Zekarĩa 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũkũnzo wʼebarua eyikaguluka yʼeritswera

¹ Kandi monasumba ameso wage, monalebya neryo lebaya, ihali omũkũnzo wʼebarua owakaguluka.

² Neryo mwanyibwira ati, Wamalola ũkũkĩ kwehĩ? Neryo monasũbĩrya nyiti, Namalangira omũkũnzo wʼebarua owakaguluka; obuli bwago ni metere 9, nʼobugali bwago ni metere 4.

³ Neryo mwambwira, ati, Erĩ niʼtakira erikaya oko kihugo kyosĩ; kusangwa obuli mundu Oyũkĩba asyatahulwa ngʼerisaka ko liri oko luhande luguma lwago; nʼobuli mundu oyũkalahĩraya asyatahulwa ngʼerisaka ko liri oko lundi luhande.

⁴ Omwami Mukulu Wʼemilondo akabũga ati, Nasyaleka eritakira iryahuluka nalyo lyasyingira omo nyũmba yʼomwĩbĩ, nʼomo nyũmba yʼoyũkalahĩraya nʼamabehĩ omo lĩna lyage; nalyo lyasyĩkala omo nyũmba eyo, lyasyabugayo haguma nʼemiti yayo nʼamabwe wayo.

⁵ Neryo omũlaĩka oyo wakanaya nage mwahuluka, mwambwira ati, Usumbe ameso wawe Ũlebaye ekikahuluka nga nĩkĩ.

⁶ Neryo monabũga nyiti, ko nĩkĩ kwehĩ? Naye mwabũga ati, Ekĩ ni kitiri ekyo ekikahuluka. Kandi mwabũga ati, Ekĩ nĩ kĩsosekanĩo kyabo omo kihugo kyosĩ.

⁷ Neryo, lebaya, ekĩkũnĩngo kyʼerĩsasĩ mokyasumbwa; nʼoyũ nĩ mũkalĩ oyo wĩkere omwisi wʼekitiri.

⁸ Neryo mwabũga ati, Ekĩ ni Kibi! Neryo mwagusa omũkalĩ oyo eyĩkwa omo katĩkatĩ kʼekitiri; neryo mwagusa obũlĩto bwʼerĩsasĩ oko buno bwakyo.

⁹ Neryo monasumba ameso wage, monalangira, neryo, lebaya, abakalĩ babiri mobahuluka, nʼerihunga lyabya omo bĩpũpa byabo; kandi babya nʼebĩpũpa ngʼebĩpũpa byʼomũrobĩ; nabo mobasumba ekitiri ekyo endata omo katĩkatĩ kʼekihugo nʼelubula.

¹⁰ Neryo monabwira omũlaĩka oyo wakanaya nage, nyiti, Aba bakatwala ekitiri ekyo kyo hayi kwehĩ?

¹¹ Naye mwambwira ati, Busana nʼerĩhĩmba ehekalũ busana naye omo kihugo kyʼeSĩnarĩ; nʼomugulu yasyabya yabĩtekanĩbwa, asyahĩrwaho oko kĩtũmbĩ kiwe.