1 Мусэ 11 - ХъыбарыфӀыр. ЩӀэдзапӀэр. Уэрэд ЛъапӀэхэр

Бабилон чэщанэр

¹ ЩӀылъэ псом щыщыӀар зы бзэрэ зы псэлъэкӀэрэт.

² КъуэкӀыпӀэмкӀэ къыщежьэри къакӀуэурэ, Шинар щӀыналъэм тафэ къыщагъуэтри, ахэр абдеж щытӀысащ.

³ – Чырбыш дгъэжынщи, мафӀэкӀэ дгъэжьэжынщ, – жаӀащ абыхэм. Арати, яӀэ хъуащ абыхэм мывэхэм я пӀэкӀэ чырбышхэр, сэхум и пӀэкӀэ щӀыгу мэзыш.

⁴ – Дыухуэнщ ди щхьэм папщӀэ къалэрэ уафэм щӀэуэу чэщанэрэ, ди цӀэри дгъэӀунщ, щӀылъэ псом дыщызэмыбгрыкӀыу, – жаӀащ абыхэм итӀанэ.

⁵ Къехащ итӀанэ Зиусхьэныр, цӀыхум и къуэхэм яухуэ къалэмрэ чэщанэмрэ еплъыну.

⁶ ЖиӀащ Зиусхьэным: – Мис, зы лъэпкъщ, зы бзэщ псоми яӀэр; мис мыращ абыхэм яухуэну зыщӀадзар; сытым и ужь ихьэми, псори яхузэфӀэкӀынущ.

⁷ АтӀэ дехынщи, щызэхэдгъэзэрыхьынщ абдежым абыхэм я бзэр, зым жиӀэр адрейм къыгурымыӀуэжу.

⁸ Арати, Зиусхьэным ахэр щӀылъэ псом щызэбгригъэкӀащ, абдежым къригъэкӀри, а щӀыкӀэмкӀи абыхэм щагъэтыжащ къалэр ухуэн.

⁹ Абы къыхэкӀкӀэ, абы цӀэуэ фӀащащ: Бабилон; сыт щхьэкӀэ жыпӀэмэ абдежым Зиусхьэным щызэхигъэзэрыхьащ щӀылъэ псом и бзэр, икӀи Зиусхьэным ахэр щӀылъэ псом щызэбгригъэкӀащ, абдежым къригъэкӀри.

Шем къытехъукӀахэр – Ибрам деж нэс

¹⁰ Шем къытехъукӀахэр: Шем илъэсищэ щыхъум, къыхуэхъуащ Арпахшад, псыдзэм и ужькӀэ илъэситӀ дэкӀауэ.

¹¹ Арпахшад къыхуалъхуа нэужь, Шем псэужащ илъэс щитхукӀэ, нэгъуэщӀ къуэхэри пхъухэри къыхуалъхуащ.

¹² Арпахшад, илъэс щэщӀрэ тхукӀэ псэуауэ, Шэлах къыхуэхъуащ.

¹³ Шэлах къалъхуа нэужь, Арпахшад псэужащ илъэс щиплӀрэ щыкӀэ, къуэхэри пхъухэри къыхуалъхуащ.

¹⁴ Шэлах, илъэс щэщӀкӀэ псэуауэ, Ӏэбэр къыхуэхъуащ.

¹⁵ Ӏэбэр къалъхуа нэужь, Шэлах псэужащ илъэс щиплӀрэ щыкӀэ, къуэхэри пхъухэри къыхуэлъхуащ.

¹⁶ Ӏэбэр, илъэс щэщӀрэ плӀыкӀэ псэуауэ, Пэлэгъ къыхуэхъуащ.

¹⁷ Пэлэгъ къалъхуа нэужь, Ӏэбэр псэужащ илъэс щиплӀрэ щэщӀкӀэ, къуэхэри пхъухэри къыхуэлъхуащ.

¹⁸ Пэлэгъ, илъэс щэщӀкӀэ псэуауэ, РэӀу къыхуэхъуащ.

¹⁹ РэӀу къалъхуа нэужь, Пэлэгъ псэужащ илъэс щитӀрэ бгъукӀэ, къуэхэри пхъухэри къыхуалъхуащ.

²⁰ РэӀу, илъэс щэщӀрэ тӀукӀэ псэуауэ, Сэрыругъ къыхуэхъуащ.

²¹ Сэрыругъ къалъхуа нэужь, РэӀу псэужащ илъэс щитӀрэ блыкӀэ, къуэхэри пхъухэри къыхуэлъхуащ.

²² Сэрыругъ, илъэс щэщӀкӀэ псэуауэ, Нахъор къыхуэхъуащ.

²³ Нахъор къалъхуа нэужь, Сэрыругъ псэужащ илъэс щитӀкӀэ, къуэхэри пхъухэри къыхуэлъхуащ.

²⁴ Нахъор илъэс тӀощӀрэ бгъукӀэ псэуауэ, Тэрахъ къыхуэхъуащ.

²⁵ Тэрахъ къалъхуа нэужь, Нахъор псэужащ илъэсищэрэ пщыкӀубгъукӀэ, къуэхэри пхъухэри къыхуалъхуащ.

²⁶ Тэрахъ илъэс блыщӀкӀэ псэуауэ, къыхуэхъуащ Ибрами, Нахъори, Харани.

²⁷ Мис Тэрахъ къытехъукӀахэр: Тэрахъ къыхуэхъуащ Ибрам, Нахъор, Харан сымэ. Харан къыхуэлъхуащ Лут.

²⁸ И адэ Тэрахъ псэууэ, Харан щылӀащ езыр зыщалъхуа щӀыналъэу Халдей къэралыгъуэм щыӀэ Ур къалэм.

²⁹ Ибрамрэ Нахъоррэ къашащ фыз; Ибрам и фызым Сарай и цӀэт; Нахъор и фызым и цӀэр Милкъэт, ар Милкъэрэ Искъэрэ я адэ Харан ипхъут.

³⁰ Сарай лъхугъэншэт икӀи сабииншэт.

Тхьэр Ибрам къызэрыриджар

³¹ Тэрахъ и къуэ Ибрам, Харан и къуэ ЛутӀу и къуэрылъхур, и нысэ Сараеу езым и къуэ Ибрам и фызыр зыщӀигъури, ахэр и гъусэу, къыдэкӀащ Халдей къэралыгъуэм щыщ Ур къалэм, Ханаан щӀыналъэм кӀуэну, ауэ, Харан нэсауэ, ахэр къыщыувыӀащ абдежым.

³² Тэрахъ илъэс щитӀрэ тхукӀэ псэуауэ щылӀащ Харан къэралыгъуэм.