1 Мусэ 30 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Рахэл Екъуб сабий къызэрыхуимылъхуфыр къыщилъагъум, езым и шыпхъум ефыгъуэри, жриӀащ Екъуб: – Къызэт бынхэр; къызумытмэ, сылӀэнущ.

² Екъуб Рахэл хуэгубжьри, жиӀащ: – Сэ сыхъуа уи кӀуэцӀым зыри ирезымыгъащӀэ Тхьэ?

³ – Мис си унэӀут бзылъхугъэ Билхьэ, – жиӀаш Рахэл, – щӀыхьэ абы деж: щрелъхуэ си лъэгуажьэхэм деж ар, абы къилъхуауэ сэри бынхэр сиӀэн папщӀэ.

⁴ Арати, иритащ абы Билхьэ, езым и унэӀут бзылъхугъэр, абы игъэфызыну; Екъуб щӀыхьащ абы деж.

⁵ Билхьэ уэндэгъу хъури, Екъуб къыхуилъхуащ къуэ.

⁶ Абы щыгъуэ жиӀащ Рахэл: – Хьэкум къысхуищӀащ сэ Тхьэм, – жиӀащ Рахэл, – си лъэӀур зэхихри, къызитащ къуэ. Абы къыхэкӀыу фӀищащ абы цӀэуэ Дан.

⁷ Аргуэру лъэщыджэ хъуащ Билхьэ, Рахэл и унэӀут бзылъхугъэр, икӀи Екъуб къыхуилъхуащ къуэ етӀуанэр.

⁸ – Бэнэныгъэ лъэщкӀэ си шыпхъум себэнри сытекӀуащ, – жиӀащ Рахэл. Абы къыхэкӀыу фӀищащ абы цӀэуэ Нафталий.

⁹ Леа езыр зэрымылъхуэжыр къыщилъагъум, и унэӀут бзылъхугъэ Зилпэ къищтэри, ар иритащ Екъуб игъэфызыну.

¹⁰ Леа и унэӀут бзылъхугъэ Зилпэ къыхуилъхуащ Екъуб къуэ итӀанэ.

¹¹ ЖиӀащ абы щыгъуэ Леа: – Си насыпым къихьащ. Абы къыхэкӀыу фӀищащ абы цӀэуэ Гад.

¹² Леа и унэӀут бзылъхугъэ Зилпэ етӀуанэрейуи къуэ Екъуб къыхуилъхуащ.

¹³ ЖиӀащ Леа: – Гъуэгу махуэ сытеуващ; сыт щхьэкӀэ жыпӀэмэ насыпыфӀэкӀэ къызэджэнущ сэ бзылъхугъэхэр. ИкӀи фӀищащ абы цӀэуэ Ащэр.

¹⁴ Реувен кӀуащ губгъуэм, гуэдзыр щыӀуахыж зэманым, губгъуэм къыщигъуэтри, къыхуихьащ ахэр Леа, езым и анэм. Рахэл Леа жриӀащ абдежым: – Къызэт уи къуэм и мандрагорхэр.

¹⁵ Ауэ абы къыжриӀэжащ: – УфӀэмащӀэу ара уэ си лӀыр зызэрыӀэщӀэбгъэхьар, иджы си къуэм и мандрагорхэри зыӀэщӀэбгъэхьэну ухэт? – Апхуэдэу щыхъуакӀэ, – жиӀащ Рахэл, – ар мы жэщым уэ къыбдрегъуэлъ, уи къуэм и мандрагорхэм папщӀэ.

¹⁶ Екъуб пщыхьэщхьэм губгъуэм къыщикӀыжам, Леа абы пежьэри, жриӀащ: – КъыщӀыхьэ си деж; си къуэм и мандрагорхэмкӀэ укъэсщэхуащи. Арати, дэгъуэлъащ Екъуб Леа а жэщым.

¹⁷ Тхьэм зэхихащ Леа и лъэӀур, ар уэндэгъу хъури, къыхуилъхуащ Екъуб къуэ етхуанэр.

¹⁸ ЖиӀащ абы щыгъуэ Леа: – Тхьэм сэ си лӀым си унэӀут бзылъхугъэр зэрестам пэкӀуэр къызитыжащ. Абы къыхэкӀыу фӀищащ абы цӀэуэ Иссашкар.

¹⁹ Леа аргуэру уэндэгъу хъури, къыхуилъхуащ Екъуб къуэ еханэр.

²⁰ ЖиӀащ абы щыгъуэ Леа: – Тхьэм къызитащ тыгъэ гъуэзэджэ; иджы си лӀым щӀыхь къысхуищӀынущ, сыт щхьэкӀэ жыпӀэмэ къыхуэслъхуащ абы къуих. Абы къыхэкӀыу фӀищащ абы цӀэуэ Зэбулун.

²¹ ИтӀанэ къилъхуащ пхъу икӀи фӀищащ абы цӀэуэ Динэ.

²² Тхьэм игу къэкӀыжащ Рахэл, ар Тхьэм зэхихри лъхугъэ иӀэну Ӏэмал къритащ.

²³ Ар уэндэгъу хъури, къилъхуащ къуэ, икӀи жиӀащ: – Сщхьэщихащ Тхьэм си емыкӀур.

²⁴ ИкӀи фӀищащ абы цӀэуэ Исуф. – Зиусхьэным сэ къызрет иджыри къуэ, – жиӀэри.

