Yosũa 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Embĩta yʼerilwa nʼeAĩ

¹ Neryo Omwami Mukulu mwabũga na Yosũa ati, Sigubahe, kutse sũhahũkaye omutima; wĩmaye abandu bosĩ bʼamalwa haguma nawe, uhangane uye eAĩ; langira, nabiriha omwami wʼeAĩ omo byala byawe, nʼabandu buwe, nʼomũyĩ wuwe, nʼebitaka biwe,

² wasyakola oko Aĩ nʼomwami wako ngoko wakola oko Yerĩko nʼomwami wako; ekiguma kisa ebindu byako, nʼesyonde syako, mwasyĩmyabyo mo minyego yenyũ; ũhĩre abakalĩmbaya busana nʼomũyĩ enyũma wago.

³ Neryo Yosũa mwahangana, nʼabandu bosĩ bʼamalwa, eriya eAĩ; neryo Yosũa mwayisoga abandu elfu makũmĩ asatu, abandu bʼobũtokĩ, esyombangĩ, mwatumabo omo kiro.

⁴ Kandi mwahanabo ati, Mwasyalĩmbya omũyĩ, enyũma wago; simuye hali oko mũyĩ, nĩkwa mubye ĩmũnayĩtegekenĩe ĩnywe bosĩ.

⁵ Nage, nʼabandu bosĩ twasyalolya oko mũyĩ. Neryo basyabya bakalũamo eritubambira ngʼerĩmbere, tukandisyasagabo.

⁶ Nabo basyalũamo bakatukwama, erĩhĩka aho twamabĩlũsĩryabo omo mũyĩ; kusangwa bakandĩsyabũga bati, Bakatusaga ngʼerĩmbere; netu tukandisyatibita embere syabo.

⁷ Nenyũ mwasyahangana omwʼĩrĩmbya, imwanyega omũyĩ; kusangwa Omwami Mukulu Nyamuhanga wenyũ asyahĩrago omo byala byenyũ.

⁸ Neryo mwasyabya mwabihamba omũyĩ, mwasyahĩsyago; mwasyakola ngʼekĩnywa kyʼOmwami Mukulu. Lebaya, nabiribahana.

⁹ Neryo Yosũa mwatumabo; neryo mobaya omwʼĩrĩmbya, mobĩkala omo katĩkatĩ kʼeBetelĩ nʼeAĩ, oko luhande lwʼeyĩkwa lwʼeAĩ; nĩkwa Yosũa mwagotsera ekiro ekyo omo katĩkatĩ kʼabandu.

¹⁰ Kandi Yosũa mwahangana omo ngyakya-ngyakya, mwahĩndanĩa abandu, neryo mwayayo, iye nʼabakulu ba Ĩsraelĩ embere syʼabandu eAĩ.

¹¹ Nʼabandu bosĩ abʼamalwa ababya haguma naye mobayayo, mobasegera hakũhĩ, mobahĩka embere syʼomũyĩ, mobalalirira oko luhande lwʼelutambi lwʼendata lwʼeAĩ; nĩkwa habya omusya omo katĩkatĩ kuwe nʼeAĩ.

¹² Kandi mwĩmya bandu nga elfu ĩtanu, mwahĩrabo erĩrĩmbya omo katĩkatĩ kʼeBetelĩ nʼeAĩ, oko luhande lwʼeyĩkwa lwʼomũyĩ.

¹³ Ko bahĩra abandu bo batya, omulondo gosĩ ababya oko luhande lwʼelutambi lwʼendata lwʼomũyĩ, nʼabakalĩmbaya babya oko luhande lwʼeyĩkwa lwʼomũyĩ, na Yosũa mwaya ekiro ekyo omo musya oyo.

¹⁴ Neryo omugulu omwami wʼeAĩ alangirabo, mwanguha mwahangana omo ngyakya-ngyakya, nʼabalume bʼomũyĩ mobahongoka eriyalwa nʼAbaĩsraelĩ, iye nʼabandu buwe bosĩ, oko mugulu ahĩrawa, ahahererenĩe nʼeAraba; nĩkwa siabya asĩ ko hali abakalĩmbaya enyũma wʼomũyĩ erimubambira.

¹⁵ Na Yosũa nʼAbaĩsraelĩ bosĩ mobayĩsosya nga bamakĩndwa, mobatibita omo nzira yʼembwarara.

¹⁶ Nʼabandu bosĩ ababya omo mũyĩ mobahĩndanĩbwa erikwamabo; kandi mobakwamirira Yosũa, mobakurabo erĩlũa omo mũyĩ.

¹⁷ Mohatasĩgala mundu nʼomuguma omo Aĩ kutse eBetelĩ, abatahuluka erikwama Ĩsraelĩ; kandi mobasĩga omũyĩ go butakinga, mobakwamirira Abaĩsraelĩ.

¹⁸ Kandi Omwami Mukulu mwabũga na Yosũa ati, Usuke erĩtũmo eriri omo byala byawe erĩlolyalyo eAĩ; kusangwa ngandikuhago omo byala byawe. Neryo Yosũa mwasuka erĩtũmo eryabya omo byala biwe erĩlolyalyo oko mũyĩ.

