1 Мусэ 31 - ХъыбарыфӀыр. ЩӀэдзапӀэр. Уэрэд ЛъапӀэхэр

Екъуб Лабан деж къызэрыщыщӀэпхъужар

¹ Екъуб зэхихащ Лабан и къуэхэм жаӀэ псалъэхэр: – Екъуб зыӀэщӀиубыдащ ди адэм иӀа псори, ди адэм и мылъкум къыхигъэкӀащ и къулеигъэ псори.

² Къилъэгъуащ Екъуб Лабан и нэкӀур, ар абы къыхущытыжкъым дыгъуаси вэсэмахуи къызэрыхущытам хуэдэу.

³ КъыжриӀащ Зиусхьэным Екъуб: – Гъэзэж уи адэхэм я щӀыналъэу узыщалъхуа хэкум; Сэри сыуигъусэнущ.

⁴ Екъуб игъакӀуэри Рахэлрэ Леарэ езым и Ӏэщ цӀыкӀу хъушэ здэщыӀэ губгъуэм къригъэшащ.

⁵ ЯжриӀащ абыхэм: – Сэ солъагъу фи адэм и нэкӀур, ар дыгъуаси вэсэмахуи хуэдэу къызэрысхущымытыжыр. Ауэ си адэм и Тхьэр сэ си гъусэщ.

⁶ Фэ езыхэр фыщыгъуазэщ фи адэм си къару псомкӀи сызэрыхуэлэжьам.

⁷ Ауэ фи адэм сыкъигъапцӀэурэ пщӀэнейрэ ихъуэжащ си лэжьапщӀэр. Тхьэм хузэфӀигъэкӀакъым абы Ӏеягъэ къызищӀэну.

⁸ «Бжьыгъэ зиӀэ Ӏэщыр уэ пхуэхъунущ пщӀэ» абы щыжиӀэм, Ӏэщ псоми къалъхуащ бжыгъэ зиӀэхэр. «Къуэлэнхэр пхуэхъунущ уэ пщӀэ» абы щыжиӀэм, Ӏэщ псоми къалъхуащ къуэлэнхэу.

⁹ Арати, Тхьэм фи адэм Ӏэщыр къыӀэщӀихри, сэ къызитащ.

¹⁰ Зэгуэрым, Ӏэщым я хуэжэгъуэу, сэ пщӀыхьэпӀэм хэту слъэгъуащ бжэнхэм дэкӀуея ажэхэр къуэлэнхэу, ӀэпапӀэ зиӀэ яхэту, бжьыгъи яӀэу.

¹¹ Тхьэм и мелыӀычым сэ къызжиӀащ пщӀыхьым сыхэту: – Екъуб! – Сымис сэ, – жысӀащ сэ.

¹² – Уи напӀэхэр Ӏэти, еплъ, – жиӀащ абы. – Бжэнхэм дэкӀуея ажэ псори къуэлэнщ, ӀэпапӀэ зиӀэхэщ, бжьыгъэ зиӀэхэщ; сэ солъагъу Лабан уэ сыт къыуищӀэми.

¹³ Фэеплъым дагъэр щытепкӀэгъа, Сэри псалъэ быдэ къыщызэптыгъа Бэтэл деж уэ къыщыпхуэлъэгъуа Тхьэр Сэращ. Иджы зыӀэт, икӀ мы щӀыналъэм; гъэзэж узыщалъхуа хэкум.

¹⁴ Рахэлрэ Леарэ иратащ Екъуб жэуап: – ЩыдиӀэж иджы дэ ди адэм и лъапсэм Ӏыхьэрэ мылъкурэ?

¹⁵ Хамэхэм яхуэдэукъэ дэ абы дызэрилъытэр? Сыт щхьэкӀэ жыпӀэмэ абы дэ дищащ, уеблэмэ ишхащ ди дыжьынри.

¹⁶ Абы къыхэкӀкӀэ мылъкуу Тхьэм ди адэм къыӀрихар дыдейщ, ди бынхэми ейщ. Аращи, Тхьэм уэ къыбжиӀа псори щӀэ.

¹⁷ Арати, ежьащ Екъуб, тригъэтӀысхьащ и бынхэри и фызхэри махъшэхэм;

¹⁸ ИтӀанэ къыздищтащ езым и Ӏэщ псори, мылъкуу зыӀэригъэхьа псори, Паддан-Арам щиугъуея Ӏэщри и адэ Исхьэкъ деж Ханаан щӀыналъэм кӀуэжын папщӀэ.

¹⁹ Лабан езым и Ӏэщым я цыр къищыну щыкӀуэм, Рахэл къидыгъуащ и адэм иӀа тхьэ сурэтхэр.

²⁰ Екъуб арамей Лабан къыфӀидыгъуащ и гур, сыт щхьэкӀэ жыпӀэмэ абы хъыбар иригъэщӀакъым зэрежьэжынумкӀэ.

