1 Мусэ 27 - ХъыбарыфӀыр. ЩӀэдзапӀэр. Уэрэд ЛъапӀэхэр

Исхьэкъ и нэфӀ Екъуб къызэрыщыхуар

¹ Исхьэкъ жьы икӀи набгъэ щыхъум, и къуэ нэхъыжь Эсау къриджэри, жриӀащ абы: – Си къуэ! – Сымис сэ, – жиӀащ адрейм.

² – Мис, сэ жьы сыхъуащ, – жиӀащ Исхьэкъ. – СыщылӀэну махуэр сщӀэркъым.

³ Къащтэ иджы уи Ӏэщэхэр, уи шабзалъэри уи шабзэри, губгъуэм кӀуэи, къысхуэщэкӀу губгъуэ псэущхьэ.

⁴ Шхыныгъуэу сэ фӀыуэ слъагъур схуэгъэхьэзыри, къысхуэхь сшхыну, сылӀэн и пэ си нэфӀ къыпщызгъэхуэн папщӀэ.

⁵ Ребеккэ зэхихащ Исхьэкъ езым и къуэ Эсау жриӀар. Арати, псэущхьэ къищэкӀуу къихьыну Эсау губгъуэм щыкӀуэм,

⁶ Ребеккэ жриӀащ и къуэ Екъуб: – Сэ зэхэсхащ уи адэм уи къуэш Эсау мыпхуэдэу зэрыжриӀар:

⁷ «Къысхуэхь губгъуэ псэущхьи, схуэгъэхьэзыр шхыныгъуэ, сэ сышхэнщ, Зиусхьэным и пащхьэ и нэфӀ къыщыпщызгъэхуэн щхьэкӀэ».

⁸ Иджы, си къуэ, къедаӀуэ си псалъэхэу сэ унафэ зэрыпхуэсщӀхэм.

⁹ Ӏэхъушэм кӀуэи, къысхуэхь хэплъыхьауэ чыцӀ цӀыкӀуитӀ; хуэспщэфӀынщ уи адэм фӀыуэ илъагъу шхыныгъуэр;

¹⁰ Уи адэм ар хуэпхьынщи, ишхынщ, езыр лӀэн и пэкӀэ и нэфӀ къыпщигъэхуэн папщӀэ.

¹¹ АрщхьэкӀэ Екъуб жриӀащ Ребеккэ, и анэм: – Эсау, си къуэшыр, цӀыху цыбэщ, ауэ сэ сыджафэщ.

¹² КъыстеӀэбэнкӀэ хъунущ си адэр; итӀанэ сыщыхъунущ абы и пащхьэм пцӀыупс, сэ къыслъысынури нэлатщ, и нэфӀ къысщыхуэнукъым.

¹³ – Сэ къыслърес уэ уи нэлатыр, си къуэ, – къыжриӀащ и анэм абы, – ауэ къедаӀуэ си псалъэм, кӀуэи, къысхуэхь.

¹⁴ Екъуб кӀуэщ, чыцӀхэр къищтэри къыхуихьащ и анэм; абы и анэм ищӀащ абы и адэм фӀыуэ илъагъу шхыныгъуэр.

¹⁵ ИтӀанэ Ребеккэ и къуэ нэхъыжь Эсау и щыгъын дэгъуэу и унэм щӀэлъыр къыщтэри щитӀэгъащ ар и къуэ нэхъыщӀэ Екъуб.

¹⁶ Ауэ абы и Ӏэхэми и пщэ пцӀанэми къришэкӀащ чыцӀ цӀыкӀухэм я фэр.

¹⁷ ИкӀи ӀэщӀилъхьащ и къуэ Екъуб езым игъэхьэзыра шхыныгъуэмрэ щӀакхъуэмрэ.

¹⁸ Ар и адэм деж щӀыхьэри, жиӀащ: – Си адэ! – Сымис сэ; уэ ухэт, си къуэ? – жиӀащ адрейм.

