Zekarĩa 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu asyalembera eYerũsalema nʼeSĩonĩ

¹ Neryo monasumba ameso wage, monalangira, neryo, lebaya, omundu iniawite oko lukoba lwʼerirenga omo byala biwe.

² Neryo monabũga nyiti, Ukayahi kwehĩ? Naye mwambwira ati, Ngayalenga eYerũsalema, erĩrebya obugali bwayo, nʼobuli bwayo nga nĩkĩ.

³ Neryo, lebaya, omũlaĩka oyo wakanaya nage mwahuluka, nʼogundi mũlaĩka mwahuluka erĩyahĩndana naye,

⁴ mwamubwira ati, Tibita, ũbũge nʼomũlwana oyũ, uti, eYerũsalema yasyĩkalwamo ngʼehĩyĩ bitawite esyombĩmbo busana nʼobungi bwʼabandu nʼesyonde muyo.

⁵ Kusangwa ĩngye, Omwami Mukulu ati, nasyabya lũhĩmbo lwʼomuliro busana nayo, erĩtĩmba oko mbande syosĩ, nasyabya lukengerwa omo katĩkatĩ kayo.

⁶ Omwami Mukulu ati, Ego, ego, mutibite mũlũe omo kihugo kyʼelutambi lwʼendata; kusangwa nabiribasanza ehosĩ ngʼamahunga ani wʼekyanya, Omwami Mukulu akabũga.

⁷ Ego, Sĩonĩ, utibite, uwe wĩkere na mwali wa Babelĩ.

⁸ Kusangwa Omwami Mukulu Wʼemilondo akabũga ati, Enyũma wʼolukengerwa abirinyituma oko bihanda ebyo abakabahũnga; kusangwa oyũkabatũlako akatũla oko kalangira kʼerĩso liwe.

⁹ Kusangwa, lebaya, nasyasũkya-sũkya ebyala byage kubo, nabo basyabya banyegwa busana nʼabakobe babo; nenyũ mwasyaminya ko Mwami Mukulu Wʼemilondo, abirinyituma.

¹⁰ Uwe mwali wʼeSĩonĩ, wimbe nʼeritsema; kusangwa, lebaya, ngasa, nasyĩkala omo katĩkatĩ kawe, Omwami Mukulu akabũga atya.

¹¹ Nʼebihanda bingi byasyasangana nʼOmwami Mukulu oko kiro ekyo, kandi basyabya bandu bage; nage nasyĩkala omo katĩkatĩ kawe, nawe wasyaminya ko Mwami Mukulu Wʼemilondo anyituma ukʼuwe.

¹² Neryo Omwami Mukulu asĩmya Yũda mo mwandu ngʼerĩgabo liwe omo kihugo kĩbũyĩrĩre, naye asyayisoga eYerũsalema kandi.

¹³ Emibiri yosĩ ibye bũkũtũ embere syʼOmwami Mukulu; kusangwa abiribuka erĩlũa omo bwĩkalo buwe bũbũyĩrĩre.