²¹ Арати, ежьэжащ езым иӀэ псори и гъусэу; зиӀэтщ, псым зэпрыкӀри, игъэзащ Гилеад бгымкӀэ.

²² Ещанэ махуэм Лабан жраӀащ Екъуб зэрежьэжар.

²³ Абы щыгъуэ абы зыщӀигъущ езым и Ӏыхьлыхэри, кӀэлъыжащ абы махуиблкӀэ икӀи щылъэщӀыхьащ Гилеад бгым деж.

²⁴ АрщхьэкӀэ Тхьэр арамей Лабан пщӀыхьым хэту жэщым къыхуэлъагъуэри, къыжриӀащ абы: – Зыхъумэ, жумыӀэ Екъуб Ӏеи фӀыи.

²⁵ Арати, лъэщӀыхьащ Лабан Екъуб; Екъуб и шэтырхэр тригъэуват бгыщхьэм, Лабани езым и Ӏыхьлыхэр и гъусэу и шэтырхэр тригъэуващ Гилеад бгым.

²⁶ ЖриӀащ Лабан Екъуб: – Сыт уэ зэхэпщӀыхьар? Сытым щхьэкӀэ уэ сыкъэбгъапцӀэу скӀэщӀэпша сипхъухэр, ӀэщэкӀэ гъэр ящӀахэм хуэдэу?

²⁷ Сыт щэхуу ущӀэпхъуэжу сэ зыщӀысщыбгъэпщкӀуар, къыщӀызжумыӀари сыт? Сэ узутӀыпщыжынут гуфӀэгъуэмрэ уэрэдхэмрэ ухэту, тимпанхэми пшынэми къыпхуеуэу.

²⁸ Уэ Ӏэмал къызэптакъым уеблэмэ си пхъурылъхухэми сипхъухэми ба яхуэсщӀыжыну; акъылыншагъэщ уэ пщӀар.

²⁹ Хэлъщ си Ӏэм къару фэ Ӏеягъэ фэсщӀэфыну; ауэ фи адэм и Тхьэр дыгъуасэ къызэпсалъэри, сэ къызжиӀащ: – Сакъ, жумыӀэ Екъуб Ӏеи фӀыи.

³⁰ – Ауэ уэ укӀуэжами зи хэлъкъым, сыту жыпӀэмэ уэ укъытричырт уи адэм и унэм уихьэжыну, ауэ сыт къыщӀэбдыгъуар-тӀэ си тхьэ сурэтхэр?

³¹ Екъуб Лабан жэуап иритурэ, жиӀащ: – Сэ сышынэрт; сыт щхьэкӀэ жыпӀэмэ «стумыхыжащэрэт уипхъухэр» жысӀэурэ сегупсысырти.

³² Уи тхьэ сурэтхэр хэт къыкъуэпхыжми, абы псэу иӀэжкъым. Ди Ӏыхьлыхэм я пащхьэм щызэхэгъэкӀ ууейуэ сӀыгъхэри, здэщтэж. Ауэ Екъуб ищӀэртэкъым ахэр Рахэл къызэридыгъуар.

³³ Арати, щӀыхьащ Лабан Екъуб и шэтырми, Леа и шэтырми, унэӀут бзылъхугъитӀым я шэтырми, ауэ игъуэтакъым зыри. ИтӀанэ Леа и шэтырым къыщӀэкӀыжри, щӀыхьащ Рахэл и шэтырым.

³⁴ Рахэл къищтащ тхьэ сурэтхэр, ахэр махъшэм телъ уанэм и щӀагъ щӀилъхьэри, тетӀысхьэжащ абыхэм. Къищащ Лабан шэтырыр зэрыщыту, ауэ игъуэтакъым.

³⁵ Мыдрейми жриӀащ и адэм: – Къысхуремыгубжь си зиусхьэныр и пащхьэм сызэрыщымытэджыфым папщӀэ; сыт щхьэкӀэ жыпӀэмэ бзылъхугъэ хабзэр къысхуэкӀуащ. Арати, ар лъыхъуащ, ауэ игъуэтакъым тхьэ сурэтхэр.

³⁶ Екъуб къэгубжьри, Лабан едауэу щӀидзащ. Екъуб псэлъэн къыщӀидзэри, жриӀащ Лабан: – Сыт си лажьэр, гуэныхьу стелъри сыт, щхьэ зэхэзехуэн сыпщӀа?

³⁷ Уэ къыуплъыхьащ си хьэпшып псори, сыт къахэбгъуэтар уи унэ хьэпшыпхэм ящыщу? Щыдгъэлъагъу уи Ӏыхьлыхэми си Ӏыхьлыхэми я пащхьэм деж; къытхурехъу дэ тӀум ахэр хеящӀэ.