¹⁹ – Сэ сы-Эсаущ, уи щыпэлъхурщ, – жриӀащ Екъуб и адэм, – сэ сщӀащ уэ зэрыжыпӀауэ; зыкъэӀэт, къэтӀыс, къызэфӀэтӀысхьи, шхы си губгъуэ псэущхьэр, уи нэфӀ къысщыбгъэхуэн папщӀэ.

²⁰ – Сыту псынщӀэу ар къэбгъуэта, си къуэ! – еупщӀащ Исхьэкъ и къуэм. – Зиусхьэну уи Тхьэм къыспригъэжьати, аращ, – жиӀащ абы.

²¹ – Къызбгъэдыхьэ, сэ сыноӀэбынщ, си къуэ, Эсаур уэрауэ пӀэрэ хьэмэрэ уэрмырарэ? – жриӀащ Исхьэкъ Екъуб.

²² Екъуб бгъэдыхьащ Исхьэкъ, и адэм; ар къытеӀэбащ абы, икӀи жиӀащ: – Макъыр Екъуб ейщ, ауэ Ӏэхэр Эсау ейщ.

²³ КъицӀыхужакъым ар, сыт щхьэкӀэ жыпӀэмэ абы и Ӏэхэр яхуэдэт и къуэш Эсау и Ӏэхэм, цыбэу; арати, и нэфӀ къыщигъэхуэну хэтащ.

²⁴ – Уэра си къуэ Эсаур? – аргуэру еупщӀащ ар. – Сэращ, – жэуап итащ абы.

²⁵ – Къызэт, сэ сшхынщ губгъуэ псэущхьэм щыщ, си нэфӀ къыпщыхуэн папщӀэ, – жиӀащ Исхьэкъ Екъуб иритри, ар шхащ; къыхуихьащ абы сани, абыи ефащ.

²⁶ ИтӀанэ Исхьэкъ, абы и адэм, къыжриӀащ: – Къызбгъэдыхьэ, ба къысхуэщӀ, си къуэ.

²⁷ Екъуб бгъэдыхьэри, и адэм ба хуищӀащ. Абдеж Исхьэкъ къыщӀихьащ абы и щыгъыным и мэр, икӀи и нэфӀ щигъэхуащ абы, мыр жиӀэурэ: – Мис си къуэм и мэр, Зиусхьэным и нэфӀ зыщыхуа губгъуэм и мэм хуэдэр.

²⁸ Кърыует Тхьэм уэ уэсэпсым къыхэкӀри щӀы пшэрым къыхэкӀри, гъавэ куэди санэ куэди.

²⁹ Къыпхурелажьэ цӀыху лъэпкъхэр, зыкъыпхурагъэщхъ цӀыху лъэпкъ цӀыкӀухэм; яхуэхъу зиусхьэн уи Ӏыхьлыхэм, зыкъыпхурагъэщхъ уи анэм и къуэхэми; уэ нэлат къозыххэм нэлат ялърес; уэ зи нэфӀ къыпщызыгъахуэхэм Тхьэм и нэфӀ къащрехуэ.

Исхьэкъ и нэфӀ Эсау къызэрыщыхуар

³⁰ Исхьэкъ и нэфӀ Екъуб щыхуэри, Екъуб и адэ Исхьэкъ и пащхьэ къикӀыжа къудейуэ, Эсау, абы и къуэшыр, къикӀыжащ щакӀуэ.

³¹ Игъэхьэзыращ абыи шхыныгъуэр, и адэм хуихьри жриӀащ: – Къэтэджи, си адэ, шхы уи къуэм и губгъуэ псэущхьэр, уи нэфӀ сэ къысщыбгъэхуэн папщӀэ.

³² – Уэ ухэт? – къыжриӀащ Исхьэкъ, абы и адэм. – Сэ сыуикъуэщ, уи щыпэлъху Эсаущ, – жиӀащ абы.

³³ Абдеж Исхьэкъ хуабжьу къэщтауэ къэкӀэзызри, жиӀащ: – Хэт атӀэ адрейр, губгъуэ псэущхьэ къэзыщэкӀуу къысхуэзыхьар? Уэ укъэкӀуэжын и пэ а псом щыщи сшхыуэ си нэфӀи щызгъэхуащ абы. Аращ иджы си нэфӀыр зылъысынур.

