1 Мусэ 33 - ХъыбарыфӀыр. ЩӀэдзапӀэр. Уэрэд ЛъапӀэхэр

Екъуб Эсау зэрыхуэзар

¹ Екъуб щыплъэм къилъэгъуащ: къокӀуэ Эсау, и гъусэщ абы цӀыху щиплӀ. Щхьэхуэ-щхьэхуэ ищӀащ Леаи, Рахэли, унэӀут бзылъхугъитӀми я сабийхэри.

² ИкӀи иригъэуващ унэӀут бзылъхугъэхэмрэ абыхэм я сабийхэмрэ япэ, Леарэ абы и сабийхэмрэ абыхэм я ужьым, Рахэлрэ Исуфрэ абыхэм я ужьыж.

³ Езыр абыхэм япэ иту ежьэри, щхьэщэ ищӀащ щӀыгум нэсу блэнейрэ, и къуэшым щыбгъэдыхьэм.

⁴ Эсау къыпежажьэри ӀэплӀэ къыхуищӀащ, и пщэми зыкъришэкӀащ, баи къыхуищӀащ, икӀи гъащ ахэр.

⁵ Эсау къаплъэри, фызхэри сабийхэри къыщилъагъум, жиӀащ: – Хэт мы уи гъусэхэр? – Тхьэм и гущӀэгъукӀэ уи унэӀутым кърита бынхэрщ, – жиӀащ Екъуб.

⁶ ИтӀанэ унэӀут бзылъхугъэхэри абыхэм я бынхэри къыбгъэдыхьэри щхьэщэ къыхуащӀащ Эсау.

⁷ Абы и ужькӀэ Леаи абы и сабийхэми къыбгъэдыхьэри щхьэщэ къыхуащӀащ. ИкӀэм икӀэжым Исуфрэ Рахэлрэ къыбгъэдыхьэри щхьэщэ къыхуащӀащ.

⁸ ЖиӀащ абы щыгъуэ Эсау: – Мы сыкъызыхуэза къомыр сыт? – Уэ си зиусхьэныр нэфӀкӀэ укъызэплъын папщӀэ, – жиӀащ Екъуб.

⁹ Эсау жиӀащ: – Сэ сиӀэр ирикъунщ, си къуэш; ууейр уэ зигъэӀэж.

¹⁰ – Хьэуэ, – жиӀащ Екъуб, – уэ нэфӀкӀэ укъызэплъмэ, сӀых сэ къызбгъэдэкӀ тыгъэр; сыт щхьэкӀэ жыпӀэмэ сэ слъэгъуащ уи напэр, Тхьэ напэр зыгуэрым илъэгъуам ещхьу, уэри укъысхуэгуэпащ.

¹¹ Нащтэ си тыгъэу уэ къыпхуэсхьар; сыт щхьэкӀэ жыпӀэмэ Тхьэм и нэфӀкӀэ къызитауэ сиӀэщ сэ псори. Арати, къытригъэхьэщ ари, абы Ӏихащ.

¹² – ЗытӀэтынщи, дежьэнщ, – жиӀащ абы и ужькӀэ Эсау, – сэ сыкӀуэнщ уяпэ ситу.

¹³ Екъуб жриӀащ абы: – Си зиусхьэным ещӀэ сабийхэр зэрыгуащӀэмащӀэр, си Ӏэщ цӀыкӀури инри къашу зэрыщытри: ар махуэ енкӀэ пхумэ, зэтелӀэнущ псори.

¹⁴ Си зиусхьэныр ирекӀуэ езым и унэӀутым япэ иту, ауэ сэ си япэм Ӏэщу итыр зэрыкӀуэм хуэдэу, икӀи сабийхэр зэрыкӀуэм хуэдэу, хуэму сыкӀуэурэ секӀуэлӀэнщ си зиусхьэным деж Сеир щӀыналъэм.

¹⁵ – Сэ сщӀыгъу цӀыхухэм щыщ зыбжанэ къыпхуэзгъэнэнщ, – жиӀащ Эсау. – Сытым щхьэкӀэ? – жиӀащ Екъуб, – Си зиусхьэныр нэфӀкӀэ къызэплъыну аркъудейщ сэ сызыхуейр!

¹⁶ Арати, игъэзэжащ Эсау а махуэ дыдэм езым и гъуэгукӀэ Сеир.

¹⁷ Ауэ Екъуб Суккот иунэтӀри щиухуащ абы унэ, и Ӏэщхэм папщӀэ ищӀащ пщыӀэхэр. Абы къыхэкӀкӀи фӀищащ а щӀыпӀэм цӀэуэ Суккот.

¹⁸ Екъуб Паддан-Арам къикӀыжри, бэӀутӀэӀуншэу къэсащ Ханаан щӀыналъэм ит Щэхэм къалэм, икӀи щытӀысащ къалэ гупэм деж.

¹⁹ ИкӀи езым и шэтыр здригъэува щӀыгуу губгъуэм щыщыр къыщищэхуащ Щэхэм и адэ Хамор и къуэхэм я деж ахъшищэкӀэ.

²⁰ Абдежым къурмэнщӀыпӀэ щигъэуври, елъэӀуащ Зиусхьэну Израил и Тхьэм.