1 Мусэ 25 - ХъыбарыфӀыр. ЩӀэдзапӀэр. Уэрэд ЛъапӀэхэр

Къэтурэ Ибрэхьим къыхуилъхуа бынхэмрэ Ибрэхьим зэрылӀамрэ

¹ Къишащ Ибрэхьим аргуэру фыз, Къэтурэ и цӀэу.

² Къэтурэ къыхуилъхуащ абы Зимран, Иокъшан, Мэдан, Мидиан, Ищбакъ, Шыуахъ сымэ.

³ Иокъшан къыхуэхъуащ Щэбэрэ Деданрэ. Дедан къытехъукӀахэр: ашур цӀыхухэр, лэтуш цӀыхухэр, лэум цӀыхухэр.

⁴ Мидиан и къуэхэр: Ӏэфэ, Ӏэфэр, Хъанох, АбидаӀ, ЕлдаӀа. Ахэр псори Къэтурэ къытехъукӀащ.

⁵ Ибрэхьим езым бгъэдэлъу хъуар Исхьэкъ иритащ.

⁶ Ибрэхьим унэӀуту иӀа бзылъхугъэхэм я къуэхэми яритащ саугъэтхэр. ИтӀанэ езыр псэу щӀыкӀэ, бгъэдигъэкӀащ ахэр Исхьэкъ, езым и къуэм пэжыжьэу, къуэкӀыпӀэмкӀэ щыӀэ щӀыналъэмкӀэ игъэкӀуащ.

⁷ Ибрэхьим къигъэщӀащ илъэсищэрэ блыщӀрэ тхурэ.

⁸ Дунейм ехыжащ Ибрэхьим; жьыщхьэ махуэ хъуауэ, и ныбжьыр хэкӀуэтэпауэ, гъащӀэм гу щихуауэ лӀащ ар, хыхьэжащ езым и лъэпкъым.

⁹ ЩыщӀалъхьэжащ ар абы и къуэхэу Исхьэкърэ Исмэхьилрэ хет лъэпкъым щыщ Цохар и къуэ Ефрон и губгъуэу Мамрэ пэщылъым щыӀэ Махпелэ бгъуэнщӀагъым.

¹⁰ А губгъуэращ хет цӀыхухэм я деж Ибрэхьим къыщищэхуауэ щытар. Абдежым щыщӀалъхьэжащ Ибрэхьими абы и фыз Сари я хьэдэхэр.

¹¹ Ибрэхьим лӀа нэужь, Тхьэм и нэфӀ къыщыхуащ абы и къуэ Исхьэкъ. Исхьэкъ щыпсэурт Бэр-Лахъай-Рой деж.

Исмэхьил къытехъукӀахэр

¹² Мис Ибрэхьим и къуэу Исмэхьил къытехъукӀа цӀыхухэр; Исмэхьил Сарэ и ӀунэӀут бзылъхугъэ Хьэджэр, Мысырым щыщым, Ибрэхьим къыхуилъхуа къуэр.

¹³ Аращи, мис Исмэхьил и къуэхэм я цӀэхэр, ахэр къызэралъхуам елъытауэ: Исмэхьил и щыпэлъху Нэбаиот, абы и ужькӀэ Къэдар, Адбэл, Мибсам,

¹⁴ МишмаӀ, Думэ, Масэ,

¹⁵ Хъадад, Тэма, Етур, Нафиш икӀи Къэдэмэ.

¹⁶ Ахэр Исмэхьил и къуэхэщ, икӀи ахэрщ я цӀэхэр, я жылэхэм, я куэшыпӀэхэм елъытауэ. Ахэр я лъэпкъхэм я пщы пщыкӀутӀщ.

¹⁷ Исмэхьил и ныбжьыр хъурт илъэсищэрэ щэщӀрэ блырэ; дунейм ехыжащ ар, лӀащ, хыхьэжащ езым и лъэпкъым.

¹⁸ Ахэр щыпсэуащ Хьауилэ щыщӀэдзауэ Мысырым пэщылъ Шурэм нэсу, Ашур ущыхуэкӀуэкӀэ. Ахэр зэгурымыӀуэныгъэкӀэ псэуащ.