Екъуб Лабан зэрэхуэлэжьамрэ бей зэрыхъуамрэ

²⁵ Рахэл Исуф къилъхуа нэужь, Екъуб Лабан жриӀащ: – СутӀыпщыжи, сыкӀуэжынщ сэ си щӀыпӀэм, си щӀыналъэм.

²⁶ Къызэтыж сэ сыщӀыпхуэлэжьа си фызхэмрэ си бынхэмрэ, сэ сыкӀуэжынщ; уэ ущыгъуазэщ сэ фӀыуэ сызэрыпхуэлэжьам.

²⁷ Лабан къыжриӀащ абы: – НэфӀкӀэ укъызэплъмэ, мыр жысӀэну хуит сыщӀ. Сэ джэш дзынымкӀэ зэзгъэщӀащ уи хьэтыркӀэ Зиусхьэным и нэфӀ къызэрысщыхуам.

²⁸ АдэкӀи жиӀащ: – Уэстыну пщӀэр уэ зыхуэгъэувыжи, сэ уэстынщ.

²⁹ – Уэ уощӀэ сэ сызэрыпхуэлэжьа щӀыкӀэри сэ сапэрыту уи Ӏэщыр зэрыбэгъуари, – жриӀащ Екъуб абы.

³⁰ – Си япэкӀэ мащӀэ фӀэкӀа уимыӀамэ, иджы хъуащ куэд; сэ дэнэ сыкӀуами, Зиусхьэным и нэфӀ къыпщигъэхуащ; ауэ сыт щыгъуэ сэ сыщыхуэлэжьэнур си унагъуэм?

³¹ – Сыт уэстын? – къеупщӀащ Лабан. – Зыри къызумыт, – жиӀащ Екъуб. – Сэ жыхуэсӀэр къысхуэпщӀэмэ, аргуэру пхуэзгъэхъунщ икӀи пхуэсхъумэнщ уи мэлхэри уи бжэнхэри.

³² Сэ сыпхрыкӀынщ нобэ уи мэл, бжэн хъушэм; къыхэгъэкӀ абы мэлу бжьыгъэ зыхэлъри къуэлэнри, мэлхэм ящыщу мэл фӀыцӀэри, апхуэдэуи бжэнхэм ящыщу бжьыгъэ зыхэлъри къуэлэнри. Апхуэдэ Ӏэщыр схурехъу сэ лэжьапщӀэ.

³³ ИтӀанэ си лэжьапщӀэм уеплъыну укъыщыкӀуэ нэгъуэщӀ зэманым деж си захуагъэр нэрылъагъу щыхъунщ уи пащхьэм деж. Бжьыгъэ зыхэмылъ е мыкъуэлэн бжэнхэм, мэлхэм ящыщу мыфӀыцӀэу сиӀэр къэдыгъуащ.

³⁴ – Хъарзынэщ, ирехъу уэ зэрыжыпӀауэ, – жиӀащ Лабан.

³⁵ АрщхьэкӀэ къыхигъэкӀащ Лабан а махуэм ажэ къуэлэнхэмрэ бжьыгъэ зиӀэхэмри, бжэну бжьыгъэ зыхэлъхэри къуэлэнхэри, хужь тӀэкӀу фӀэкӀа зыхэмыт псори, мэл фӀыцӀэ псори, икӀи яӀэщӀилъхьащ езым и къуэхэм.

³⁶ Езымрэ Екъубрэ я зэхуакум махуищ гъуэгу я зэпэжыжьагъыу игъэуващ. Екъуб игъэхъурт Лабан и адрей Ӏэщ цӀыкӀухэр.

³⁷ Екъуб щиху, миндал, тхушэ чы цӀынэ цӀыкӀухэр къищтэри, къуэлэн кусэхэр яхуищӀащ, чы цӀыкӀухэм ятелъ фэр трихри;

³⁸ А чы дэбзыкӀахэр Ӏэщхэр псы ефэну къыздекӀуалӀэ хьэкхъуафэхэм ирилъхьащ. Абдеж псафэ къыщыкӀуэкӀэ, Ӏэщхэр щызэкӀуалӀэу я хабзэт.

³⁹ Чыхэм я пащхьэм щызэкӀуалӀэрти, къалъхурт Ӏэщ къуэлэни, ӀэпапӀэ зыхэти, бжьыгъэ зиӀи.

⁴⁰ Екъуб щынэхэр къыхигъэкӀырти, и былымхэр Лабан и Ӏэщ къуэлэнымрэ и Ӏэщ фӀыцӀэмрэ я пэ зэкӀуэлӀэнухэм папщӀэ къригъэувэрт; Екъуб иӀыгът езым и хъушэхэр щхьэхуэу, яхигъэхьэртэкъым ахэр Лабан и Ӏэщым.

⁴¹ Ӏэщ гуащӀафӀэр щыхуажэкӀэ, Екъуб сыт щыгъуи ирилъхьэрт чыхэр хьэкхъуафэм, Ӏэщхэм ялъагъуу, чыхэм я пащхьэм ахэр щызэкӀуэлӀэн папщӀэ.

⁴² Ауэ Ӏэщ къарууншэхэр щыхуажэм деж чы игъэтӀылъыртэкъым. Апхуэдэуи лъысырт Ӏэщ къарууншэхэр Лабан, Ӏэщ гуащӀафӀэхэр Екъуб.

⁴³ Арати, хъуащ Екъуб икъукӀэ, икъукӀэ бей, иӀэт абы Ӏэщ цӀыкӀу куэди, унэӀут бзылъхугъэ, хъулъхугъэ куэди, махъшэ куэди, шыд куэди.