1 Мусэ 28 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Къриджащ Исхьэкъ Екъуб, и нэфӀ щигъэхуащ, унафэуи мыр хуищӀащ: – Къыумышэ ханаан цӀыхубзхэм ящыщ фызу.

² Тэдж, кӀуэ Паддан-Арам, уи анэм и адэ Бэтуел и унэм, къиш абы фызу уи анэм и дэлъху Лабан ипхъухэм ящыщ.

³ Псори зыхузэфӀэкӀ Тхьэм и нэфӀ къыпщрехуэ. Урегъэбагъуэ икӀи ухрегъахъуэ, къыптрехъукӀ уэ цӀыху лъэпкъ куэдыр;

⁴ Апхуэдэуи къыплърегъэс Тхьэм Ибрэхьим къылъигъэса нэфӀыр, уэри уэ къыптехъукӀыну бынхэми, Тхьэм Ибрэхьим кърита щӀыналъэу уэ хамэу узыщыпсэур уэ къыпхуэнэжьыну.

⁵ Арати, Исхьэкъ иутӀыпщащ Екъуб, икӀи ар кӀуащ Паддан-Арам, арамей лъэпкъым щыщ Бэтуел и къуэ, Екъубрэ Эсаурэ я анэ Ребеккэ и дэлъху Лабан деж.

Эсау Исмэхьил ипхъу къызэришар

⁶ Эсау илъэгъуащ Исхьэкъ и нэфӀ Екъуб зэрыщигъэхуар икӀи и нэфӀ къыщигъэхуауэ ар Паддан-Арам, абы фыз къришын папщӀэ, зэригъэкӀуар, «Къыумышэ ханаан бзылъхугъэхэм ящыщ фызу» жиӀэуи абы унафэ зэрыхуищӀар.

⁷ Екъуб и адэмрэ и анэмрэ едаӀуэу Паддан-Арам зэрыкӀуари илъэгъуащ Эсау.

⁸ Абдеж къыгурыӀуащ Эсау ханаан бзылъхугъэхэр езым и адэ Исхьэкъ зэрыфӀэмыфӀыр.

⁹ Арати, Эсау Исмэхьил деж кӀуэри, къишащ фызу Махъалат, Ибрэхьим и къуэ Исмэхьил и пхъур, Нэбаиот и шыпхъур, адрей и фызхэм я щӀыӀужкӀэ.

Екъуб и пщӀыхьэпӀэр

¹⁰ Екъуб Бэр-Шэвэ икӀри кӀуащ Харан.

¹¹ ЩӀыпӀэ гуэрым нэсри къыщынащ абдежым нэху къыщекӀыну, дыгъэр къухьати. А щӀыпӀэм деж щылъ мывэхэм ящыщ зы къищтэщ, ар пӀэщхьагъыу игъэтӀылъри, щыгъуэлъащ а щӀыпӀэм.

¹² Абдежым илъэгъуащ пщӀыхьу: пкӀэлъей тетщ щӀылъэм, уафэм щӀэуэу; Тхьэм и мелыӀычхэри къох икӀи докӀуей абыкӀэ.

¹³ ИкӀи Зиусхьэныр абы ищхьэкӀэ тетщи, жеӀэ: – Зиусхьэныр, уи адэ Ибрэхьими Исхьэкъи я Тхьэр, Сэращ. Уэ узытелъ щӀыналъэр Сэ фэстынущ уэри къыптехъукӀыну бынхэми.

¹⁴ ИкӀи хъунущ уэ къыптехъукӀыну цӀыхухэр щӀылъэ пшахъуэм и бжыгъэм хуэдизу куэд; щыпсэунущ ахэр къухьэпӀэмкӀи къуэкӀыпӀэмкӀи, ищхъэрэкӀи ипщэкӀи; уэрэ уэ къыптехъукӀыну цӀыхухэмрэ фи хьэтыркӀэ си нэфӀ ящызгъэхуэнущ дунейм и лъэпкъ псоми.

¹⁵ Зыщумыгъэгъупщэ, Сэ сыуигъусэщ; икӀи ущысхъумэнущ дэнэ дежи, дэнэ укӀуэми, икӀи къозгъэгъэзэжынущ уэ мы щӀыналъэм; уи закъуэу укъэзгъэнэнукъым, бжэсӀар Сэ згъэзэщӀэху.

¹⁶ Екъуб къызэщыури, жиӀащ: – Хьэкъщ Зиусхьэныр мы щӀыпӀэм зэрыщыӀэр; ар сэ сщӀакъым!

¹⁷ ИкӀи къэшынэри, жиӀащ: – Сыту шынагъуэ мы щӀыпӀэр! Мыр Тхьэ унэщ, мыр уафэхэм я куэбжэщ, армыхъу нэгъуэщӀкъым.

¹⁸ Къэтэджащ Екъуб пщэдджыжьым жьыуэ, пӀэщхьагъыу игъэтӀылъыгъа мывэр къищтэри игъэуващ ар фэеплъу; трикӀащ абы и щхьэм дагъэ.

¹⁹ ФӀищащ а щӀыпӀэм цӀэуэ Бэтэл; а къалэм япэм и цӀэу щытар Лузщ.

²⁰ Екъуб тхьэлъанэ ищӀащ: – Тхьэр си гъусэмэ, сэ сызытет гъуэгум сыкъыщихъумэмэ, сшхыну щӀакхъуэрэ щыстӀэгъэну щыгъынрэ къызитмэ,

²¹ икӀи сэ мамырыгъэкӀэ си адэм и унэм згъэзэжмэ, абы щыгъуэ Зиусхьэныр си Тхьэ хъунущ,

²² Фэеплъу сэ згъэува мы мывэри хъунущ Тхьэм и унэ; Уэ, Тхьэ, тыгъэ къысхуэпщӀ псоми ящыщу Ӏыхьэ пщӀанэри сэ Уэ уэстынщ.