1 Мусэ 37 - ХъыбарыфӀыр. ЩӀэдзапӀэр. Уэрэд ЛъапӀэхэр

Исуф къехъулӀэнур пщӀыхьэпӀэу и нэгу зэрыщӀэкӀар

¹ Екъуб итӀысхьащ и адэр хэхэсу зыщыпсэууэ щыта щӀыналъэм, Ханаан щӀыналъэм.

² Мис Екъуб и унагъуэм и хъыбарыр. Исуф, илъэс пщыкӀубл и ныбжьу, мэлхэри бжэнхэри игъэхъурт, и къуэшхэу Билхьэрэ Зилпэрэ я къуэхэм я гъусэу, щӀалэщӀэу, и адэм и фызхэм я гъусэу. Исуф нигъэсыжырт я адэм деж абыхэм папщӀэ хъыбар Ӏейхэр.

³ Екъуб адрей и къуэхэм нэхърэ Исуф нэхъыфӀу илъагъурт, сыт щхьэкӀэ жыпӀэмэ ар езым и жьыщхьэм къыхуэхъуа и къуэт; арати, хуригъэщӀащ абы гъуапэ зиӀэ щыгъын кӀыхь.

⁴ Абдеж къащӀащ зэш псоми нэхърэ ар нэхъыфӀу я адэм зэрилъагъур; ялъагъу мыхъуи хъуащ ар, ахэр абы дахэуи епсэлъэжыфыртэкъым.

⁵ Илъэгъуащ Исуф пщӀыхьэпӀэ жэщ гуэрым, яхуиӀуэтэжащ ар езым и къуэшхэм: мыдрейхэми ар нэхъри жагъуэу ялъагъу хъуащ.

⁶ Исуф яжриӀащ абыхэм: – ФыкъедаӀуэ сэ пщӀыхьэпӀэ слъэгъуам.

⁷ Слъэгъуащ: дэ пхырхэр дощӀри губгъуэм дитщ, си пхырыр уващ, уващ захуэу, икӀи фи пхырхэр хъурейуэ абы къеувэкӀри, щхьэщэ къыхуащӀащ си пхырым.

⁸ Абдеж и къуэшхэм къыжраӀащ абы: – Уэ тепщэ укъытхуэхъунуи? Уэ дыпӀэщӀэлъынуи? ИкӀи ар нэхъри жагъуэу ялъагъу хъуащ абы и пщӀыхьымрэ жиӀамрэ щхьэкӀэ.

⁹ Илъэгъуащ аргуэру Исуф нэгъуэщӀ пщӀыхьэпӀи, яхуиӀуэтэжащ ари и къуэшхэм: – ФыкъэдэӀуэ, аргуэру пщӀыхьэпӀэ слъэгъуащ, дыгъэми, мазэми, вагъуэ пщыкӀузми щхьэщэ къысхуащӀу.

¹⁰ Езым и адэми и къуэшхэми ар щахуиӀуэтам, къешхыдащ абы и адэр, къыжриӀащ мыпхуэдэу абы: – Ар сыт пщӀыхьэпӀэ уэ плъэгъуар? Сэри, уи анэри, уи къуэшхэри уэ щӀым нэсу щхьэщэ пхуэтщӀын папщӀэ, дынэкӀуэнуи?

¹¹ И къуэшхэр къыхузэгуэпырт абы; ауэ Исуф и адэм игу ириубыдащ абы и псалъэр.

Исуф и къуэшхэм зэращамрэ ар Мысырым къызэрыщыхутамрэ

¹² Исуф и къуэшхэр кӀуащ Щэхэм махуэ гуэрым, я адэм и мэлхэри и бжэнхэри ягъэхъун папщӀэ.

¹³ Екъуб Исуф жриӀащ: – Уи къуэшхэм мэлхэри бжэнхэри ягъэхъу. Сэ узгъэкӀуэнущ абыхэм я деж. Абы жэуап иритащ: – Сыхьэзырщ сэ.

¹⁴ ЖриӀащ адэкӀи абы: – КӀуэи, еплъ, узыншэу пӀэрэ уи къуэшхэр, къызыхуэтыншэу пӀэрэ мэлхэри бжэнхэри, икӀи къысхуэхьыж жэуапыр. Арати, дигъэкӀащ ар Хэврон аузым, кӀуащ Исуф Щэхэм.

¹⁵ ЛӀы гуэр къыхуэзащ абы, губгъуэм игъуэщыхьауэ, арати, къеупщӀащ а лӀыр абы: – Сыт уэ узылъыхъуэр? – жиӀэри.

¹⁶ – Сэ солъыхъуэ си къуэшхэм; къызжеӀэ, дэнэ деж абыхэм Ӏэщыр щагъэхъур?