¹⁹ Neryo abakalĩmbaya mobahangana lũba aho babya, mobatibita omugulu asuka ebyala biwe, mobingira omo mũyĩ mobĩmyago; kandi mobanguha mobahĩsya omũyĩ gʼomo muliro.

²⁰ Kandi omugulu abalume bʼeAĩ bakebera enyũma syabo, mobalangira, neryo lebaya, omũkĩ wʼomũyĩ mwahetukira omo kyanya, mobatabya nʼamaka wʼeritibita omo nzira eyĩ kutse ũmwʼeyĩ; nʼabandu abatibita omo mbwarara mobabindukira abakwamabo.

²¹ Kandi omugulu Yosũa nʼAbaĩsraelĩ bosĩ balangira abakalĩmbaya ko bamabihamba omũyĩ, nʼomũkĩ wʼomũyĩ kwʼamahetuka, mobabinduka, mobĩta abalume bʼeAĩ.

²² Nʼabandi mobalũa omo mũyĩ eriyabambirabo; neryo mobabya omo katĩkatĩ kʼAbaĩsraelĩ, abandi oko lundi luhande nʼabandi oko lundi luhande; neryo mobĩtabo, mobatasĩga nʼomuguma kutse erĩbalya nʼomuguma.

²³ Nʼomwami wʼeAĩ mobamuhamba inianeho, mobamuletera Yosũa.

Erihera lyʼeAĩ

²⁴ Neryo Ĩsraelĩ babere babĩta esyondũlanĩ syosĩ syʼeAĩ omolĩ nʼomo mbwarara eyo bakwamirirabo, nʼabosĩ ibamabiwa omo boya bwʼomũyalĩ, erĩhĩka aho bahwera, Abaĩsraelĩ bosĩ mobasuba eAĩ, mobĩtago omo boya bwʼomũyalĩ.

²⁵ Nʼabosĩ abahola ekiro ekyo, abalume nʼabakalĩ, babya elfu ĩkũmĩ nʼĩbĩrĩ, ba bandu bosĩ bʼeAĩ.

²⁶ Kusangwa Yosũa mwatayĩsũbya kwʼebyala biwe, ebyo asuka mwʼerĩtũmo, erĩhĩka aho ahereraya esyondũlanĩ syosĩ syʼeAĩ syo ndeke.

²⁷ Ebihangulo bisa nʼeminyego yʼomũyĩ oyo, Ĩsraelĩ mwayĩmĩrya eminyego yomo, ngʼekĩnywa kyʼOmwami Mukulu ekyo ahana Yosũa.

²⁸ Ko Yosũa ahĩsaya eAĩ yʼatya, mwayirago mo kilundo kya kera na kera, kyʼekĩma, erĩhĩka mũnabwĩre.

²⁹ Kandi mwahanika omwami wʼeAĩ oko muti erĩhĩka okwʼĩgolo-golo; neryo okwʼirenga lyʼeryuba Yosũa mwahana ati bakĩmaye ekĩnda kyʼoko muti, mobagusakyo omo lũkyo lʼoko mũyĩ, kandi mobahĩraho ekilundo kinene kyʼamabwe, kineho erĩhĩka mũnabwĩre.

³⁰ Neryo Yosũa mwahĩmbĩra Omwami Mukulu Nyamuhanga wa Ĩsraelĩ ekiherero omo kitwa kyʼeEbalĩ,

³¹ ngoko Musa omugombe wʼOmwami Mukulu ahana abana ba Ĩsraelĩ, ngoko kĩsakĩre omo kitabu kyʼebihano bya Musa, ekiherero kyʼamabwe awatabatsĩre, isihali mundu oyo wakolaya kwʼekyuma; kandi mobaherera kukyo kwʼamahere wʼerĩokererya oko Mwami Mukulu, nʼerihongerako amahere wʼobuholo.

³² Kandi mwasaka oko mabwe ayo ekyegerero kyʼemigambo ya Musa, eyo asaka, embere wʼabana ba Ĩsraelĩ.

³³ NʼAbaĩsraelĩ bosĩ, nʼabakulu babo, nʼabasondolĩ babo, nʼabatswerĩ babo, haguma nʼomubunga, nʼembutirwa yʼeka, mobahangana oko luhande olũ lwʼerĩsandũko, nʼoko luhande lulya embere wʼabahererĩ Abalawĩ, abaheka erĩsandũko lyʼendagano yʼOmwami Mukulu oluhande lwa kubo embere wʼekitwa kyʼeGerezĩmũ, nʼoluhande lwa kubo embere wʼekitwa kyʼeEbalĩ, ngoko Musa omugombe wʼOmwami Mukulu ahana erĩmbere, batsumule abandu ba Ĩsraelĩ.

³⁴ Kandi enyũma wʼaho mwasema ebĩnywa ebyosĩ byʼemigambo eritsumula nʼeritakira, ngʼebyosĩ ebĩsakĩre omo kitabu kyʼemigambo.

³⁵ Sihabya ekĩnywa nʼekiguma omo byosĩ ebyo Musa ahana ekyo Yosũa atasoma embere wʼerĩhĩndana lyʼAbaĩsraelĩ, haguma nʼabakalĩ, nʼabana, nʼababunga ababya bĩkere omo katĩkatĩ kabo.