1 Мусэ 32 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Екъуб ежьащ езым и гъуэгукӀэ. Къыпежьащ абы Тхьэм и мелыӀычхэр.

² Екъуб ахэр щилъагъум, жиӀащ: – Ар Тхьэм и уафэдзэм и увыӀэпӀэщ. ИкӀи фӀищащ а щӀыпӀэм цӀэ: Маханаим.

Екъуб тыгъэхэр Эсау къызэрыхуигъэхьар

³ Екъуб езым япэ иту хуигъэкӀуащ и къуэш Эсау хъыбарегъащӀэхэр Эдом хэкум щыӀэ Сеир щӀыналъэм.

⁴ Унафэ яхуищӀащ абыхэм, мыр жиӀэри: – Мыпхуэдэу жефӀэ си зиусхьэн Эсау: мыращ жиӀэр уи унэӀут Екъуб: сэ сыщыпсэуащ Лабан деж, сыщыпсэуащ иджыри къэс;

⁵ СиӀэщ сэ выхэри, шыдхэри, Ӏэщ цӀыкӀуи, унэӀут цӀыхухъухэри, унэӀут бзылъхугъэхэри; икӀи сэ нэзгъэкӀуащ си зиусхьэным деж си хъыбар уэзгъэщӀэну, нэфӀкӀэ укъызэплъын папщӀэ.

⁶ ХъыбарегъащӀэхэм Екъуб деж къагъэзэжри, жаӀащ: – Дэ дыкӀуащ уи къуэш Эсау деж; ар къытпежьауэ къокӀуэ, цӀыху щиплӀ щӀыгъуу.

⁷ Екъуб икъукӀэ къэшынащ, къэгузэващ, икӀи игуэшащ гупитӀу езым и гъусэ цӀыхухэри, Ӏэщ цӀыкӀури инри, махъшэхэри.

⁸ «Эсау зы гупым теуэмэ икӀи ар зэхикъутэмэ, адрей гупым къелын хузэфӀэкӀынщ», жиӀащ абы.

⁹ ИтӀанэ елъэӀуащ Екъуб: – Си адэ Ибрэхьими си адэ Исхьэкъи я Тхьэ, Зиусхьэну сэ: «Гъэзэж уи щӀыналъэм, уи Ӏыхьлыхэм деж, Сэ фӀыгъуэ пхуэсщӀэнущ уэ» жиӀэу къызжезыӀа!

¹⁰ Сахуэфащэкъым сэ зэкӀэ фӀыгъуэрэ пэжыгъэрэ пщӀэуэ Уэ сэ, Уи ӀурыщӀэм, къысхуэпщӀахэм; сыт щхьэкӀэ жыпӀэмэ сэ си башыр сӀыгъыу сызэпрыкӀащ мы Иордан псым; атӀэми иджы сэ гупитӀ мылъку яӀэу си гъусэщ.

¹¹ СынолъэӀу, сыӀэщӀэх сэ си къуэшым и Ӏэм, Эсау и Ӏэм; сыт щхьэкӀэ жыпӀэмэ сэ сыщошынэ абы, ар къакӀуэу сэри, анэри, сабийхэри псори диукӀынкӀэ.

¹² Уэракъэ къызжезыӀар: «Сэ фӀыгъуэ пхуэсщӀэнущ, сщӀынущ уэ къыптехъукӀыну бынхэр куэд, пхуэмыбжу хы пшахъуэм хуэдиз».

¹³ А жэщыр а щӀыпӀэм щрихащ Екъуб. ИтӀанэ къищтащ езым иӀэм щыщу и къуэш Эсау папщӀэ тыгъэу:

¹⁴ Бжэн щитӀ, ажэ тӀощӀ, мэл щитӀ, тӀы тӀощӀ;

¹⁵ къэпш хъууэ махъшэбз щэщӀ, я махъшэ шыщӀэхэр я гъусэу, жэм плӀыщӀ, выуэ пщӀы, шыдыбз тӀощӀ, шыдыхъуу пщӀы.

¹⁶ ЯӀэщӀилъхьэщ езым и унэӀутхэм сыт хуэдэ хъушэри, щхьэхуэуи яжриӀащ и унэӀутхэм: – Сяпэ фиту фыкӀуи, щывгъэт хъушэхэр зыр адрейм пэжыжьэу.

