Zekarĩa 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akasonda abandu baganyirane

¹ Neryo oko mwaka wʼakani wʼOmwami Darĩo, ekĩnywa kyʼOmwami Mukulu mokyahĩka uku Zekarĩa oko kiro kyʼebini kyʼomukera wʼomwenda, go Kĩsĩlewũ.

² Nĩkwa omũyĩ wʼeBetelĩ abya iniabirituma Sareserĩ na Regemĩ-melekĩ, nʼabandu babo, erisonda-sondya eriganyira lyʼOmwami Mukulu.

³ Ĩbakakanaya nʼabahererĩ bʼenyũmba yʼOmwami Mukulu Wʼemilondo, nʼabamĩnyererĩ, bati, Nangalira oko mukera wʼakatanu, eriyisolola, ngoko nabirikola emyaka eyĩ yosĩ mingi kwehĩ?

⁴ Neryo ekĩnywa kyʼOmwami Mukulu Wʼemilondo mokyambĩkako kiti,

⁵ Ubwire abandu bosĩ bʼekihugo nʼabahererĩ, uti, Omugulu mwatsira akalyo nʼeririra omo mukera wʼakatanu nʼowʼakalinda emyaka eyĩ makũmĩ alinda, momwanatsira akalyo busana nage kwenene kwehĩ?

⁶ Kandi omugulu mukalya nʼomugulu mũkapũlaya, simukalya busana nenyũ ĩnywebene, na nenyũ ĩnywebene kwehĩ?

⁷ Ebĩ sĩ bĩnywa ebyo Mwami Mukulu akanganaya omo bamĩnyererĩ bʼerĩmbere, omugulu Yerũsalema abya mwʼabandu nʼerigasa, haguma nʼemĩyĩ yako eyĩtĩmbĩreko, nʼekihugo kyʼelutambi lwʼeyĩkwa nʼehitwa hyʼekihugo kyʼeyĩkwa byabya mo bandu kwehĩ?

⁸ Neryo ekĩnywa kyʼOmwami Mukulu mokyahĩka uku Zekarĩa kiti,

⁹ Omwami Mukulu Wʼemilondo akabũga ati, Mutswere erĩbanza lyʼekwenene, mũkangaye obubuya nʼeriganyira obuli mundu uku mũlĩkyabo;

¹⁰ kandi sĩmũnũbaye omũkwakalĩ, kutse engũbĩ, kutse owʼehandi, kutse omwera; kandi simuhimbike ebibi omo mitima yenyũ omuguma oko gundi.

¹¹ Nĩkwa mobagana erihulikirira, mobasũkya ebitigo, mobalĩba amatwĩ wabo, bati sĩbowe.

¹² Kandi, mobayira emitima yabo mwʼĩkalĩre ngʼerĩbwe ryʼengarwe, bakasyowa emigambo, nʼebĩnywa ebyo Mwami Mukulu Wʼemilondo atuma omo Mũlĩmũ wuwe busana nʼabamĩnyererĩ bʼembere; busana nʼekyo erihitana lĩnene molyahĩka lĩkalũa oko Mwami Mukulu Wʼemilondo.

¹³ Neryo ngoko abirikira, nabo mobatasonda erihulikirira, litya mobabirikira nage mondasonda erihulikirira, Omwami Mukulu Wʼemilondo akabũga atya;

¹⁴ nĩkwa nasyapanza-panzabo omo kanyabungu omo katĩkatĩ kʼebihanda byosĩ ebyo batasĩ. Litya ekihugo kikabya kĩma enyũma wabo, kyaleka ihatabya mundu oyukalaba kutse erisubula; kusangwa mobayira ekihugo kyowene mo mulala.