1 Мусэ 18 - ХъыбарыфӀыр. ЩӀэдзапӀэр. Уэрэд ЛъапӀэхэр

Тхьэр Ибрэхьим деж зэреблэгъар

¹ Къыщыхуэлъэгъуащ абы Зиусхьэныр жыгеилъэ Мамре деж, махуэм и хуабэгъуэу ар шэтыр щӀыхьэпӀэм Ӏусу.

² Ибрэхьим и напӀэр дрихьейрэ плъэмэ, лӀищ къитщ и пащхьэм. Къыщилъагъум, ар шэтыр щӀыхьэпӀэм ӀукӀри, абыхэм япежэжьащ, щӀыгум нэсуи щхьэщэ яхуищӀащ.

³ – Зиусхьэн! – жиӀащ абы. – Уэ нэфӀкӀэ укъызэплъмэ, ублэмыкӀ Уи унэӀутым.

⁴ Къахьынщ псы тӀэкӀуи, фтхьэщӀ фи лъакъуэхэр; зыщывгъэпсэху итӀанэ мы жыг щӀагъым.

⁵ Сэри къэсхьынщ щӀакхъуи, къыщӀевгъэубыдэнщ фигухэр; итӀанэ фыкӀуэ; сыт щхьэкӀэ жыпӀэмэ фэ фызыблэкӀыр фи унэӀутырщ. – ЩӀэ уэ зэрыжыпӀэм хуэдэу, – жаӀащ абыхэм

⁶ Ибрэхьим Сарэ деж шэтырым пӀащӀэу щӀыхьэри жриӀащ: – ПсынщӀэу хьэжыгъэ нэхъыфӀ дыдэм щыщу сатищ пщыи, гъажьэ щӀакхъуэ мышыу.

⁷ ИтӀанэ жащ Ибрэхьим хъушэмкӀэ, къыхихущ танэ дэгъуи, иритащ унэӀутым, модрейми ар епӀэщӀэкӀыу игъэхьэзыращ.

⁸ Тхъуи, шэи, танэл гъэвари ихьри, иригъэуващ я пащхьэм; езыри уващ жыг щӀагъым деж абыхэм я гъунэгъуу. Модрейхэр шхэрт.

Тхьэм Ибрэхьимрэ Сарэрэ къуэкӀэ къызэригъэгугъар

⁹ – Дэнэ щыӀэ Сарэ, уи фызыр? – къыжраӀащ абыхэм. – Мыбдежым, шэтырым щӀэсщ, – итащ абы жэуап.

¹⁰ – Илъэс къакӀуэ Сэ аргуэру мыбдеж мыпхуэдэ зэман дыдэм сыкъэкӀуэнущ, абы щыгъуэ иӀэнущ къуэ Сарэ, уи фызым, – жиӀащ абыхэм ящыщ зым. Сарэ къэдаӀуэрт, абы и щӀыбагъым къыдэту, шэтыр щӀыхьэпӀэм деж щыту.

¹¹ Ауэ Ибрэхьимрэ Сарэрэ жьы хъуат, я ныбжькӀэ хэтӀэсат; фызхэм яӀэн хуейуэ къадекӀуэкӀри Сарэ иӀэжтэкъым.

¹² Сарэ игукӀэ дыхьэшхащ, мыр жиӀэри: «Сэ, жьы сыхъуауэ, дауэ сиӀэн апхуэдэ гуфӀэгъуэ? Си зиусхьэнри жьы хъуащ».

¹³ ЖриӀащ Зиусхьэным Ибрэхьим: – Сыт Сарэ щӀэдыхьэшхар, «Пэж дыдэу, сылъхуэну пӀэрэ сэ, мыпхуэдэу жьы сыхъуауэ» жиӀэу?

¹⁴ ЩыӀэ Зиусхьэным хузэфӀэмыкӀын? Зэман хэхам деж Сэ сыщыӀэнущ уи деж илъэс къакӀуэ, Сари къуэ иӀэнущ.

¹⁵ Ауэ Сарэ зиумымысыжакъым, жиӀащ: – Сэ сыдыхьэшхакъым. Сыт щхьэкӀэ жыпӀэмэ ар къэшынэжат. – Хьэуэ, уэ удыхьэшхащ, – жиӀащ адрейм.

Содом щхьэкӀэ Ибрэхьим Тхьэм зэрелъэӀуар

¹⁶ Къэтэджыжащ а лӀыхэр абдежым, икӀи ежьащ, икӀи Содом и лъэныкъуэкӀэ аузым дэплъащ; Ибрэхьим ядэкӀуэтащ абыхэм, ахэр иригъэжьэжыну.

¹⁷ ЖиӀащ абы щыгъуэ Зиусхьэным: – ЩызбзыщӀыну пӀэрэ Сэ Ибрэхьим сщӀэну сызыхуейр?

¹⁸ Ибрэхьим пэж дыдэу къытехъукӀынущ лъэпкъ ин дыдэ икӀи лъэщ, абы и хьэтыркӀи си нэфӀ ящыхуэнущ щӀылъэм тет цӀыху лъэпкъ псоми.

