Zekarĩa 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebihanda ebikagana Nyamuhanga byasyakehĩbwa

¹ Enzumwa yʼekĩnywa kyʼOmwami Mukulu ni malwa oko kihugo kyʼeHadrakĩ, nʼeDamasekĩ, ni hʼeriluhukira hako kusangwa ameso wʼabandu nʼawʼebihanda byosĩ bya Ĩsraelĩ kutsibu akalolaya eyiri Omwami Mukulu;

² nʼeHamatĩ nibya, ekikabya oko mutano wako; nʼeTĩro nʼeSĩdonĩ, kusangwa ni bʼamenge kutsibu.

³ Neryo eTĩro moyayĩhĩmbĩra ahakangatĩre, kandi mwahĩndanĩa ebĩtsĩpa ngʼolũtũtũ, nʼesyamagetsi ngʼebyondo byʼesyonzira.

⁴ Lebaya, Omukama asyamusingula, kandi asyagusa obũsokĩ buwe omo ngetsi; naye asyakeregeswa omo muliro.

⁵ Askelonĩ asyalangirakyo, kandi asyubaha; Gaza nibya, asyayinyola omwʼigalwa, na Ekronĩ, amaha wago asyahemulwa; nʼomwami asyabulirana eGaza, nʼeAskelonĩ sihendisyabya mo bandu.

⁶ Kandi abasa-na-nyĩnya basyĩkala eAsdodĩ, kandi nasyatsĩrĩsya eriyiheka lyʼAbafĩlĩstĩnĩ.

⁷ Nage nasyalũsya omusasi wabo omo buno bwabo, nʼesyonye syabo nasyalũsyasyo omo katĩkatĩ kʼameno wabo; nabo basyabya basĩgalira busana na Nyamuhanga wetu; kandi basyabya ngʼekihanda kyʼeYũda, nʼeEkronĩ asyabya ngʼOmũyebũsĩ.

⁸ Nage nasyagotera enyũmba yage busana nʼomulondo wʼamalwa, kandi busana nʼoyukalaba nʼerisubula kandi; sihali Omũnũbya oyo wasyalaba kubo kandi; kusangwa lino nabirilangira omo meso wage.

Eriingira lya Yesu eYerũsalema

⁹ Utseme kutsibu uwe mwali wʼeSĩonĩ! Uwe mwali wʼeYerũsalema, wũte obogo! Lebaya, omwami wawe akasa ukʼuwe; atunganene, kandi awite erĩlamya, abĩrĩyĩkehya, kandi ĩkere oko punda, ega, oko kyana kyʼepunda.

¹⁰ Nasyabũlĩranĩa egalĩ oko Efũraĩmũ, nʼesabayĩrĩ oko Yerũsalema; nʼobuta bwʼamalwa bwasyabũlĩranĩbwa; naye asyabũga Obuholo oko bihanda; nʼeritabala liwe lyasyabya erĩlũa oko ngetsi erĩhĩka oko yindi ngetsi, nʼerĩlũa oko Lũsĩ lwʼeEfũratĩ nʼerĩhĩka oko syondũlĩ syʼekihugo.

¹¹ Neryo busana nawe nibya, busana nʼomusasi wʼendagano yage haguma nawe, nabiribohola ababohĩrwe bawe erĩlũa omo buhya obute mo magetsi.

¹² Musube ahakangatĩre, ĩnywe mũbohĩrwe abawite amaha; mũnabwĩre ngatũlago nyiti, ngandĩkũsũbũlĩryako ngendo ĩbĩrĩ.

¹³ Kusangwa nasyakondomya Yũda ngʼobuta bwage, nasyosũlya obuta omo Efũraĩmũ; kandi nasyatsatsũhya abagala bawe uwe Sĩonĩ erilwa nʼabagala bawe, uwe kihugo kyʼAbagĩrĩkĩ, kandi nasyakuyira ngʼomũyalĩ gʼomũlwĩ.

¹⁴ Neryo Omwami Mukulu asyabutuka endata wabo; nʼomusoha wuwe asyahuluka ngʼerĩpalya; nʼomukama, Omwami Mukulu asyabuha engubi, kandi asyagenda omo hinyabungu hyʼelutambi lwʼeyĩkwa.

¹⁵ Omwami Mukulu Wʼemilondo asyalwirabo; nabo basyalya, nʼeriryatangirira amabwe wʼerigusa; basyapũlya nʼeritamira ngʼomo bĩnyũ, basyũsũla ngʼekibindi kyʼerihonga, eritsapa ngʼesyonũnga syʼekiherero.

¹⁶ Omwami Mukulu, Nyamuhanga wabo, asyalamyabo ekiro ekyo ngʼendeko yʼabandu buwe; kusangwa bali ngʼamabwe wʼembĩta, awakakangabasanaya omo kihugo kiwe.

¹⁷ Kusangwa obubuya bwahi nʼerikanga lyahi lyasyabya lyabo! Engano yasyaleka abalwana ibakamaha, nʼebĩnyũ bihya-bihya byasyaleka abana-bato ibakamaha!