1 Мусэ 23 - ХъыбарыфӀыр. ЩӀэдзапӀэр. Уэрэд ЛъапӀэхэр

Сарэ зэрылӀамрэ зэрыщӀалъхьэжамрэ

¹ Сарэ къигъэщӀащ илъэсищэрэ тӀощӀрэ блырэ: ар и кӀыхьагъщ Сарэ и гъащӀэм.

² ИтӀанэ щылӀащ Сарэ Кириат-Арбэ, иджы ХэвронкӀэ зэджэм, Ханаан щӀыналъэм щыӀэм. Арати, къэкӀуащ Ибрэхьим Сарэ папщӀэ пыхьэну, ар игъеину.

³ Ибрэхьим лӀам и хьэдэм къыщхьэщыкӀыжри, яжриӀащ хет цӀыхухэм мыпхуэдэу:

⁴ – Сэ хамэу икӀи хэхэсу сыфхэсщ, къызэфт фи щӀыпӀэм щыщ сысейуэ, кхъэлэгъунэ щысщӀу, си лӀар си нэхэм япэӀэщӀэу щыщӀэслъхьэжыну.

⁵ Хет цӀыхухэм жэуап къратурэ, Ибрэхьим къыжраӀащ:

⁶ – КъыдэдаӀуэт, ди зиусхьэн; уэ Тхьэм пщыуэ укъытхигъэсщ; ди лӀахэр здыщӀэтлъхьэж щӀыпӀэхэм ящыщу нэхъыфӀ дыдэм щыщӀэлъхьэж уи лӀар; дэ тщыщу зыми къыппиубыдынукъым уи лӀар здыщӀэплъхьэжыну щӀыпӀэр.

⁷ Ибрэхьим къэтэджри щхьэщэ яхуищӀащ хет цӀыхухэм, а щӀыналъэм и лъэпкъым.

⁸ Абыхэм епсалъэри, яжриӀащ: – Си лӀар зэрыщӀэслъхьэжынумкӀэ фыарэзыуэ щытмэ, сэ фыкъызэдаӀуи, фысхуелъэӀу Цохар и къуэ Ефрон,

⁹ Махпелэ бгъуэнщӀагъыу абы и губгъуэ кӀапэм деж щыӀэр сысейуэ, си лӀар щыщӀэслъхьэжыну уасэ хуэфащэкӀэ фи деж къыщызитыну.

¹⁰ Езы Ефрон яхэст хет цӀыхухэм; арати, жэуап къритащ хет цӀыхуу Ефрон Ибрэхьимым, хет цӀыхуу къалэ куэбжэм къыдыхьа псоми зэхахыу, мыр жиӀэри:

¹¹ – Хьэуэ, си зиусхьэн, къызэдаӀуэ сэ: сэ узот уэ губгъуэри, абы щыщ бгъуэнщӀагъри, тыгъэу узот си лъэпкъэгъухэм я пащхьэм ситу, щӀэлъхьэж уи лӀар.

¹² Ибрэхьим щхьэщэ хуищӀащ а щӀыналъэм и цӀыхухэм.

¹³ ИтӀанэ а щӀыналъэм и цӀыхухэм зэхахыу, Ефрон жриӀащ: – УкъызэдаӀуэмэ, сэ узот губгъуэм папщӀэ дыжьын: нысӀых, сэри щыщӀэслъхьэжынщ абдежым си лӀар.

¹⁴ Ефрон Ибрэхьим жэуап къритыжащ:

¹⁵ – Си зиусхьэн! КъызэдаӀуэ сэ: щӀыгум и уасэр дыжьын ахъшэ щиплӀщ; си дежкӀи уи дежкӀи ар сыт? ЩӀэлъхьэж уи лӀар.

¹⁶ Ибрэхьим арэзы техъуащ Ефрон жиӀам; икӀи хуишэчащ Ибрэхьим Ефроным дыжьыныр, хет цӀыхухэм зэхахыу уасэу абы жыхуиӀам хуэдиз, дыжьын ахъшэ щиплӀ, сатуущӀэхэм я деж щызекӀуэм хуэдэ.

¹⁷ Арати, хъуащ Ефрон и губгъуэу Махпелэм щыӀэр, Мамрэ пэщылъыр, губгъуэри абы щыщ бгъуэнщӀагъри, губгъуэм ит жыг псори, абы ихъуреягъкӀэ и гъунапкъэхэм къриубыдэу

¹⁸ Ибрэхьим и щӀапӀэ, хет цӀыхуу а къалэ куэбжэм дыхьэ псоми ялъагъуу.

¹⁹ Абы и ужькӀэ Ибрэхьим щыщӀилъхьэжащ Сарэ, езым и фызыр, Махпелэ деж щыӀэ губгъуэм и бгъуэнщӀагъым, иджы ХэвронкӀэ зэджэ Мамрэ пэщылъу, Ханаан щӀыналъэм.

²⁰ Апхуэдэу къылъысащ Ибрэхьим хет цӀыхухэм къабгъэдэкӀыу губгъуэри абы щыщ бгъуэнщӀагъри, езым ейуэ, хьэдэхэр щыщӀилъхьэжын папщӀэ.