Zekarĩa 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyotala sirinda nʼemiti ĩbĩrĩ yʼeMĩzeĩtũnĩ

¹ Neryo omũlaĩka oyo wakanaya nage mwasa kandi, mwanyĩbũkya, ngoko omundu akabũkĩbawa omo tũgotserĩ tuwe.

² Neryo mwanyĩbũlya ati, Wamalangirakĩ kwehĩ? Nage monabũga nyiti, Ngalangira, kandi lebaya, ekĩhambĩrĩrĩ kyʼetala kyʼesyamagetsi kyosĩ, nʼekibindi kyakyo, endata kuyo haguma nʼesyotala syakyo sirinda endata kukyo; haguma nʼamuno alinda wʼobuli tala, awali endata kukyo;

³ kandi nʼemiti ĩbĩrĩ yʼemĩzeĩtũnĩ hakũhĩ nakyo, omuguma oko luhande lwʼamali lwʼekibindi, nʼogundi oko luhande lwʼamalembe lwakyo.

⁴ Neryo monasũbĩrya nʼerĩkanĩa nʼomũlaĩka oyo wakanaya nage, nyiti, Ebĩ ni byahi, mukama wage, kwehĩ?

⁵ Neryo omũlaĩka oyo wakanaya nage mwasũbĩrya mwabũga nage ati, Sĩwasĩ ebĩ nga ni byahi kwehĩ? Nage monabũga nyiti, Iyihi, mukama wage.

⁶ Neryo mwasũbĩrya mwambwira ati, Ekĩ nĩ kĩnywa kyʼOmwami Mukulu uku Zerũbabelĩ, kiti, Si busana nʼamaka, kutse busana nʼobũtokĩ, nĩkwa busana nʼOmũlĩmũ wage, Omwami Mukulu Wʼemilondo atya.

⁷ Uwe kitwa kinene, uwendi kwehĩ? Embere sya Zerũbabelĩ wasyabya bwerere; naye asyahũlũkya erĩbwe lyʼendata haguma nʼobogo bwʼolukogo, olukogo, kulyo!

⁸ Kandi ekĩnywa kyʼOmwami Mukulu mokyambĩkako kiti,

⁹ Ebyala bya Zerũbabelĩ byabĩrĩhĩra ekibanza kyʼenyũmba eyĩ; nʼebyala biwe byasyabugayo nibya. Neryo wasyaminya Omwami Mukulu Wʼemilondo kwʼabirinyituma ũkwʼĩnywe.

¹⁰ Kusangwa nindi abiripona ekiro kyʼemyatsi mike-mike kwehĩ? Nĩkwa abalinda aba basyatsema erilangira olulengo omo byala bya Zerũbabelĩ; aya ni meso wʼOmwami Mukulu, awakalendera eyĩ nʼeyĩ omo kihugo kyosĩ.

¹¹ Neryo monasũbĩrya, monamubwira nyiti, Emiti ĩbĩrĩ eyĩ yʼemĩzeĩtũnĩ nĩ yakĩ oko luhande lwʼamali lwʼekĩhambĩrĩrĩ kyʼetala nʼoko luhande lwʼamalembe lwakyo kwehĩ?

¹² Neryo monasũbĩrya engendo yʼakabiri, monamũbũlya nyiti, Emitahi ĩbĩrĩ eyĩ yʼemĩzeĩtũnĩ nĩ yakĩ eyiri hakũhĩ nʼesyonzira ĩbĩrĩ syʼesyamagetsi, esĩkũtũlĩra amagũta wʼesyamagetsi erĩlũa kusyo kwehĩ?

¹³ Naye mwanyĩsũbĩrya, ati, Sĩwasĩ ebĩ nga nĩkĩ kwehĩ? Neryo monabũga nyiti, Iyihi, mukama wage.

¹⁴ Neryo mwabũga ati, Aba ni bagala babiri bahakabĩbwe amagũta, abakahangana oko mũsĩke wʼOmukama wʼekihugo kyosĩ.