1 Мусэ 20 - ХъыбарыфӀыр. ЩӀэдзапӀэр. Уэрэд ЛъапӀэхэр

Ибрэхьим Абимэлэх деж

¹ Ибрэхьим абдеж зыщиӀэтщ, Нэгэв лъэныкъуэкӀэ кӀуэри Кадешрэ Шуррэ я зэхуакум деж щытӀысащ; абы и ужькӀэ Гъэрар дэтӀысхьащ.

² Ибрэхьим жиӀащ езым и фыз Сарэ щхьэкӀэ: «Ар си шыпхъущ». Арати, Гъэрар и пащтыхь Абимэлэх игъакӀуэри къригъэщащ Сарэ.

³ Тхьэр Абимэлэх жэщым, пщӀыхьым хэту, къыхуэлъагъуэри къыжриӀащ абы: – УлӀэнущ уэ къэпщта бзылъхугъэм щхьэкӀэ; сыту жыпӀэмэ абы лӀы иӀэщ.

⁴ Ауэ Абимэлэх абы еӀэбатэкъыми, жиӀащ: – Зиусхьэн! Дауэ бгъэкӀуэдын Уэ лъэпкъ хейр?

⁵ Мы лӀыр аракъэ къызжезыӀар: «Ар си шыпхъущ» жиӀэу? Езы бзылъхугъэми къызжиӀакъэ: «Ар си дэлъхущ» жиӀэри? Сэ ар зэрысщӀар сигу хьэрэмыгъэншэмрэ си Ӏэ къабзэхэмрэкӀэщ.

⁶ Абдеж къыжриӀащ Тхьэм абы, пщӀыхьым хэту: – Сэри сощӀэ ар уи гум и хьэрэмыгъэншагъэкӀэ зэрыпщӀар, икӀи ущысхъумащ Си дежькӀэ гуэныхь щыблэжьыным; абы къыхэкӀыуи абы уезгъэӀусакъым.

⁷ АтӀэ иджы етыж фызыр лӀым: сыт щхьэкӀэ жыпӀэмэ ар бегъымбарщ, Тхьэм пхуелъэӀунурэ, уэри упсэунущ; ауэ иумытыжмэ, зэгъащӀэ Ӏэмал имыӀэу уэри ууей псори фызэрылӀэнур.

⁸ Абимэлэх пщэдджыжьым жьыуэ къэтэджри къриджащ и унэӀут псори, икӀи яхуиӀуэтэжащ а псалъэ псори абыхэм я тхьэкӀумэкӀэ зэхахыу; а цӀыхухэри икъукӀэ къэшынащ.

⁹ АдэкӀэ Абимэлэх Ибрэхьим къриджэри, жриӀащ абы: – Сыт уэ къыдэпщӀар? УэркӀэ сыт гуэныхьу злэжьар, сэри си пащтыхьыгъуэми гуэныхь ин дыдэр къытщхьэщыбгъэхьэн хуэдэу? Уэ сэ къызэпщӀащ ящӀэ мыхабзэ Ӏуэхухэр.

¹⁰ Сыт уэ узэгупсысар а Ӏуэхур щыблэжьым щыгъуэ?

¹¹ – Сэ сегупсысащ: щыӀэкъым мы щӀыпӀэм Тхьэм фӀэлӀыкӀ, сэри саукӀынщ си фызым щхьэкӀэ, – жиӀащ Ибрэхьим.

¹² – Пэж дыдэуи, ар си шыпхъущ; ар си адэм ипхъущ, ауэ си анэм ипхъукъым; сэ си фызи хъуащ.

¹³ Си адэм и унэм сыкъыщӀишу Тхьэм сыщришэжьам щыгъуэ сэ абы жесӀащ: «МыбыкӀэ си хьэтыр къэлъагъуи, сыт хуэдэ щӀыпӀэ дыкӀуэми, дэнэ дежи щыжыӀэ сэр щхьэкӀэ: „Мыр си дэлъхущ“ жыӀи».

¹⁴ Абимэлэх Ӏэщ ини цӀыкӀуи, унэӀут цӀыхухъуи цӀыхъубзи иритащ Ибрэхьим; иритыжащ абы и фыз Сари.

¹⁵ ЖиӀащ адэкӀэ Абимэлэх: – Си щӀыналъэр илъщ уи пащхьэм; щыпсэу уэ здыпфӀэфӀым деж.

¹⁶ Сарэ жриӀащ: – Сэ естащ уи дэлъхум дыжьыну ахъшэ мин; уи гъусэ псоми я пащхьэм лажьэ зэрыщыуимыӀэм и щыхьэтщ ар, псом я пащхьэми уэ ущыхейщ.

¹⁷ Абдеж Ибрэхьим Тхьэм елъэӀури Тхьэм игъэхъужащ Абимэлэх, абы и фызри, абы и унэӀут цӀыхубзхэри, лъхуэни щӀадзэжащ абыхэм.

¹⁸ Сыт щхьэкӀэ жыпӀэмэ Зиусхьэным Абимэлэх и унэм щӀэс цӀыхубз псори сабий ямыгъуэтыну ищӀыгъат Ибрэхьим и фыз Сарэ щхьэкӀэ.