Yosũa 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Abaĩsraelĩ bakakĩndĩrawa eAĩ, nʼerĩhalya lya Akana

¹ Nĩkwa abana ba Ĩsraelĩ mobahalya omo bindu ebĩtakĩrwe; kusangwa Akana, mugala wa Karmĩ, mugala wa Zabodĩ, mugala wa Zera, wʼekihanda kya Yũda, mwĩmya oko bindu ebĩtakĩrwe; nʼerihitana lyʼOmwami Mukulu molyaka oko bana ba Ĩsraelĩ.

² Kandi Yosũa mwatuma bandu eAĩ bakalũa eYerĩko, omũyĩ owali hakũhĩ nʼeBetĩ-avenĩ, oko luhande lwʼendata lwʼeBetelĩ, mwabwirabo ati, Muhetukireho mulinge ekihugo. Nʼabandu abo mobahetuka mobalinga eAĩ.

³ Kandi mobasuba uku Yosũa, mobamubwira bati, Abandu bosĩ sibayeyo; abandu elfu ĩbĩrĩ kutse ĩsatu bahetukireyo baswĩraye eAĩ; sũlũhaye abandu bosĩ eriyayo; kusangwa iri bake.

⁴ Neryo mobahetukirayo abandu nga elfu ĩsatu; nabo mobasaga embere syʼabandu bʼeAĩ.

⁵ Nʼabandu bʼeAĩ mobĩta kubo nga bandu makũmĩ asatu na ndatu; mobahigabo embere syʼolũkyo erĩhĩka eSebarĩmũ, mobĩtĩrabo oko bwandagala; nʼemitima yʼabandu moyasendekerera, moyabya ngʼamagetsi.

⁶ Na Yosũa mwasatangya esyongimba siwe, mwatũlama ahisi oko bũsũ buwe embere wʼerĩsandũko lyʼOmwami Mukulu erĩhĩka omwʼĩgolo-golo, iyenʼabakulu ba Ĩsraelĩ; mobahĩra omukunga omo mitwe yabo.

⁷ Neryo Yosũa mwabũga ati, Ĩlolo, uwe Mukama Mwami Mukulu, busana nakĩ wabĩrĩsokya abandu aba eYorodanĩ, erĩtũhĩra omo byala byʼAbaamorĩ erĩtwĩtĩra eyo kwehĩ? Kumbe twayitsemera nʼerĩĩkala, eyisirya wʼeYorodanĩ!

⁸ Uwe Mukama, ko nasyabũgakĩ kwehĩ, Ĩsraelĩ bamalolya emigongo yabo yʼoko nzĩgũ syabo!

⁹ Kusangwa Abakanana nʼesyondũlanĩ syosĩ syʼekihugo basyowago, basyatũtĩmbako, nʼerĩrĩmya erĩna lyetu lyʼomo kihugo; nawe wasyakolakĩ busana nʼerĩna lyawe rĩnene kwehĩ?

¹⁰ Neryo Omwami Mukulu mwabũga na Yosũa ati, Hangana! Busana nakĩ wabĩrĩyĩtũlĩka ahisi kwehĩ?

¹¹ Abaĩsraelĩ babirikola ebibi, babĩrĩhalya oko ndagano yage eyo nahanabo. Babĩrĩmya oko bindu ebĩtakĩrwe, kandi babĩrĩba, babiriteba nibya; kandi babĩrĩhĩrakyo omo bindu byabo.

¹² Kyalekĩre abana ba Ĩsraelĩ ibataluka erihangana embere syʼesyonzĩgũ syabo; bakalolaya emigongo yabo embere syʼesyonzĩgũ syabo, kusangwa babiritakirwa. Sindiendisyabya haguma nenyũ kandi mwamatĩndaherya ebindu ebĩtakĩrwe erĩlũa omo katĩkatĩ kenyũ.