³⁸ – Мис, илъэс тӀощӀкӀэ сыщыӀащ сэ уи деж; уи мэлхэми уи бжэнхэми щыщанэжа къэхъуакъым; уэ хъушэм щыщ мэли сэ сшхакъым;

³⁹ ХьэкӀэкхъуэкӀэм зэпкъритхъар сэ ныпхуэсхьыжакъым; ар сэ схэщӀауэт зэрызбжыр; сэ сыбгъэпшынырт жэщым кӀуэдари, махуэм кӀуэдари.

⁴⁰ Сэ гугъу сехьырт махуэм хуабэкӀэ, жэщми щӀыӀэкӀэ; си нэхэми жейр къекӀуэртэкъым.

⁴¹ Апхуэдэххэщ илъэс тӀощӀу уи унэм щызгъэкӀуар. Сэ уэ сыпхуэлэжьащ илъэс пщыкӀуплӀкӀэ уи пхъуитӀым папщӀэ, илъэсихкӀэ уи Ӏэщым папщӀэ; атӀэми уэ пщӀэнейрэ пхъуэжащ си лэжьапщӀэр.

⁴² Си адэм и Тхьэр, Ибрэхьим и Тхьэр икӀи Исхьэкъ и Шынагъуэр си мыгъусатэмэ, уэ иджы сыбутӀыпщыжынут ӀэнэщӀу. Тхьэм къилъэгъуащ си тхьэмыщкӀагъэри си Ӏэхэм ялэжьари, икӀи къысхуищӀащ хьэкум дыгъуасэ.

Екъубрэ Лабанрэ зэгурыӀуэныгъэ зэрызэдащӀар

⁴³ Лабан жэуап къитри къыжриӀащ Екъуб: – Пхъухэр сипхъущ; сабийхэр си сабийщ; Ӏэщри си Ӏэщщ, уэ плъагъу псори сысейщ: сэ зыгуэр есщӀэфыну-тӀэ сипхъухэми абыхэм къалъхуа сабийхэми?

⁴⁴ Иджы зэгурыӀуэныгъэ зэдухылӀэнщ уэрэ сэрэ, ар щыхьэт щыхъунщ уэрэ сэрэ ди якум.

⁴⁵ Екъуб мывэ къищтэри игъэуващ ар фэеплъу.

⁴⁶ ЯжриӀащ Екъуб езым и Ӏыхьлыхэм: – КъызэщӀэфкъуэ мывэхэр. Абыхэм мывэхэр къащтэурэ Ӏуащхьэу зэтралъхьащ, итӀанэ щышхащ мывэхэм деж.

⁴⁷ Лабан фӀищащ абы: Егъар-Сахъадут; ауэ Екъуб абы фӀищар Гъаледщ.

⁴⁸ ИтӀанэ жиӀащ Лабан: – Нобэ мы Ӏуащхьэр уэрэ сэрэ ди якум щыщыхьэтщ. Аращ Галеед цӀэуэ щӀыфӀищар.

⁴⁹ Мицпэри жраӀэ Лабан мыпхуэдэу зэрыжиӀам щхьэкӀэ: – КъыткӀэлъреплъ Зиусхьэныр уэри сэри, дыщызэрымылъагъужым деж.

⁵⁰ Сипхъухэм Ӏейуэ уахущытмэ, е сипхъухэм нэмыщӀ нэгъуэщӀ фызхэр къапшэмэ, дэ ди якум цӀыху дэмытми, еплъ, Тхьэр щыхьэту дэтщ уэрэ сэрэ ди якум.

⁵¹ – Мы Ӏуащхьэм еплъ, – жриӀащ Лабан Екъуб, – ар уэрэ сэрэ ди якум фэеплъу сэ дэзгъэуващ.

⁵² Мы Ӏуащхьэр щыхьэтщ, мы фэеплъри щыхьэтщ Ӏеягъэ щхьэкӀэ сэ мы Ӏуащхьэм уи дежкӀэ сынызэрыфӀэмыкӀынумкӀэ, уэри си дежкӀэ мы Ӏуащхьэм укъызэрыфӀэмыкӀынумкӀэ.

⁵³ Ибрэхьим и Тхьэмрэ Нахъор и Тхьэмрэ ди якум хеящӀэу дрет, абыхэм я адэм и Тхьэр. Екъуб тхьэлъанэ ищӀащ езым и адэ Исхьэкъ и цӀэкӀэ.

⁵⁴ ИкӀи щиукӀащ Екъуб къурмэныпхъэр Ӏуащхьэм деж, къриджащ езым и Ӏыхьлыхэр щӀакхъуэ яшхыну; абыхэм яшхащ щӀакхъуэ, нэхуи щагъэщащ Ӏуащхьэм деж.

⁵⁵ Къэтэджащ Лабан пщэдджыжьым жьыуэ, ба яхуищӀщ и пхъурылъхухэми ипхъухэми, Тхьэм и нэфӀ къащихуэну хуелъэӀуащ абыхэм. ИтӀанэ ежьэжри, кӀуэжащ Лабан езым и щӀыпӀэм.