӀыпӀэм, абы ар къыщилъхуам щыгъуэ.

⁶ Иудэ и щыпэлъху Ер фыз къыхуишащ; абы и цӀэт Тамарэ.

⁷ Ер, Иудэ и щыпэлъхум, Зиусхьэныр къыхуэфӀтэкъыми, игъэлӀащ Зиусхьэным ар.

⁸ Апхуэдэу щыхъум, Иудэ Онан жриӀащ: – ЩӀыхьэ уи къуэшым и фызым деж, ар къашэ, пщыкъуэу ущыщыткӀэ, зэфӀэгъэувэж уи къуэшым и унагъуэр.

⁹ Онан ищӀэрт быныр езым ейуэ зэрыщымытынур; абы къыхэкӀыуи и къуэшым и фызым деж щыщӀыхьэкӀэ, щӀым хикӀэрт, и къуэшым сабий иримытын папщӀэ.

¹⁰ Зиусхьэным и пащхьэм Ӏеягъэт абы щилэжьыр; Абы игъэлӀащ ари.

¹¹ Абдеж жриӀащ Иудэ Тамарэ, езым и нысэм: – Щыпсэу фызабэу уи адэм и унэм, си къуэ Шэлэ балигъ хъуху. Сыт щхьэкӀэ жыпӀэмэ абы жиӀащ: «МылӀащэрэт ари и къуэшхэм хуэдэу», – жиӀэри. Тамарэ кӀуэжри итӀысхьэжащ и адэм и унэм.

¹² Зэман куэд дэкӀри, лӀащ ШыуаӀ и пхъур, Иудэ и фызыр. Иудэ удэӀужри кӀуащ Тимнэ, езым и Ӏэщхэр къэзыщхэм я деж, езыри Ӏадулам щыщ и ныбжьэгъу Хьири.

¹³ Арати, хъыбар ирагъэщӀащ Тамарэ, уи тхьэмадэр макӀуэ Тимнэ, и Ӏэщыр къищыну, жраӀэри.

¹⁴ Абдеж абы и фызабэ щыгъыныр зыщихри зытриубгъуащ щхьэтепхъуэ, икӀи зызэщӀиуфэри ӀутӀысхьащ Тымнэ хуэкӀуэ гъуэгум тет Ӏэнаим къалэм и куэбжэм. Сыту жыпӀэмэ илъэгъуат Шэлэ ин зэрыхъуари, езыр абы фызу зэрырамытари.

¹⁵ Иудэ ар къилъагъури, къыщыхъуащ ар къэхьпэуэ; сыт щхьэкӀэ жыпӀэмэ абы щӀиуфат и нэкӀур.

¹⁶ Абы дежкӀэ зигъазэри, Иудэ жиӀащ: – СыныщӀыхьэнущ уи деж. ИщӀэртэкъым ар езым и нысэр арауэ зэрыщытыр. – Сыт къызэптынур, си деж укъыщӀыхьэмэ? – жиӀащ абы.

¹⁷ – Сэ къыпхуезгъэшэнщ си хъушэм щыщу бжэн цӀыкӀу, – жиӀащ Иудэ. – Уихьэн шэсыпӀэ, ар къебгъэшэху? – жиӀащ цӀыхубзым.

¹⁸ – Сыт хуэдэ шэсыпӀэ? – жиӀащ абы. – Уи мыхъурыр, уи плӀэпсыр, уи Ӏэм ӀэщӀэлъ уи башыр, – жиӀащ адрейм. Ахэр иритри, Иудэ щӀыхьащ цӀыхубзым деж; икӀи ар абы хуэхъуащ уэндэгъу.

¹⁹ ИтӀанэ тэджри кӀуэжащ, и щхьэтепхъуэр зытрихыжри зихуэпэжащ и фызабэ щыгъынымкӀэ.

²⁰ Иудэм иригъэхьащ бжэн цӀыкӀур Адуллам къалэм щыщ и ныбжьэгъум, а бзылъхугъэм шэсыпӀэ зэрыхуихьар къыӀригъэхыжыну; ауэ абы ар игъуэтыжакъым.

²¹ ИтӀанэ еупщӀащ а щӀыпӀэм щыпсэухэм, мыр жиӀэурэ: – Дэнэ щыӀэ Енаим и гъуэгу Ӏуфэм теса къэхьпэр? – Мыбдежым щыӀакъым къэхьпэ, – жаӀащ абыхэм.

²² Арати, абы Иудэ деж къигъэзэжри, жиӀащ: – Сэ згъуэтакъым ар; а щӀыпӀэм щыпсэухэм «Мыбдежым щыӀакъым къэхьпэ» жаӀащ.

²³ – Ирещтэ абы, ауэ дэ къытщымыдыхьэшх закъуэмэ, аращ, – жиӀащ Иудэ. – Хуозгъэхьат сэ мы бжэн цӀыкӀур, ауэ уэ ар бгъуэтакъым.

²⁴ Мазищ хуэдиз дэкӀри, къыжраӀащ Иудэ мыпхуэдэу: – Тамарэ, уи нысэм, зинэ ищӀащ, арати, лъэщыджэ хъуащ ар зинэкӀэ. – Дэфш ар, икӀи ирырагъэс ар, – жиӀащ Иудэ.

²⁵ Ауэ ар щрашажьэм, абы езым и тхьэмадэм деж игъакӀуэри мыпхуэдэу жрыригъэӀащ: – Сэ уэндэгъу сызыхуэхъуар мы хьэпшыпхэр зейр арщ. АдэкӀи жиӀащ: – ПцӀыхужрэ, хэт ей мы мыхъурри, плӀэпсри, башри?

²⁶ Иудэ къицӀыхужри, жиӀащ: – Ар нэхъ захуэщ сэ нэхърэ, сэ ар естакъым Шэлэ, си къуэм. ИкӀи екӀуэлӀакъым ар абы и ужькӀэ.

²⁷ И лъхуэгъуэр къыщысым, Тамарэ и ныбэм зэтӀолъхуэныкъуэ илъу къыщӀэкӀащ.

²⁸ Ар щылъхуэм, бынжэр пызыупщӀ фызыжьым япэ илъэгъуа Ӏэм ирищӀащ Ӏуданэ плъыжь, «мыр япэ къалъхуащ», жиӀэри.

²⁹ Ауэ Ӏэр зейм иригъэгъэзэжри, къикӀащ абы и къуэшыр. Фызыжьым жиӀащ: – Уэ дауэ укъыфӀэкӀа къыппэувам? ИкӀи фӀищащ абы цӀэуэ Пэрэц.

³⁰ ИтӀанэ къалъхуащ абы и къуэшыр, и Ӏэм Ӏуданэ плъыжьыр ищӀауэ. ИкӀи фӀащащ абы цӀэуэ Зэрахь.