Эсаурэ Екъубрэ Ребеккэ къызэрыхуэхъуар

¹⁹ Мис Исхьэкъ, Ибрэхьим и къуэм, къытехъукӀа цӀыхухэр. Ибрэхьим къыхуэхъуащ Исхьэкъ.

²⁰ Исхьэкъ илъэс плӀыщӀ хъурт абы Ребеккэ, Паддан-Арам щыщ арамей Бэтуел и пхъур, арамей Лабан и шыпхъур, фызу къыщишам.

²¹ Зиусхьэным елъэӀурт Исхьэкъ езым и фызым папщӀэ, сыт щхьэкӀэ жыпӀэмэ ар лъхуэртэкъым; Зиусхьэным зэхихащ ар, арати, хъуащ лъэщыджэ Ребеккэ, абы и фызыр.

²² Абы и къуэхэр и ныбэм щыныкъуакъуэ хъуати, абы жиӀащ: – Апхуэдэу хъунумэ, сыткӀэ сыхуей абы? ИкӀи кӀуащ еупщӀыну Зиусхьэным.

²³ Зиусхьэным къыжриӀащ абы: – ЛъэпкъитӀ илъщ уи кӀуэцӀым, лъэпкъышхуэ зэныкъуэкъуу тӀу къикӀынущ уи ныбэм, зы лъэпкъыр хъунущ адрейм нэхърэ нэхъ лъэщ, нэхъыжьыр хуэлэжьэнущ нэхъыщӀэм.

²⁴ Къэсащ, арати, абы и лъхуэгъуэр: икӀи, мис, затӀолъхуэныкъуэхэр абы и ныбэм илъщ.

²⁵ Япэрейр ныбэм къикӀащ плъыжьу, фэм хуэдэу цыбэу; фӀащащ абы цӀэуэ Эсау.

²⁶ ИтӀанэ ныбэм къикӀащ абы и къуэшыр, и ӀэмкӀэ Эсау и лъэдакъэр иӀыгъыу; фӀащащ абы цӀэуэ Екъуб. Исхьэкъ илъэс хыщӀ хъурт, ахэр къыщалъхуам.

Эсау и щыпэлъхугъэр зэрищар

²⁷ Сабийхэм я ныбжь нэсри, Эсау хъуащ хьэкӀэкхъуэкӀэ къэубыдыным хуэӀэзэ цӀыху, губгъуэлӀ; Екъуб хъуащ цӀыху Ӏэсэ, шэтырхэм щыпсэууэ.

²⁸ Исхьэкъ фӀыуэ лъагъурт Эсау, сыт щхьэкӀэ жыпӀэмэ абы къиущэкӀухэр фӀэӀэфӀт; Ребеккэ фӀыуэ илъагъур Екъубт.

²⁹ ПщэфӀащ Екъуб махуэ гуэрым, Эсау губгъуэм ешауэ къыщикӀыжым.

³⁰ ЖриӀащ Эсау Екъуб: – Къызэт сшхыну плъыжьыр, мо плъыжьыр; сыт щхьэкӀэ жыпӀэмэ сэ сешащ, – жриӀащ Эсау Екъуб. Абы къыхэкӀыу абы фӀащащ цӀэ лей: Эдом.

³¹ Ауэ Екъуб жиӀащ: – Къызэщэ иджы уи щыпэлъхур.

³² – Мис, сэ солӀэ, сыт къысхуищӀэжынур щыпэлъхум? – жиӀащ Эсау.

³³ – Тхьэлъанэ къысхуэщӀ иджыпсту, – жиӀащ Екъуб. Абы тхьэлъанэ къыхуищӀащ икӀи кърищащ щыпэлъхур Екъуб.

³⁴ ИтӀанэ иритащ Екъуб Эсау щӀакхъуи джэшым къыхэщӀыкӀа шхыныгъуэри. Модрейри ешхэщ, ефэщ, тэджри ежьэжащ; щыпэлъхум и хуитыныгъэм апхуэдизэу уасэ хуищӀакъым Эсау.