¹⁹ Сыт щхьэкӀэ жыпӀэмэ Сэ къыхэсхащ Ибрэхьим, езым и къуэхэми, езым и ужькӀэ къэнэну и унагъуэми, щыпкъагъэрэ захуагъэрэ ялэжьу сэ Зиусхьэным си гъуэгум ирикӀуэну унафэ яхуищӀын папщӀэ. Сэ, Зиусхьэным, Ибрэхьим зэрызгъэгугъа псори згъэпэжынущ.

²⁰ ИтӀани жиӀащ Зиусхьэным: – Содомрэ Ӏаморэрэ зыгъэкъуаншэ тхьэусыхэ макъыр ин дыдэщ, абыхэм я гуэныхьри икъукӀэ хьэлъэщ.

²¹ Сехыныурэ сеплъынущ абыхэм ялэжьхэр абыхэм ехьэлӀауэ Сэ къысхудэкӀуей тхьэусыхэ макъым хуэдэрэ хуэмыдэрэ; ар къэсщӀэнущ.

²² ЛӀыхэр абдежым къыӀукӀыжри, Содом лъэныкъуэмкӀэ кӀуащ; ауэ Ибрэхьим иджыри итт Зиусхьэным и пащхьэм.

²³ Ибрэхьим Абы бгъэдыхьэри, жиӀащ: – Щыпкъагъэ зимыӀэм и гъусэу щыпкъагъэ зиӀэри бгъэкӀуэдыну пӀэрэ?

²⁴ ДэсынкӀэ хъунукъэ а къалэм щыпкъагъэ зиӀэ цӀыху щэ ныкъуэ? АтӀэ Уэ бгъэкӀуэдыну пӀэрэ ар итӀани, хуэбгъэгъунукъэ а щӀыпӀэм щыпкъагъэ зиӀэу абы дэс цӀыху щэ ныкъуэм я хьэтыркӀэ?

²⁵ Дауэ хъун Уэ ар пщӀэну, щыпкъагъэ зиӀэри зимыӀэри зэдэбгъэкӀуэдыну, щыпкъагъэ зимыӀэм къыщыщӀыр щыпкъагъэ зиӀэм къехъулӀэу; дауэ хъун Уэ ар къыббгъэдэкӀыу! ЩӀылъэ псом и хеящӀэм дауэ лей зэрихьэн?

²⁶ – Содом къалэм щыпкъагъэ зиӀэ цӀыху щэ ныкъуэ щызгъуэтмэ, Сэ абыхэм я хьэтыркӀэ а щӀыпӀэм зэрыщыту яхуэзгъэгъунщ, – жиӀащ Зиусхьэным.

²⁷ Ибрэхьим жиӀащ абы и жэуапу: – Мис, сэ сытегушхуащ Зиусхьэным сепсэлъэну, сэ, сабэм икӀи сахуэм, – жиӀащ Ибрэхьим абы и жэуапу,

²⁸ – хъункӀэ хъунущ цӀыху щыпкъагъэ зиӀэхэм я бжыгъэр щэ ныкъуэм нэсыным тху хущыщӀэу, атӀэ а тхур зэрыримыкъум къыхэкӀыу Уэ бгъэкӀуэдыну пӀэрэ къалэ псор? – ЗгъэкӀуэдынкъым, абдежым плӀыщӀрэ тхурэ къыщызгъуэтмэ, – жиӀащ Зиусхьэным.

²⁹ Ибрэхьим пищэрт адэкӀэ Абы епсэлъэным, икӀи жиӀащ: – Абдежым плӀыщӀ къыщыбгъуэтынкӀэ хъунукъэ? – Ар сщӀэнкъым плӀыщӀым я хьэтыркӀэ, – жиӀащ Зиусхьэным.

³⁰ – Къремыгубжь Зиусхьэныр сэ жысӀэнум папщӀэ: Абдежым щэщӀ щыбгъуэтынкӀэ хъунукъэ? – жиӀащ адэкӀэ Ибрэхьим. Зиусхьэным жиӀащ: – СщӀэнкъым, абдежым щыпкъагъэ зиӀэ цӀыху щэщӀ щызгъуэтмэ.

³¹ – Мис, сэ таучэл сщӀащ Зиусхьэным жесӀэну: абдежым тӀощӀ щыбгъуэтынкӀэ хъунукъэ? – жиӀащ Ибрэхьим. – ЗгъэкӀуэдынкъым тӀощӀым я хьэтыркӀэ, – жиӀащ Зиусхьэным.

³² Ибрэхьим жиӀащ: – Къремыгубжь Зиусхьэныр иджыри зэ жысӀэжынум папщӀэ: абдежым щыбгъуэтынкӀэ хъунукъэ пщӀы? – ЗгъэкӀуэдынкъым пщӀым я хьэтыркӀэ, – жиӀащ Зиусхьэным.

³³ Арати, ӀукӀыжащ Зиусхьэныр, Ибрэхьим къепсэлъэныр щигъэтри; Ибрэхьим къигъэзэжащ езым и щӀыпӀэм.