1 Мусэ 19 - ХъыбарыфӀыр. ЩӀэдзапӀэр. Уэрэд ЛъапӀэхэр

Содомрэ Ӏаморэрэ

¹ КъэкӀуащ а мелыӀычитӀыр Содом пщыхьэщхьэм, Содом и дыхьэпӀэ куэбжэм деж ЛутӀ щысу. ЛутӀ ахэр къилъэгъури къэтэджащ абыхэм къапежьэну, щхьэщи ищӀащ щӀым нэс.

² – Си зиусхьэнхэ! – жиӀащ абы, – фи унэӀутым и унэм фыныщӀыхьи, нэху фыкъыщекӀ, фтхьэщӀ фи лъакъуэхэр, нэху щымэ, фыкъэтэджынщи, фытехьэжынщ фи гъуэгум. – Хьэуэ, дэ жэщыр уэрамым щитхынщ, – жаӀащ абыхэм.

³ Ауэ ар хуабжьу елъэӀурт абыхэм; арати, ежьащ ахэр абы деж кӀуэну, икӀи щӀыхьащ абы и унэм. Абы яхуищӀащ абыхэм хьэщӀэ шхын, икӀи игъэжьащ щӀакхъуэ мышыухэр; мыдрейхэри шхащ.

⁴ Ахэр жеину гъуэлъыжатэкъым, Содом къалэ дэсхэм, жьыи щӀэи, къалэм лӀыхэу дэсу хъуар дэнэ лъэныкъуэкӀи къикӀыурэ унэр къыщаувыхьам.

⁵ ЛутӀ къеджэри щӀашауэ къыжраӀэрт абы: – Дэнэ щыӀэ уэ ныжэбэ къыпхуэкӀуа цӀыхухэр? КъытхущӀэш ахэр мыдэ; дэ декӀуэлӀэнущ абыхэм.

⁶ ЛутӀ щӀыхьэпӀэм нэс къыщӀэкӀри бжэр зэхуищӀыжащ.

⁷ – Си къуэшхэ, фымыщӀэ Ӏеягъэ, – жиӀащ абы.

⁸ – ФыкъэдаӀуэ, сэ сиӀэщ иджыри цӀыхухъу зымылъэгъуа пхъуитӀ; нэхъыфӀщ ахэр фэ къыфхущӀэсшмэ, ефщӀэ абыхэм сыт фыхуейми; ауэ мы цӀыхухэм зыри евмыщӀэ, сыт щхьэкӀэ жыпӀэмэ ахэр къеблэгъащ си деж.

⁹ – КъакӀуэ мыдэ, зыӀуегъэх, – жаӀащ абыхэм. – Мис хэхэсыр, ар хуейуэ ара хьэкум ищӀэну? Иджы дэ уэ уэтщӀэнщ абыхэм етщӀэнум нэхърэ нэхъ Ӏей. ИтӀанэ икъукӀэ къебгъэрыкӀуащ а цӀыхум, ЛутӀ, бжэми къыбгъэдыхьащ ахэр, ар хакъутыкӀын я мураду.

¹⁰ Апхуэдэу щыхъум, а лӀыхэр къэӀэбэри ЛутӀ щӀашэжащ унэм, бжэри ягъэбыдащ.

¹¹ ЦӀыхухэу унэ щӀыхьэпӀэм деж щытахэм я нэр иращӀат, цӀыкӀуи ини, ахэр гугъу ехьащ, щӀыхьэпӀэр къахуэмыгъуэтурэ.

¹² ЖраӀащ а хьэщӀэхэм ЛутӀ: – Хэт мы къалэм иджыри щыуиӀэр? Малъхъэми, уи къуэми, уипхъуми, хэт мы къалэм ущиӀэми, псори иш мы щӀыпӀэм.

¹³ Мы къалэр дэ дгъэкӀуэдынущ; сыт щхьэкӀэ жыпӀэмэ ин дыдэщ мыбы дэсхэр зыгъэкъуаншэ Зиусхьэным екӀуалӀэ тхьэусыхэ макъыр. Зиусхьэным дэ дыкъигъэкӀуащ, ар дгъэкӀуэдын папщӀэ.

¹⁴ ЛутӀ щӀэкӀри, епсэлъащ хуэхъуну малъхъэхэм, яжриӀащ абыхэм: – Фытэдж, фыдэкӀ мы къалэм! Зиусхьэным ар игъэкӀуэдынущ. Ауэ абы и малъхъэхэм къафӀэщӀащ ар гушыӀэу.

¹⁵ Пщэдджыжь пшэплъыр къыщищӀым, мелыӀычхэм щӀадзащ ЛутӀ ягъэпӀащӀэу, мыпхуэдэу жаӀэурэ: – Тэдж, къащтэ уи фызымрэ уи пхъуитӀ уэ къыббгъэдэсхэмрэ, къалэ хабзэншэм уадэмыкӀуэдын папщӀэ.

¹⁶ АрщхьэкӀэ ЛутӀ зиӀэжьэрти, а лӀыхэм, Зиусхьэным гущӀэгъу къызэрыхуищӀам щхьэкӀэ хузэгуэпауэ, езыри, и фызри, и пхъуитӀри я Ӏэхэр яубыдри къыдашащ къалэм, икӀи щагъэуващ ахэр къалэ щӀыбым.

