1 Мусэ 12 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Зиусхьэным жриӀащ Ибрам: – ИкӀ уи щӀыналъэм, яхэкӀ уи лъэпкъэгъухэм, уи адэм и унэр къэбгыни, кӀуэ Сэ уэзгъэлъагъуну щӀыналъэм.

² ИтӀанэ Сэ къыптезгъэхъукӀынущ лъэпкъ ин дыдэ, си нэфӀ пщыхуэнущ, уи цӀэри згъэлъэгэнущ; Тхьэм и нэфӀ щыхуэныгъэр зыбгъэдэкӀынури уэращ!

³ Сэ си нэфӀ ящыхуэнущ уэ зи нэфӀ къыпщыхуэхэм, си ней ящыхуэнущ уэ зи ней къыпщыхуэхэм; уэ уи хьэтыркӀэ си нэфӀ ящыхуэнущ дунейм тет цӀыху лъэпкъ псоми!

⁴ Арати, ежьащ Ибрам, Зиусхьэным абы къызэрыжриӀам тету; абы щӀыгъуу ежьащ ЛутӀ. Ибрам илъэс блыщӀрэ тхурэ и ныбжьт Харан къыщикӀам щыгъуэ.

⁵ ЗыщӀигъуащ Ибрам Сарай, и фызыр, ЛутӀи, и къуэшым и къуэр, къыздащтащ абыхэм я мылъку псори, здрашэжьащ абыхэм Харан щаӀа цӀыху псори; ежьащ ахэр, Ханаан щӀыналъэм кӀуэн папщӀэ; КӀуащ Ханаан щӀыналъэм.

⁶ ПхрыкӀащ Ибрам а щӀыналъэм Шехэм щӀыпӀэм нэс, Морэ жыгеилъэм нэс. А щӀыналъэм а лъэхъэнэм щыпсэурт ханаан цӀыхухэр.

⁷ Абдеж Зиусхьэныр Ибрам къыхуэзэри, къыжриӀащ: – Уэ къыптехъукӀыну цӀыхухэм естынущ Сэ мы щӀыналъэр. КъыхуэкӀуа Зиусхьэным щыхуиухуащ Ибрам къурмэнщӀыпӀэ итӀанэ.

⁸ Абдежым икӀри, ежьащ ар бгымкӀэ, Бэтэл и къуэкӀыпӀэмкӀэ; икӀи и шэтырыр игъэуващ, езым елъытауэ къухьэпӀэмкӀэ Бэтэл щыӀэу, къуэкӀыпӀэмкӀэ Ӏай щыӀэу; абдежым Зиусхьэным къурмэнщӀыпӀэ щыхуиухуэри, елъэӀуащ Зиусхьэным.

⁹ Ибрам тэджыжри, ипщэкӀэ кӀуэуэ адэкӀэ ежьэжащ.

Ибрам Мысырым зэрыщыӀар

¹⁰ Щыгъаблэт а щӀыналъэм. Арати, ехащ Ибрам Мысырым, абы хамэу псэупӀэ щылъыхъуэну; сыт щхьэкӀэ жыпӀэмэ гъаблэм нэхъри зыщиубгъуат а щӀыналъэм.

¹¹ Ар Мысырым щынэблагъэм, и фыз Сарай жриӀащ мыпхуэду: – Сэ сощӀэ уэ уи теплъэкӀэ бзылъхугъэ дахэу узэрыщытыр;

¹² Мысырым и цӀыхухэм укъалъагъумэ, «мыр мобы и фызщ» жаӀэнурэ сэ саукӀынущ, ауэ уэ псэууэ укъагъэнэнущ.

¹³ АтӀэ жыӀэ уэ узишыпхъуу, си Ӏуэхур уэ уи хьэтыркӀэ фӀы хъун папщӀэ, си псэри уи фӀыгъэкӀэ къелын папщӀэ.

¹⁴ Апхуэдэуи хъуащ Ибрам Мысырым къыщыкӀуэм. Мысыр цӀыхухэм ялъэгъуащ ар икъукӀэ бзылъхугъэ дахэу зэрыщытыр;

¹⁵ Ар фирхьэуным и лӀакъуэлӀэшхэм къалъагъури, фирхьэуным хуаӀуэтащ абы и щытхъур; икӀи яшащ Сарай фирхьэун унэм.

¹⁶ Ибрам и Ӏуэхухэр фӀы хъуат абы и хьэтыркӀэ; иӀэт абы Ӏэщ цӀыкӀуи, Ӏэщышхуи, шыдхэри, унэӀутхэри, унэӀут бзылъхугъэхэри, къыдырхэри, махъшэхэри.

¹⁷ Ауэ Зиусхьэным удын хьэлъэхэмкӀэ хигъэщӀащ фирхьэунри абы и унэри, Ибрам и фыз Сарай щхьэкӀэ.

¹⁸ Фирхьэуным Ибрам къриджэри жриӀащ: – Сыт уэ къызэпщӀар? Щхьэ къызжумыӀарэ ар узэрифызыр?

¹⁹ Щхьэ жыпӀат уэ «ар си шыпхъущ» жыпӀэу? Сэ ар си фыз сщӀы пэтащ. Мис иджы уи фызыр; здэшэжи, кӀуэж.

²⁰ Фирхьэуным абы теухуауэ унафэ яхуищӀри цӀыхухэм ирагъэжьэжащ ари абы и фызри, абы иӀа псори иратыжри.