Zefania 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ekĩnywa kyʼOmwami Mukulu mokyahĩka uku Zefania mugala wa Kũsĩ, mugala wa Gedalĩa, mugala wa Amarĩa, mugala wa Hezekĩa omo biro bya Yosĩa, mugala wa Amona, omwami wʼeYũda.

Ekiro kyʼerihitana lya Nyamuhanga oko Yũda

² Omwami Mukulu ati, Nasyahwerekererya ebindu byosĩ erĩlũsyabyo endata oko kihugo.

³ Nasyahwerekererya abandu nʼesyonyama; nasyahwerekererya nʼerĩlũsya esyonyonyũ syʼekyanya, nʼesĩswĩ esyʼomo ngetsi, nʼebĩkatwĩkalaya haguma nʼababi; Omwami Mukulu ati, Nasyabugaho abandu erĩlũa oko kitaka.

⁴ Nasyalolya ebyala byage oko Yũda nʼoko syondũlanĩ syosĩ syʼeYerũsalema; nasyabugaho abasĩgalira ba Baalĩ erĩlũa hano, nʼamena wʼabakakolera esyosanamu, haguma nʼabahererĩ.

⁵ Kandi nʼabakayũnamaya oko milondo yʼomo kyanya oko nyitwe syʼamanyũmba, nʼabakayũnamaya nʼerĩlahĩrya oko Mwami Mukulu nĩkwa bakalahĩraya uku Malakamũ;

⁶ Kandi abasuba enyũma erireka erikwama Omwami Mukulu; kandi abatasonda-sonda Omwami Mukulu, kutse erĩmũbũlya.

⁷ Uhune embere syʼOmukama, Omwami Mukulu; kusangwa ekiro kyʼOmwami Mukulu kiri hakũhĩ; kusangwa Omwami Mukulu abĩrĩkokotya obuhere, abirihigula abagenĩ buwe.

⁸ Neryo oko kiro kyʼobuhere bʼOmwami Mukulu, nasyasuyira abanya-mwami, abagala bʼomwami, nʼabosĩ abakambalĩbawa omo syongimba syʼehandi.

⁹ Nʼoko kiro ekyo nasyasuyira abosĩ abakayisumba omo kyaswa kyʼehekalũ, abakũsũlaya enyũmba yʼomukama wabo, nʼomwaga nʼeriteba.

¹⁰ Nʼoko kiro ekyo, Omwami Mukulu ati, Hasyabya omulenge wʼerilaka owakalũa oko Lũkyo Lwʼamahere, nʼekiriro kĩkalũa oko luhande lwʼakabiri lwʼeYerũsalema, nʼekĩlũmo kinene kĩkalũa oko hitwa.

¹¹ Ĩnywe ndũlanĩ syʼeMakĩtesĩ ye Yerũsalema, mulire; kusangwa abandu bosĩ bʼeKanana basyaherĩbwa; abosĩ abakalenga ebĩtsĩpa oko kĩlo basyatĩndwa.

¹² Neryo oko mugulu oyo, nasyasonda-sondya eYerũsalema omo syotala; kandi nasyasuyira abandu ababiritsanda omo mitima yabo, abakabũga omo mitima yabo bati, Omwami Mukulu siendisyakola ebibuya, kutse ebibi.

¹³ Kandi obũsokĩ bwabo bwasyabya bunyegwa, nʼamanyũmba wabo asyabya bĩhũma; ega basyahĩmba amanyũmba, nĩkwa Sĩbendĩsyĩkala mugo; basyahera amalima wʼebĩnyũ, nĩkwa sibendĩsyapũlya ebĩnyũ byago.

¹⁴ Ekiro kinene kyʼOmwami Mukulu kiri hakũhĩ, kiri hakũhĩ kandi kikasa lũba, hulikirira, ekiro kyʼOmwami Mukulu! Omo kiro ekyo omũlwĩ akalaka ekĩkalĩhĩre.

¹⁵ Ekiro ekyo ni kiro kyʼerihitana, ni kiro kyʼobũlĩge nʼerĩsĩsĩkana, ekiro kyʼerĩherya nʼekĩma, ekiro kyʼomwĩrĩmya nʼomũhĩndanĩa, ekiro kyʼebĩtũ nʼomwĩrĩmya owʼenyahĩnda.

¹⁶ Ni kiro kyʼengubi nʼendulo ehee, oko mĩyĩ ikongotere, nʼoko manyũmba wʼemisunguliko wʼenũnga nyiri.

¹⁷ Kandi nasyaleta oko bandu erĩhanga-hangya, kyasyaleka ibagenda ngʼesyondĩma-tĩme, kusangwa babĩrĩhalya oko Mwami Mukulu; nʼomusasi wabo asyũtwa ngʼolũtũtũ, nʼemĩnyokũ yabo ngʼamabĩ.

¹⁸ Ebĩtsĩpa byabo kutse esyamagetsi syabo, sibyendisyatoka erĩlamyabo oko kiro kyʼeriagalirwa lyʼOmwami Mukulu; nĩkwa ekihugo kyosĩ kyasyatimbikwa omo muliro gʼobũha buwe; kusangwa asyahĩra endũlĩ yo ndeke, ega, endũlĩ yʼerĩũbahya, busana nʼabosĩ abĩkere omo kihugo.