¹⁷ ИкӀи унафэ хуищӀащ япэрейм, мыр жиӀэри: – Си къуэш Эсау къыпхуэзэрэ «Уэ хэт урей? Дэни укӀуэрэ? Хэт и хъушэ уяпэ итри?» жиӀэу, къоупщӀмэ,

¹⁸ жеӀэ: «Уи унэӀут Екъуб; мыр абы си зиусхьэн Эсау къыхуищӀа тыгъэщ; езы Екъуб ди ужь итщ».

¹⁹ Ар дыдэр унафэу хуищӀащ етӀуанэми, ещанэми, хъушэхэм я ужьым иту кӀуэ псоми, «Апхуэдэу жефӀэ Эсау, фыхуэзэмэ», жиӀэурэ;

²⁰ АдэкӀи жыфӀэ: «Уи унэӀут Екъуб ди ужь итщ». Сыт щхьэкӀэ жыпӀэмэ абы езым игукӀэ жиӀащ: «и нэфӀ къызыщызгъэхуэнщ ар сяпэм иту кӀуэ тыгъэхэмкӀи, дызыхуэзмэ фӀыуэ къыспежьэнкӀэ мэхъу итӀанэ».

²¹ Арати, кӀуащ тыгъэхэр абы я пэ иту; езым а жэщыр щигъэкӀуащ увыӀэпӀэм.

Екъуб Тхьэм зэребэнар

²² А жэщым къэтэджри, и фызитӀри, и унэӀут бзылъхугъитӀри, и къуэ пщыкӀузри къыздищтэри, зэпрыкӀащ Ябок и чэнжыпӀэмкӀэ.

²³ Ахэр зэпришащ псым, зэпришащ езым иӀа псори.

²⁴ Къэнащ Екъуб и закъуэу. ИкӀи къебэнащ абы Зыгуэр, нэхущ пшэплъыр къищӀыху.

²⁵ КъызэрытемыкӀуэфыр къыщилъагъум, къеӀусэщ абы и куэ къупщхьэ зэрытыпӀэм, зэрыгъэпкӀащ Екъуб и куэ къупщхьэ зэрытыпӀэр, Ар абы къыщебэным.

²⁶ – СутӀыпщ сэ, пшэплъ къищӀащ, – жиӀащ адрейм. – УзутӀыпщынукъым, Уэ уи нэфӀ къысщымыхуауэ, – жиӀащ Екъуб.

²⁷ – Сыт уи цӀэр? – жиӀащ адрейм. – Екъуб, – жиӀащ абы.

²⁸ – Иджы щыщӀэдзауэ уи цӀэу щытынур Екъубкъым, атӀэ Израилщ, – жиӀащ адрейм, – сыт щхьэкӀэ жыпӀэмэ уэ уебэнащ Тхьэми цӀыхухэми, къару уиӀэу къэбгъэлъэгъуащ.

²⁹ ЩӀэупщӀащ Екъуб, мыр жиӀэурэ: – КъызжеӀэ уи цӀэр. – Сыт уэ си цӀэм ущӀыщӀэупщӀэр? – жиӀащ абы. ИкӀи и нэфӀ къыщыщыхуащ абы абдежым.

³⁰ Екъуб фӀищащ а щӀыпӀэм цӀэуэ Пэниел, сыт щхьэкӀэ жыпӀэмэ, жиӀащ абы, «Сэ слъэгъуащ Тхьэр, ди нэгу зэхуэгъэзауэ, итӀани псэууэ къелащ си псэр».

³¹ КъыщӀэкӀащ дыгъэр, ар Пэнуел щыпхрыкӀым; ещӀэкъуауэрт ар, и куэ къупщхьэ зэрытыпӀэр зэрыпкӀати.

³² Абы папщӀэ иджыри къэс израил цӀыхухэм яшхыркъым куэ къупщхьэ зэрытыпӀэм телъ хуэр, сыт щхьэкӀэ жыпӀэмэ Къебэныгъар къеӀусащ Екъуб и куэ къупщхьэ зэрытыпӀэм телъ хуэм.