¹³ Hangana, uhigule abandu, ũbũge uti, Muyihigule busana nʼengyakya; kusangwa Omwami Mukulu Nyamuhanga wa Ĩsraelĩ ati, Hali bindu omo katĩkatĩ kenyũ ebĩtakĩrwe, uwe Ĩsraelĩ. Ukataluka erihangana embere wʼesyonzĩgũ syawe, erĩhĩka aho mwasyalũsĩrya ebindu ebĩtakĩrwe omo katĩkatĩ kenyũ.

¹⁴ Omo ngyakya mwasyaletwa hakũhĩ ngʼebihanda byenyũ ko biri; neryo ekihanda ekyo Mwami Mukulu asyĩmya kyasyasa hakũhĩ, ekĩtũnga oko kĩtũnga; nʼekĩtũnga ekyo Mwami Mukulu asyĩmya kyasyasa enyũmba oko yindi; nʼenyũmba eyo Mwami Mukulu asyĩmya yasyasa hakũhĩ nʼomundu oko gundi.

¹⁵ Neryo oyo wasyabanika nʼekindu ekyo kitakĩrwe asyahĩsĩbwa omo muliro, iye nʼebyosĩ awite; kusangwa abĩrĩhalya oko ndagano yʼOmwami Mukulu, kandi kusangwa abirikola obũkĩrũ omo Ĩsraelĩ.

¹⁶ Neryo Yosũa mwahangana omo ngyakya-ngyakya, mwaleta Ĩsraelĩ hakũhĩ ekihanda kihanda, nʼekihanda kya Yũda mokyĩmĩbwa.

¹⁷ Kandi mwasegerya ekĩtũnga kya Yũda kyo hakũhĩ; neryo mwĩmya ekĩtũnga kya Bazerahĩte; kandi mwasegerya ekĩtũnga kya Bazerahĩte kyo hakũhĩ omundu nʼomundu; neryo Zabedĩ mwĩmĩbwa.

¹⁸ Neryo mwasegerya abandu bʼenyũmba yiwe bo hakũhĩ, omundu oko mundu; na Akana, mugala wa Karmĩ, mugala wa Zabedĩ, mugala wa Zera, owʼekihanda kya Yũda mwĩmĩbwa.

¹⁹ Neryo Yosũa mwabũga na Akana ati, Mugala wage, kĩsĩ-kĩsĩ, uhe Omwami Mukulu Nyamuhanga wa Ĩsraelĩ yʼolukengerwa, kandi umubikulire; kandi umbwire ekyo uliakola lino; sũnyĩbĩsĩkyo.

²⁰ Neryo Akana mwasũbĩrya Yosũa ati, Ni kwenene nabirikola ebibi oko Mwami Mukulu, Nyamuhanga wʼeĨsraelĩ, nabirikola nyitya na nyitya.

²¹ Omugulu nalangira erĩkotĩ ryowene lyʼeBabelĩ omo katĩkatĩ kʼebindu nʼesyosekelĩ syʼekĩtsĩpa magana abiri, nʼomuhimba wʼesyamagetsi erĩrĩtoha lyʼesyosekelĩ makũmĩ atanu, monarumwa kubyo, monĩmyabyo, neryo, lebaya, bĩbĩsĩre omo kitaka omo hema yage, nʼebĩtsĩpa omwisi wabyo.

²² Neryo Yosũa mwatuma abakwenda, mobatibita omo hema; neryo lebaya, kyabya kĩbĩsĩre omo hema yiwe, nʼebĩtsĩpa omwisi wakyo.

²³ Neryo mobĩmyabyo omo hema mobabiretera Yosũa, nʼabana bosĩ ba Ĩsraelĩ; mobasanzabyo ahisi embere syʼOmwami Mukulu.

²⁴ Na Yosũa, na Ĩsraelĩ bosĩ haguma naye, mobĩmya Akana mugala wa Zera nʼebĩtsĩpa, nʼerĩkotĩ, nʼomuhimba wʼesyamagetsi, nