1 Кор. 15 - ХъыбарыфӀыр. ЩӀэдзапӀэр. Уэрэд ЛъапӀэхэр

15-НЭ ЕДЗЫГЪУЭ Мэссихь лӀахэм къазэрыхэтэджыкӀыжам теухуауэ

¹ ФэзгъэщӀа хъыбарыфӀыр фи гум къэзгъэкӀыжыну сыхуейщ. А хъыбарыфӀыр вдауэ, фи фӀэщу абы фытетщ.

² ФымыкӀуэду а хъыбарыфӀымкӀэ Тхьэм фыкърегъэл, фэзгъэщӀа Ӏуэхухэм быдэу фытетмэ. Апхуэдэу щымытмэ, фи фӀэщхъуныгъэр пщӀэнщ хъуащ.

³ Ӏуэху псоми япэу хъыбарыфӀу Хьисэ Мэссихь къысӀэщӀилъхьар къыфхуэзгъэнащ: Тхьэм и псалъэ тхахэм тету, ди гуэныхьхэр ипшыныжын щхьэкӀэ, лӀащ Мэссихь.

⁴ Кхъэлэгъунэм щӀалъхьэжащ, ауэ ещанэ махуэм ар Тхьэм лӀахэм къахигъэтэджыкӀыжащ, Тхьэм и псалъэ тхахэм тету.

⁵ Мэссихь Кифэ зыкъригъэлъэгъуащ итӀанэ. И гъуэгу ирикӀуэ лӀы пщыкӀутӀым закъригъэлъэгъуащ абы и ужькӀэ.

⁶ Къуэш щитху нэхърэ нэхъыбэм закъригъэлъэгъуащ итӀанэ. Абыхэм ящыщу нэхъыбэр псэущ, ящыщ гуэрхэри дунейм ехыжащ.

⁷ Хьисэ Екъуби зыкъригъэлъэгъуащ абы и ужькӀэ, итӀанэ апостол псоми закъригъэлъэгъуащ.

⁸ Псом я ужькӀэ сэ, сабий мылъхуэсым хуэдэм, зыкъызигъэлъэгъуащ.

⁹ Сыт щхьэкӀэ жыпӀэмэ апостолхэм ящыщу нэхъ цӀыкӀур сэращ, апостол къызжаӀэнуи схуэфащэкъым: Тхьэм и члисэ зэхуэсым щыщхэр исхуэкӀыу щытащ.

¹⁰ Ауэ Тхьэм и нэфӀ къызэрысщыхуам къыхэкӀкӀэ иджы сызэрыщытым хуэдэ сыхъуащ. И нэфӀ къызэрысщыхуар пщӀэншэ хъуакъым. Адрей псоми нэхърэ нэхъ куэдрэ сылэжьащ, ауэ сэракъым лэжьар, Тхьэм и нэфӀ къысщыхуэри сигъэлэжьащ.

¹¹ ХъыбарыфӀыр цӀыхухэм ялъэзыгъэӀэсыр сэрауэ щытми, адрей апостолхэрауэ щытми, а хъыбарыфӀырщ ялъэдгъэӀэсыр. Фэри фӀэщхъуныгъэ фиӀэ хъуащ а хъыбарыфӀымкӀэ.

ЛӀахэр къызэрытэджыжынур

¹² Тхьэм Мэссихь лӀахэм къазэрыхигъэтэджыкӀыжам и хъыбарыр цӀыхухэм яхуэтӀуатэ пэтми, фэ фщыщу цӀыху гуэрхэм, «ЛӀахэр къызэрытэджыжынур пэжкъым», жаӀэу, дауэ жаӀэн ялъэкӀрэ?

¹³ ЛӀахэр къэмытэджыжынумэ, абы щыгъуэ Тхьэм Мэссихьи лӀахэм къахимыгъэтэджыкӀыжынтэкъым.

¹⁴ Тхьэм Мэссихь лӀахэм къахимыгъэтэджыкӀыжамэ, фэ фэдгъащӀэ хъыбарыфӀым пщӀэ иӀэнутэкъым, ди фӀэщхъуныгъэми пщӀэ иӀэнутэкъым.

¹⁵ Абы нэмыщӀу, Тхьэм щыхьэт нэпцӀ дыхуэхъуауэ къыщӀидзынт, Тхьэм Мэссихь лӀахэм къазэрыхигъэтэджыкӀыжам щыхьэт дыхуэхъуащ, ауэ «Тхьэм лӀахэр къигъэтэджыжынукъым», жаӀэу, а цӀыхухэм зэрыжаӀэм тету щытамэ, Тхьэм Мэссихьи къигъэтэджыжынтэкъым.

¹⁶ Тхьэм лӀахэр къимыгъэтэджыжынумэ, Мэссихьи къигъэтэджыжынтэкъым.

¹⁷ Тхьэм Мэссихь лӀахэм къахимыгъэтэджыкӀыжамэ, фи фӀэщхъуныгъэр пщӀэншэ хъунт, фи гуэныхьхэри иджыри фтелъынут.

¹⁸ МэссихькӀэ фӀэщхъуныгъэ зиӀэу лӀахэр кӀуэдауэ хъунт абы щыгъуэм.

¹⁹ Мэссихь дызэрыщыгугъыр дуней гъащӀэ закъуэр арамэ, цӀыху псоми нэхърэ нэхъ гъуэгу мыгъуэ теувахэр дэращ.

²⁰ Ауэ зэрыщыӀэщи, Тхьэм Мэссихь лӀахэм къахигъэтэджыкӀыжащ, Тхьэм адрей лӀахэр къызэригъэтэджыжынумкӀэ Мэссихь сакъылэт къытхуэхъун щхьэкӀэ.

²¹ Сыт щхьэкӀэ жыпӀэмэ лӀэныгъэр къызыпкърыкӀар зы цӀыху закъуэщ, апхуэдэуи лӀахэм я къэтэджыжыныр къызыпкъырыкӀынур зы цӀыхущ.

²² ЦӀыху псори Ӏэдэм къызэрытехъукӀахэм щхьэкӀэ, зэрылӀэжынум хуэдэу, Мэссихь зи псэм щыщ цӀыху псори Тхьэм къигъэпсэужынущ.

²³ Ауэ а Ӏуэхур къызэрыхъунур хэти щичэзум дежщ: лӀахэм япэ къахэтэджыкӀыжар Мэссихьщ. Абы дунейм къыщигъэзэжкӀэ, и цӀыхухэр къэтэджыжынущ.

²⁴ Дунейм и кӀэухыр къэсынущ абы и ужькӀэ. Ар къыщыскӀэ, Мэссихь Ӏэтащхьэ псори, тепщэныгъэ зиӀэ псори, лъэкӀыныгъэ зиӀэ псори игъэкӀуэда нэужь, Тхьэуэ Адэ лъапӀэм тепщэныгъэшхуэр абы къритынущ.

²⁵ Сыт щхьэкӀэ жыпӀэмэ Мэссихь тепщэныгъэр иӀэн хуейщ, Тхьэм Мэссихь и бийхэр Мэссихь и лъэгу щӀигъэувэху.

²⁶ Иужьрей бийуэ Тхьэм игъэкӀуэдынур лӀэныгъэр арщ;

²⁷ сыт щхьэкӀэ жыпӀэмэ Тхьэм и псалъэ тхахэм зэрыхэтым хуэдэу: «Тхьэм псори Мэссихь и лъэгу щӀагъым щӀигъэуващ». Тхьэм псори Мэссихь и тепщэныгъэм щӀигъэувауэ жиӀэу, Тхьэм и псалъэ тхахэм хэтщи, Мэссихь и тепщэныгъэм псори щӀэзыгъэува Тхьэр зэрахэмытыр нахуэщ.

²⁸ Тхьэм псори езым и Къуэ Мэссихь и тепщэныгъэм щӀигъэува нэужь, и Къуэри Тхьэуэ псори зи щӀагъ щӀэзыгъэувам и тепщэныгъэм щӀэувэнущ. Апхуэдэу, Тхьэр цӀыху псом я дежкӀи сыти мэхъу.

²⁹ Тхьэм лӀахэр къимыгъэтэджыжынумэ, лӀахэм я пӀэкӀэ зезыгъэумэхъ цӀыхухэм сыт я гум илъыр? Тхьэм лӀахэр къимыгъэтэджыжынумэ, лӀахэм я пӀэкӀэ сыт зыщӀрагъэумэхъыр?

³⁰ Дэри сыхьэт къэс шынагъуэм сыт зыщӀыхэдгъахуэр?

³¹ Си къуэшхэ, Мэссихь Хьисэ ди Зиусхьэныр фэ фи псэм зэрыщыщымкӀэ сызэрыпагэр зэрыщыпкъэм хуэдэу, лӀэныгъэм махуэ къэси сызэрыпэгъунэгъури пэжщ.

³² ЦӀыхухэм я гупсысэкӀэм тету сегупсысу щытатэмэ, Ефес къалэм сыщыӀэу, хьэкӀэкхъуэкӀэ хуэдэ цӀыхухэм сащебэным, сыт абы и фӀагъыу къыхэкӀыну щытар? Тхьэм лӀахэр къимыгъэтэджыжыну щытмэ, «Дывгъашхэ, девгъафэ, сыту жыпӀэмэ пщэдей дылӀэнущ».

³³ Аращи, цӀыхухэм зыкъевмыгъэгъапцӀэ: Ныбжьэгъу Ӏейхэм цӀыху щэныфӀэр ягъэкӀуэд.

³⁴ ЕкӀугъэм фытету зыкъэфщӀэж. Гуэныхь лэжьыным и ужь фикӀ; сыт щхьэкӀэ жыпӀэмэ Тхьэр зымыщӀэ цӀыху гуэрхэр къыфхэтщ. ФызгъэукӀытэн щхьэкӀэ, жызоӀэ ар.

ЛӀахэм къахэтэджыкӀыжа цӀыхухэм я пкъыр

³⁵ Зыгуэрым жиӀэнкӀэ мэхъу: «ЛӀахэр дауэ къызэрытэджыжынур? Я пкъыр сытым хуэдэну?»

³⁶ Уэ, цӀыху зэхэщӀыкӀыншэ! ЩӀым хэпсэр мылӀэмэ, къэпсэужыфынукъым.

³⁷ ЩӀым жылэ щыхэпсэкӀэ, къэкӀынум и пкъыракъым хэпсэр, атӀэ жылэ къудейщ, гуэдзым и жылэщ е нэгъуэщӀым и жылэщ.

³⁸ Тхьэр зэрыхуейм тету пкъы кърет, дэтхэнэ зы жылэ лъэпкъми езым и пкъыр кърет.

³⁹ Пкъы псори зэхуэдэкъым. ЦӀыхум и пкъыр зыщ, хьэкӀэкхъуэкӀэхэм я пкъыр щхьэхуэщ, къуалэбзухэм я пкъыр нэгъуэщӀщ, бдзэжьейхэри аращ.

⁴⁰ Уафэм и пкъыхэри щыӀэщ. ЩӀылъэм тет пкъыхэри щыӀэщ. Уафэм щыӀэ пкъыхэм я дахагъэр щхьэхуэщ, щӀылъэм тет пкъыхэми я дахагъэр нэгъуэщӀщ.

⁴¹ Дыгъэм езым и дахагъэр иӀэжщ, мазэми нэгъуэщӀ дахагъэ иӀэщ, вагъуэхэри аращ. Вагъуэхэм я дахагъэкӀэ зэщхьэщокӀ.

⁴² ЛӀахэр къызэрытэджыжынум и Ӏуэхури апхуэдэщ зэрыщытынур. ЩӀым хасэ жылэм хуэдэу, щӀым щӀалъхьэ пкъыр кӀуэдынущ, ауэ къэтэджыжыну пкъыр мыкӀуэду къелынущ.

⁴³ Зэрамыпэсу щӀым щӀалъхьэ, ауэ щӀыхьышхуэ иӀэу къэтэджыжынущ. Къару имыӀэжу щӀалъхьэ, ауэ къару иӀэу къэтэджыжынущ.

⁴⁴ ЩӀалъхьэр лымрэ къупщхьэмрэ къахэщӀыкӀа пкъыращ, къэтэджыжынур Тхьэм и Псэ ЛъапӀэм цӀыхум къритыну пкъыр арщ. Лымрэ къупщхьэмрэ къахэщӀыкӀа пкъыр щыӀэмэ, Тхьэм и Псэ ЛъапӀэм цӀыхум къритыну пкъыри щыӀэщ.

⁴⁵ Тхьэм и псалъэ тхахэм хэтщ: «Япэрей цӀыхуу Ӏэдэм зи цӀэр псэ зыхэт цӀыху хъуащ». Ауэ иужьрей Ӏэдэмыр арщ гъащӀэ къыдэзыт псэр.

⁴⁶ Япэу къакӀуэр Тхьэм и Псэ ЛъапӀэм цӀыхум кърит пкъыр аркъым, атӀэ лымрэ къупщхьэмрэ къахэщӀыкӀа пкъыр арщ. Тхьэм и Псэ ЛъапӀэм цӀыхум къритыну пкъыр къыщыкӀуэнур иужькӀэщ.

⁴⁷ Япэрей цӀыхур мы дунейм щыщу щытащ, Тхьэм ар ятӀэм къыхигъэхъукӀащ. ЕтӀуанэрей цӀыхур уафэм щыщщ – Зиусхьэныр арщ.

⁴⁸ Мы дунейм тет цӀыхухэр Тхьэм ятӀэм къыхигъэхъукӀа цӀыхум хуэдэщ. Уафэм щыпсэу цӀыхухэр уафэм щыщым хуэдэнущ.

⁴⁹ Тхьэм ятӀэм къыхигъэхъукӀа цӀыхум дызэрыхуэдэм ещхьу, уафэм щыщми дыхуэдэнущ.

⁵⁰ Ауэ, си къуэшхэ, мыр нывжызоӀэ: Лымрэ лъымрэ къахэхъукӀа цӀыхум Тхьэм и ТепщэныгъэшхуэмкӀэ Ӏыхьэ къылъысыфынукъым. КӀуэдыжын хуейм мыкӀуэдыжын гъащӀэр ӀыхьэфӀу иӀэ хъуфынукъым.

⁵¹ ФыкъэдаӀуэ, щэху гуэр нывжесӀэнущ: Дэ псори дылӀэнукъым,

⁵² ауэ занщӀэу, напӀэзыпӀэм, дунейм и кӀэухым деж бжьамиишхуэм и макъыр къыщыӀукӀэ, Тхьэм дэ псори дызэрихъуэкӀынущ. Сыт щхьэкӀэ жыпӀэмэ бжьамиишхуэм и макъыр къэӀунущ, лӀахэри мыкӀуэдыжыну къэтэджыжынущ, Тхьэми дызэрихъуэкӀынущ.

⁵³ Пкъы кӀуэдыжынум мыкӀуэдыжыныгъэм и фащэр зыщитӀэгъэн хуейщ, лӀэжыну пкъыми мыкӀуэдыжын гъащӀэм и фащэр зыщитӀэгъэн хуейщ.

⁵⁴ Пкъы кӀуэдыжынум мыкӀуэдыжыныгъэм и фащэр зыщитӀэгъа нэужь, лӀэжыну пкъыми мыкӀуэдыжын гъащӀэм и фащэр зыщитӀэгъа нэужь, Тхьэм и псалъэ тхахэм хэт мы псалъэхэр пэж хъунущ: «Тхьэм текӀуэныгъэр къихьри, лӀэныгъэр игъэкӀуэдащ».

⁵⁵ «Уэ, лӀэныгъэ, уи шэрэзым и къарур дэнэ щыӀэ? Уэ, жыхьэнмэ, уи текӀуэныгъэр дэнэ щыӀэ?»

⁵⁶ ЛӀэныгъэм и шэрэзыр гуэныхьыращ. УнафэкӀи гуэныхьым тепщэныгъэ къытхуиӀэщ.

⁵⁷ Ауэ Тхьэм щӀыхьышхуэр ейщ. Абы ди Зиусхьэн Хьисэ Мэссихь текӀуэныгъэр къыдитэнэу ищӀащ.

⁵⁸ Аращи, си къуэш лъапӀэхэ, Тхьэм и гъуэгу зыми зытревмыгъэгъэкӀыу щыпкъагъэм фытет. Фи псэм фемыблэжу Зиусхьэным и Ӏуэхум зэпымыууэ и ужь фит, сыт щхьэкӀэ жыпӀэмэ Зиусхьэным хуэфщӀэ Ӏуэхур пщӀэншэ зэрымыхъунур фощӀэ.