³⁴ Эсау и адэм и псалъэхэм щӀэдэӀури, игу хуабжьу хэщӀауэ, макъышхуэкӀэ и адэм жриӀащ: – Си адэ! Уи нэфӀ къысщыгъахуэ сэри.

³⁵ Ауэ Исхьэкъ жиӀащ: – Уи къуэшыр къакӀуэри си нэфӀ хьилагъэкӀэ зыщигъэхуащ.

³⁶ ЖиӀащ итӀанэ мыдрейм: – Техуэркъэ абы Екъуб цӀэ зэриӀэр – тӀэунейрэ сыкъигъэпцӀащ: си щыпэлъхугъэр ищтащ абы иджы, зылъигъэсащ уи нэфӀыр. АдэкӀи жиӀащ: – АтӀэ сэ къысхуумыгъэнэххауэ ара уи нэфӀ?

³⁷ Исхьэкъ жэуап къритащ Эсау: – Сэ пхуэзгъэуващ ар зиусхьэну уэ, зэкӀэ абы и Ӏыхьлыхэри хуэсщӀащ унэӀут; сетащ гъавэкӀи фадэкӀи; атӀэ сыт уэ пхуэсщӀэжынур, си къуэ?

³⁸ – Дауэ хъун, си адэ, – жриӀащ Эсау и адэм, – уэ зы нэфӀ щыхуэныгъэ закъуэ фӀэкӀа уимыӀэу? Уи нэфӀ къыслъыгъэс сэри, си адэ! ИкӀи зригъэӀэтащ Эсау и макъым, къэгъащ ар.

³⁹ Абдеж жэуап къитащ Исхьэкъ, абы и адэм, мыпхуэдэу къыжриӀэри: – ЩӀым и пшэрми уафэм къех уэсэпсми пэжыжьэу щыӀэнущ уи псэупӀэр.

⁴⁰ Упсэунущ уэ уи джатэмкӀэ, ухуэлэжьэнущ уи къуэшым; щыӀэнущ зэмани, абы упэщӀэувэу и тепщэныгъэр уи пщэм щыдэбдзын.

Эсау ӀэщӀэкӀыу Екъуб зэрыщӀэпхъуэжар

⁴¹ Эсау илъагъу мыхъу хъуащ Екъуб, абы и адэм и нэфӀыр зэрызыщигъэхуам папщӀэ; жиӀащ Эсау игукӀэ: «Къоблагъэ ди адэм папщӀэ дыщыщыгъуэн махуэр; абы щыгъуэ сэ сыукӀынущ си къуэш Екъуб».

⁴² ЖраӀэжащ Ребеккэ и къуэ нэхъыжь Эсау и псалъэхэр; Арати, Ребеккэ игъакӀуэри къригъэшащ и къуэ нэхъыщӀэ Екъуб, жриӀащ абы: – Уи къуэш Эсау уиукӀыну мэдалъэ.

⁴³ Аращи, си къуэ, иджы къыщӀэдэӀу си псалъэхэм: зыӀэти, щӀэпхъуэж Харан хэкум щыпсэу си дэлъху Лабан деж.

⁴⁴ Щыпсэу абы и деж зэман гуэркӀэ, уи къуэшым и губжьыр ужьыхыжыху,

⁴⁵ уи къуэшым къыпхуиӀэ губжьыр ужьыхыжу абы епщӀар щыгъупщэжыху. Абдежым сэ нэзгъэкӀуэнщи, укъисшыжынщ абы. Сытым щхьэкӀэ фысфӀэкӀуэдын хуей фэ тӀури зы махуэм?

⁴⁶ ЖриӀащ Ребеккэ Исхьэкъ итӀанэ: – Хет бзылъхугъэхэм щхьэкӀэ си гъащӀэри сфӀэӀэфӀыжкъым; мы щӀыналъэм щыщ бзылъхугъэхэу мы хет бзылъхугъэхэм яхуэдэхэм ящыщ Екъуб фызу къишэмэ, сыт сэ гъащӀэми сызэрыхуеижыр?