Zekarĩa 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũlaĩka wʼOmwami Mukulu na Yosũa

¹ Neryo mwanyĩkangya omũhererĩ mukulu ye Yosũa inianimene embere wʼomũlaĩka wʼOmwami Mukulu, na Satanĩ inianimene oko byala biwe byʼamali akamutsongera.

² Neryo Omwami Mukulu mwabwira Satanĩ ati, Omwami Mukulu akukunge, uwe Satanĩ! Ega, Omwami Mukulu oyo wabiriyisoga eYerũsalema akukunge! Oyũ si mutahi owapũrawa omo muliro kwehĩ?

³ Neryo Yosũa abya iniambite esyongimba esĩtũnda-tũndĩre, neryo abya inianimene embere wʼomũlaĩka.

⁴ Naye mwasũbĩrya mwabũga nʼababya bahangene embere siwe, ati, Mumwambule kwʼesyongimba esĩtũnda-tũndĩre. Neryo mwamubwira ati, Lebaya, Nabirikutendula kwʼamalolo wawe, nage ngandĩkwambalya esyongimba syʼobukama.

⁵ Nage monabũga nyiti, Mũhĩre oko mutwe wuwe kwʼekiremba kĩhenĩrye. Neryo mobahĩra oko mutwe wuwe kwʼekiremba kĩhenĩrye, mobamwambalya esyongimba; nʼomũlaĩka wʼOmwami Mukulu mwahangana hakũhĩ.

⁶ Omũlaĩka wʼOmwami Mukulu mwabwira Yosũa yo ndeke, ati,

⁷ Omwami Mukulu Wʼemilondo akabũga ati, Wamakwama esyonzira syage, kandi wamateya erihana lyage, neryo wasyatswera enyũmba yage, kandi wasyateya ebibuga byage, nage nasyakuha ahʼerilaba omo katĩkatĩ kʼabo abimene hakũhĩ.

⁸ Uwe Yosũa, omũhererĩ mukulu, wowe lino, uwe nʼabalĩkyenyũ abĩkere embere syawe; mĩnyĩsyo; kusangwa, lebaya, nasyaletamo Omugombe wage, go Mutahi.

⁹ Kusangwa, lebaya, erĩbwe eryo nahĩra embere wa Yosũa; endata okwʼĩbwe riguma hali ameso alinda; lebaya, nasyabatsa emibatsire yalyo, Omwami Mukulu Wʼemilondo akabũga, nage nasyalũsya amalolo wʼekihugo ekyo oko kiro kiguma.

¹⁰ Omwami Mukulu akabũga ati, Oko kiro ekyo, mwasyabirikirana obuli mundu mũlĩkyabo erĩĩkala haguma omo ndĩna yʼomũlĩkĩ wʼebĩnyũ omo ndĩna yʼomuti wʼomũtĩnĩ.