¹⁷ – Ахэр ӀукӀыжащ мыбдежым; – жиӀащ адрейм – сэ зэхэсхащ абыхэм «ДыкӀуэнщ Дотан» жаӀэу зэрыжаӀар. Исуф и къуэшхэм якӀэлъыкӀуэри, къыщигъуэтащ ахэр Дотан деж.

¹⁸ Къалъэгъуащ абыхэм Исуф жыжьэу, икӀи абыхэм, ар гъунэгъу къахуэмыхъу щӀыкӀэ, мурад ящӀу щӀадзащ ар яукӀыну.

¹⁹ ЖаӀащ абыхэм: – Мес, къокӀуэ пщӀыхьэпӀэ зылъагъур.

²⁰ ДыкӀуэнщи, иджы дукӀынщ ар, иддзэнщ ар псыр зэрыгъукӀа мащэ гуэрми, жытӀэнщ хьэкӀэкхъуэкӀэ бзаджэм ишхауэ; итӀанэ деплъынщ абы и пщӀыхьхэм къикӀым.

²¹ Рубэн, ар зэхихри, ар абыхэм къаӀэщӀигъэкӀащ, – ДукӀынкъым ар, – жиӀэри.

²² Рубэн адэкӀи яжриӀащ абыхэм: – Фымыгъажэ лъы; ивдзэ ар губгъуэ нэщӀым ит мащэм, ауэ фемыӀусэ абы. Абы ар щӀыжиӀэр абыхэм ар яӀэщӀихыу и адэм хуигъэкӀуэжын щхьэкӀэт.

²³ Исуф езым и къуэшхэм къащыхыхьэм, абыхэм къыщатхъащ абы щыгъа гъуапэ зиӀэ щыгъын кӀыхьыр.

²⁴ ИтӀанэ ар къащтэри ирадзащ псыкъуийм; а псыкъуийр нэщӀт; абы псы иттэкъым.

²⁵ Ахэр шхэну тӀысауэ плъэри, къалъэгъуащ исмэхьил цӀыхухэм я чэруаныр Гилеад къикӀыу; абыхэм я махъшэхэм ятелъщ мэ дахэ къызыпих удзхэри, пхъэхэри, шхынхэлъхьэхэри: макӀуэ ахэр, а псори Мысырым яшэн папщӀэ.

²⁶ Абдеж Иудэ яжриӀащ езым и къуэшхэм: – Сыт ди фейдэуэ хэлъыр ди къуэшыр дукӀыу, абы и лъыр щӀэтхъумэжкӀэ?

²⁷ ДыкӀуэнщи, етщэнщ ар исмэхьил цӀыхухэм, абы илъ дгъэжэну дыхуейкъым; сыт щхьэкӀэ жыпӀэмэ ар ди къуэшщ, дилщ. Зэшхэр абы едэӀуащ.

²⁸ Арати, Мидиам щыщ сатуущӀэхэр щыблэкӀым, мащэм Исуф кърагъэфыжри иращащ ар исмэхьил цӀыхухэм дыжьын тӀощӀкӀэ, абыхэм Исуф Мысырым яшащ.

²⁹ Рубэн аргуэру къакӀуэри, мащэм щиплъэм, искъым Исуф. Абдеж, гукъеуэм хэту, зэфӀитхъащ езым и щыгъынхэр.

³⁰ ИтӀанэ и къуэшхэм я деж къигъэзэжри, жиӀащ: – ЩӀалэр щыӀэжкъым, дэнэ иджы сэ сыздэкӀуэнур?

³¹ ИтӀанэ къащтащ Исуф и щыгъыныр; ажэ яукӀри, абы и лъым хакухьащ щыгъыныр.

³² Щыгъын кӀыхьыр я адэм хуахьри, жаӀащ: – Дэ мыр къэдгъуэтащ; еплъыт уи къуэм и щыгъыныр арарэ армырарэ.

³³ Абы ар къицӀыхужри, жиӀащ: – Мыр си къуэм и щыгъынырщ; хьэкӀэкхъуэкӀэ бзаджэм ишхащ ар; пэжщ, зэпкъратхъащ Исуф.

³⁴ Абдеж Екъуб езым и щыгъынхэр зэфӀитхъри, щыгъуэ щыгъынхэр зыщитӀэгъащ, икӀи игъеящ и къуэр махуэ куэдкӀэ.

³⁵ Къызэхуэсащ абы и къуэхэри ипхъухэри, ар ягъэудэӀужын папщӀэ; ауэ ар хуейтэкъым удэӀужыну, жиӀащ мыр: – Нэщхъеягъуэм сыхэту сехыжынущ си къуэм деж щӀыкъатиблкӀэ. Апхуэдэу игъеящ и адэм Исуф.

³⁶ Мидиам цӀыхухэм Мысырым щращащ Исуф Потифар, фирхьэуным и блыгущӀэтхэм щыщым, фирхьэуным и щхьэхъумэхэм я Ӏэтащхьэм.