1 Мусэ 15 - ХъыбарыфӀыр. ЩӀэдзапӀэр. Уэрэд ЛъапӀэхэр

Тхьэм Ибрэхьим зэгурыӀуэныгъэ зэрырищӀылӀар

¹ А къэхъукъащӀэхэм я ужькӀэ Зиусхьэныр Ибрам къыхуэлъагъуэри и псалъэ къылъигъэсащ: – Умышынэ, Ибрам; Сэ уэ СыуимэӀухущ; уи ӀыхьэфӀыр ин хъунущ.

² Ибрам жиӀащ: – Тепщэу Зиусхьэн! Уэ къызэптынум сыт есщӀэнур, сэ быныншэу сыкъанэмэ; си унагъуэр зезыхьэ, Дамаск къалэм щыщ мы ЕлиӀэзэрщ си мылъкур къызыхуэнэнур.

³ ЖиӀащ адэкӀэ Ибрам: – Уэ бын къызэптакъыми, унагъуэ Ӏуэхур зезыхьэрщ си лӀэужьыр.

⁴ Абдеж Зиусхьэным и псалъэр абы къыхуехащ: – Хъунукъым ар уи лӀэужь; уэ уи пкъым къыпкърыкӀынуращ уи лӀэужь хъунур.

⁵ ИтӀанэ ар шэтырым къыщӀишри, жиӀащ Зиусхьэным: – Уафэм дэплъеи, бжыт вагъуэхэр, ахэр пхуэбжынумэ. АдэкӀи къыжриӀащ абы: – Апхуэдиз хъунущ къыптехъукӀынум я бжыгъэр.

⁶ Ибрам и фӀэщ хъуащ Зиусхьэным жиӀар, абы къыхэкӀыуи Зиусхьэным абы щыпкъагъэ иӀэу илъытащ.

⁷ – Мы щӀыналъэр ууей хъун папщӀэ, Халдей щыӀэ Ур къалэм укъыдэзыша Зиусхьэныр Сэращ, – къыжриӀащ Зиусхьэным абы.

⁸ – Ди тепщэ Зиусхьэн! – жиӀащ Ибрам, – сыткӀэ къэсщӀэну а щӀыналъэр сысей зэрыхъунур?

⁹ – Схуэгъэн Сэ илъэсищ зы ныбжь жэмыщӀэ, илъэсищ зи ныбжь бжэн, илъэсищ зи ныбжь тӀы, тхьэрыкъуэ анэ, тхьэрыкъуэ шыр, – къыжриӀащ Зиусхьэным абы.

¹⁰ Абы а псори хуигъэнащ, ахэр тӀууэ зэгуиупщӀыкӀри игъэтӀылъащ, зы Ӏыхьэр адрейм пэщылъу; ауэ къуалэбзухэр иупщӀэтакъым.

¹¹ Къащхьэщылъэтащ абыхэм бгъащхъуэхэр; ауэ Ибрам Ӏуихужырт ахэр.

¹² Дыгъэр щыкъухьэм, жей куур къытеуащ Ибрам; Къыщхьэщыхьащ абы шынагъуэри кӀыфӀыгъэшхуэри.

¹³ Абдеж Зиусхьэным къыжриӀащ Ибрам: – ЗэгъащӀэ уэ къыпщӀэхъуэхэр езыхэм я мыщӀыналъэм хамэ зэрыщыхъунур, пщылӀыпӀэми зэрырагъэувэнур, илъэс щиплӀым и кӀуэцӀкӀэ хьэзаби зэрырагъэшэчынур.

¹⁴ Ауэ Сэ хьэкум тесщӀэнущ ахэр зыгъэпщылӀыну лъэпкъым; абы и ужькӀэ уэ къыпщӀэхъуэхэр а хэкум къикӀыжынущ мылъкушхуэ яӀэу.

¹⁵ – Уэ езыр уахыхьэжынущ уи адэжьхэм, гупсэхугъуэ уиӀэу, ущӀалъэхьэжынущ жьыщхьэ махуэ ухъуауэ.

¹⁶ – ЕплӀанэ щӀэблэм деж къагъэзэжынущ къэпщӀэхъунухэм мыбдеж, сыт щхьэкӀэ жыпӀэмэ эмор цӀыхухэм я хабзэншагъэхэм я пщалъэр иджыри гъэнщӀа хъуакъым.

¹⁷ Дыгъэр къухьэри, кӀыфӀ къыщыхъуам, Ӏугъуэ къызрих хьэкурэ Ӏэдакъэ мафӀэрэ дэкӀащ упщӀэтауэ щылъ псэущхьэхэм я зэхуакум.

¹⁸ А махуэм Зиусхьэным Ибрам ирищӀылӀащ зэгурыӀуэныгъэ, мыр жиӀэри: – Уэ къыптехъукӀынухэм изот Сэ мы щӀыналъэр, Мысыр псым къыщыщӀэдзауэ псы ин дыдэм, Евфрат псым, нэсу:

¹⁹ кен цӀыхухэм, кениз цӀыхухэм, кадмон цӀыхухэм,

²⁰ хет цӀыхухэм, пэриз цӀыхухэм, рефэ цӀыхухэм,

²¹ амор цӀыхухэм, ханаан цӀыхухэм, гъиргъаш цӀыхухэм икӀи ебус цӀыхухэм я щӀыналъэ.