Zekarĩa 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyogalĩ nʼesyosabayĩrĩ

¹ Nage monasumba ameso wage kandi, monalebya, neryo lebaya, esyogalĩ ĩnĩ mosyahuluka omo katĩkatĩ kʼebitwa bibiri; nʼebitwa ebyo byabya bitwa byʼemiringa.

² Omo galĩ yʼerĩmbere habya esyosabayĩrĩ syʼengula; nʼomo galĩ yʼakabiri esyosabayĩrĩ Sĩkĩnĩre.

³ Nʼomo galĩ yʼakasatu esyosabayĩrĩ syʼenzeru; nʼomo galĩ yʼakani esyosabayĩrĩ sĩkalĩre syʼebitanga.

⁴ Neryo monabũga monabwira omũlaĩka oyo wakanaya nage, nyiti, Esĩ ni syahi, mukama wage, kwehĩ?

⁵ Neryo omũlaĩka mwasũbĩrya mwambwira ati, Ebĩ nĩ bĩrĩmũ bini byʼelubula, ebikagenda bĩkalũaho byamabihangana embere syʼOmukama wʼekihugo kyosĩ.

⁶ Nʼegalĩ eyiri kwʼesyosabayĩrĩ Sĩkĩnĩre ikahuluka erĩlolya eyiri ekihugo kyʼelutambi lwʼendata; nʼesyonyeru-nyeru sikahuluka enyũma wasyo; nʼesyʼebitanga sikahuluka erĩlolya omo kihugo kyʼelutambi lwʼeyĩkwa.

⁷ Omugulu esyʼamaka syahuluka mosyakwa omũhwa wʼeriyalendera eyĩ nʼeyĩ erĩteya ekihugo. Neryo omũlaĩka mwabũga ati, Ugende uyalendere erĩyateya ekihugo. Neryo mobalendera eyĩ nʼeyĩ omo kihugo.

⁸ Neryo omũlaĩka mwambirikira, mwambwira ati, Lebaya, abakagenda erĩlolya omo kihugo kyʼelutambi lwʼendata bamabonderya erihitana lyage omo kihugo kyʼelutambi lwʼendata.

⁹ Nʼekĩnywa kyʼOmwami Mukulu mokyambĩkako kiti,

¹⁰ Wĩmaye obuhere oko basayĩ, uku Heldaĩ, nʼuku Tobĩya, nʼuku Yedaya; neryo wase oko kiro ekyo kisa, wingire omo nyũmba ya Yosĩa mugala wa Zefanĩa, abalũa eBabelĩ.

¹¹ Kandi wĩmaye ebĩtsĩpa nʼesyamagetsi, muyiresyo mo mbĩta mũhĩreyo oko mutwe wʼomũhererĩ mukulu ye Yosũa, mugala wa Yehozadakĩ.

¹² Mumubwire muti, Omwami Mukulu Wʼemilondo akabũga ati, Lebaya, omundu oyukahulawa mo Mutahi; naye asyalasya emitahi aho wuwe; kandi asyahĩmba eHekalũ yʼOmwami Mukulu.

¹³ Ega asyahĩmba eHekalũ yʼOmwami Mukulu; kandi nina ye wasyaheka erĩsĩkya, asyĩkala nʼeritabala oko wʼekĩtũmbĩ kiwe kyʼobwami. Litya asyabya omũhererĩ oko kĩtũmbĩ kiwe kyʼobwami; nʼoluhota lwʼobuholo lwasyabya omo katĩkatĩ kʼabosĩ babiri.

¹⁴ Neryo embĩta yasyabya uku Helemũ, nʼuku Tobĩa, nʼuku Yedaya, nʼuku Henĩ, mugala wa Zefania, busana nʼekĩbũkyo omo Hekalũ yʼOmwami Mukulu.

¹⁵ Nʼabali hali basyasa nʼerĩhĩmba eHekalũ yʼOmwami Mukulu. Neryo mwasyaminya ko Mwami Mukulu abirinyituma ũkwʼĩnywe. Nʼekĩ kyasyabererera, mwamowa ndeke Omwami Mukulu, Nyamuhanga wenyũ.