1 Мусэ 34 - ХъыбарыфӀыр. ЩӀэдзапӀэр. Уэрэд ЛъапӀэхэр

Екъуб ипхъу Динэ лей къызэрырахар

¹ Леа Екъуб къыхуилъхуа Динэ дэкӀащ а щӀыналъэм ипхъухэм еплъыну.

² Ар къилъэгъуащ а щӀыналъэм ипщ хъыу лъэпкъым щыщу Хамор и къуэ Щэхэм, ар иубыдри здигъэгъуэлъащ, леи кърихащ.

³ Абдеж абы и игу кӀэрыпщӀащ Динэ, Екъуб и пхъум, абы пщащэр фӀыуэ илъагъури, псалъэ гурыхькӀэ епсэлъащ.

⁴ Арати, Щэхэм епсэлъащ Хамор, езым и адэм: – Къысхуэшэ а пщащэр фызу, – жиӀэри.

⁵ Екъуб зэхихащ Хамор и къуэм езым и пхъур, Динэ, къызэригъэпудар, ауэ езым и къуэхэр Ӏэщыр ягъэхъуу губгъуэм щыӀэти, Екъуб зиущэхуащ, ахэр къэкӀуэжыху.

⁶ КъыдэкӀащ Хамор, Щэхэм и адэр, Екъуб деж, абы къепсэлъэну.

⁷ Екъуб и къуэхэри къикӀыжащ губгъуэм, къэхъуар щызэхахым; я жагъуэ хъуащ а лӀыхэм, къызэщӀэнащ губжькӀэ, сыт щхьэкӀэ жыпӀэмэ Израилым и напэр трихащ Щэхэм, Екъуб и пхъум дэгъуэлъри, атӀэми ар мыхъуну щытащ.

⁸ Хамор абыхэм епсэлъэну къригъажьэри, жиӀащ: – Щэхэм, си къуэр, кӀэрыпщӀащ псэкӀэ фи пхъум; атӀэ къефт ар абы фызу.

⁹ Ӏыхьлы фыкъытхуэхъу; къэдвгъашэ фипхъухэр, дэ дипхъухэри фшэ.

¹⁰ ТщӀыгъуу фыкъыддэпсэу; мы щӀыналъэр фи пащхьэм илъщ, фыщыпсэу икӀи фыщыщакӀуэ абы, зыӀэрывгъэхьэ ар фыфейуэ.

¹¹ Езы Щэхэм яжриӀащ абы и адэми и дэлъхухэми: – НэфӀкӀэ фыкъызэплъ къудеймэ, сэ фэстынущ сыт фыхуейуэ къызжефӀэми.

¹² Вгъэнахуэ нысэ уасэу я нэхъ лъапӀэри тыгъэри; сыт къызжефӀэми, фэстынщ; пщащэр фызу къызэфт закъуэ, нэхъыбэ сыхуейкъым.

¹³ Екъуб и къуэхэм жэуапу къратыжащ Щэхэми абы и адэ Хамори хьилагъэ хэлъу; апхуэдэу ахэр щӀэпсалъэр абы езыхэм я шыпхъу Динэ лей къызэрырихар арат;

¹⁴ – Дэ ар тхуэлэжьынукъым, – къыжраӀащ абыхэм, – ди шыпхъур сунэт ямыщӀа цӀыхум етту; напэншагъэщ ар дэркӀэ.

¹⁵ Мы зы закъуэрщ дэ дызэрызэгурыӀуэ хъунур: дэ тхуэдэу, фи цӀыхухъу псори сунэт фщӀынырщ.

¹⁶ Апхуэдэу хъумэ, фэдгъэшэнщ дипхъухэр, къэтшэнщ фипхъухэри, дывдэпсэунщ, зы лъэпкъи дыхъунщ.

¹⁷ Ауэ сунэт зевмыгъэщӀмэ, ди пхъур тшэжынщи, дыкӀуэжынщ.

¹⁸ Ягу ирихьащ а псалъэхэр Хамор, Хамор и къуэ Щэхэм.

¹⁹ ЩӀалэм зимыӀэжьэу игъэзэщӀащ ар; сыт щхьэкӀэ жыпӀэмэ фӀыуэ илъагъурт Екъуб и пхъур. Абы и адэм и унэм исхэм ящыщу псоми нэхърэ нэхъ пщӀэ иӀэт.

²⁰ ИтӀанэ Хаморэрэ и къуэ Щэхэмрэ езыхэм я къалэм и куэбжэм деж кӀуэри, щӀадзащ епсэлъэн я къалэм дэс цӀыхухэм, мыпхуэдэу жаӀэурэ:

²¹ – Мы цӀыхухэр мамыру къытхущытщ дэ; щретӀыс ахэр мы щӀыналъэм деж икӀи щрещакӀуэ; щӀыналъэри убгъуауэ илъщ я пащхьэм. Къэтшэнщ япхъухэри фызу, едгъэшэнщ дипхъухэри.

²² Мы зы закъуэрщ а цӀыхухэр къызэрыдгурыӀуэнур къыддэпсэуну, зы лъэпкъыуи дызэкъуагъэтыну: абыхэм яхуэдэу, дэри ди цӀыхухъу псори сунэт тщӀымэ.

²³ Дыдей хъунукъэ абыхэм я Ӏэхъушэхэри, я мылъкухэри, я Ӏэщ псори? Арэзы дызэрыхъуу, псэунущ ди гъусэу.

²⁴ Къалэдэс псори едэӀуащ Хаморэрэ абы и къуэ Щэхэмрэ, икӀи сунэт ящӀащ цӀыхухъу псори, къалэдэсу хъуар.

²⁵ Ещанэ махуэм, ахэр гукъыдэмыжу здэщылъым, Екъуб и къуитӀым, Динэ и дэлъхухэу Симеонрэ Лэуийрэ, къащтащ щхьэж и джатэр икӀи пэрыуэ щымыӀэу къалэм дыхьэри, яукӀащ цӀыхухъу псори;

²⁶ Езы Хамори абы и къуэ Щэхэми яукӀащ джатэкӀэ; Динэ Щэхэм и унэм къыщӀашыжри къыщӀэкӀыжащ итӀанэ.

²⁷ Екъуб и къуэхэр яукӀахэм я деж кӀуэри зэрапхъуащ къалэр, я шыпхъум лей къызэрырахам папщӀэ.

²⁸ Абыхэм къащтащ адрейхэм я Ӏэщ цӀыкӀуи ини, я шыдхэри, апхуэдэу къалэм сыт дэлъми, губгъуэм сыт илъми.

²⁹ ЗэщӀакъуащ абыхэм я мылъку псори, я бын псори, я фызхэри гъэр къащӀащ, зэрапхъуащ унэхэм щӀэлъа псори.

³⁰ Абы щыгъуэ яжриӀащ Екъуб Симеонрэ Лэуийрэ: – Бэлыхь сыхэвдзащ сэ мы щӀыналъэм щыпсэу ханаан цӀыхухэмрэ пэриц цӀыхухэмрэ сыкъалъагъу мыхъуу сызэрыфщӀамкӀэ. Сэ цӀыхуу сиӀэр мащӀэщ; зэхуэсынущ къыспэувыну, сыхагъэщӀэнущ, икӀи дыкӀуэдынущ сэри си унагъуэри.

³¹ Ауэ Симеонрэ Лэуийрэ жаӀащ: – АтӀэ ди шыпхъум лей ирах хъунут, къэхьпэм хуэдэу!?