¹⁷ Ахэр къалэм къыдаша нэужь, мелыӀычхэм ящыщ зым жиӀащ: – Зыкъегъэл; укъызэмыплъэкӀ икӀи укъыщымыувыӀэ мы аузым; зыщыгъэпщкӀу бгыщхьэм, умыкӀуэдын папщӀэ.

¹⁸ Ауэ ЛутӀ яжриӀащ абыхэм: – Хьэуэ, зиусхьэнхэ! – яжриӀащ ЛутӀ! –

¹⁹ Сэ, Уи унэӀутым нэфӀкӀэ укъызэплъащ икӀи ин дыдэщ Уэ си гъащӀэр къебгъэлкӀэрэ къысхуэпщӀа гущӀэгъур; ауэ сэ зыкъыщезгъэлыфынукъым бгыщхьэм, насыпыншагъэр къыслъэщӀэмыхьэу икӀи сымылӀэу.

²⁰ Мис, мы къалэм сыжэмэ, нэхъ гъунэгъущ, ар цӀыкӀущ; абы сыжэнщ – ар цӀыкӀукъэ, абыкӀэ къелынщ си гъащӀэр.

²¹ – Хъунщ, – къыжриӀащ мелыӀычым, – уи хьэтыркӀэ Сэ сщӀэнщ ари: хэзгъэщӀэнкъым уэ жыхуэпӀэ къалэр.

²² ЕпӀэщӀэкӀ, зыкъыщегъэл абы; сыт щхьэкӀэ жыпӀэмэ Сэ сщӀэфынукъым Ӏуэхур, уэ абы унэмысу. Абы къыхэкӀыуи фӀащащ а къалэм: Цоар.

²³ Дыгъэр къыщхьэщыуват щӀылъэм, ЛутӀ Цоар щынэсам.

²⁴ Зиусхьэным къатрикӀащ Содомрэ Ӏаморэрэ уэшхым хуэдэу тхъуэбзащхъуэмрэ мафӀэмрэ, уафэм щыӀэ Зиусхьэным къыбгъэдэкӀыу.

²⁵ ИтӀанэ зэтригъэщэхащ а къалэхэри, аузым щыӀэ псори, игъэкӀуэдащ а къалэхэм щыпсэу псори, а щӀыналъэм къыщыкӀ псори.

²⁶ Ауэ ЛутӀ и фызыр и щӀыбагъкӀэ къызэплъэкӀащ икӀи зэфӀэжыхьащ шыгъу сэхым хуэдэу.

²⁷ Ибрэхьим пщэдджыжьым жьыуэ къэтэджри кӀуащ Зиусхьэным и пащхьэм щита щӀыпӀэм.

²⁸ Плъащ Содомрэ Ӏаморэрэ, Ӏэгъуэблагъэм псори къыщызэхиплъыхьри къилъэгъуащ: Ӏугъуэр къыхокӀ щӀыгум, хьэкум къикӀым хуэдэу.

²⁹ Къэхъуащ мыр, мы Ӏэгъуэблагъэм ита къалэхэр Тхьэм щигъэкӀуэдым, Тхьэм игу къэкӀыжащ Ибрэхьим, икӀи къригъэкӀащ ЛутӀ кӀуэдыпӀэ щӀыпӀэм ЛутӀ зыщыпсэуа къалэхэр щызэтригъэщахэм щыгъуэ.

³⁰ ЛутӀ Цоар къыдэкӀри, щӀидзащ бгы дурэшым щыпсэууэ, абы щӀыгъут и пхъуитӀыр: сыт щхьэкӀэ жыпӀэмэ шынэрт Цоар щыпсэун. Щыпсэурт, арати, бгъуэнщӀагъым, абы и гъусэт и пхъуитӀри.

³¹ ЖриӀащ пхъу нэхъыжьым пхъу нэхъыщӀэм: – Ди адэр жьы хъуащ; щӀылъэми теткъым, дэни зэрыщыхабзэм хуэдэу, дэ къытхуэкӀуэн лӀы.

³² Аращи, ди адэр санэр едгъэфэнщи, дыдэгъуэлъынщ абы, икӀи къытедгъэхъукӀыжынщ ди адэм ди лъэпкъ.

³³ Арати, ирагъафэщ я адэр санэ а жэщ дыдэм; щӀыхьащ абы деж пхъу нэхъыжьыр, икӀи дэгъуэлъащ и адэм: ауэ адэм ищӀакъым ар къыщыгъуэлъари щытэджыжари.

³⁴ Адрей махуэм щыпхъу нэхъыжьым шыпхъу нэхъыщӀэм жриӀащ: – Сэ сыжеящ дыгъуасэ си адэм сригъусэу; ныжэби едгъэфэнщ ар санэ; иджы уэри щӀыхьи, жей абы уригъусэу, икӀи къытедгъэхъукӀыжынщ ди адэм ди лъэпкъ.

³⁵ Ирагъэфащ я адэр санэ а жэщми; пхъу нэхъыщӀэр щӀыхьэри жеящ абы и гъусэу: адэм ищӀакъым ар къыщыгъуэлъари щытэджыжари.

³⁶ Арати, ЛутӀ и пхъуитӀыр езыхэм я адэм хуэхъужащ уэндэгъу.

³⁷ Нэхъыжьым къуэ къилъхури, абы цӀэуэ фӀищащ Моаб. Ар иджыри къэс моав цӀыхухэм я адэщ.

³⁸ НэхъыщӀэми къуэ къилъхури, фӀищащ абы цӀэуэ: Бен-Амми. Ар иджыри къэс аммон цӀыхухэм я адэщ.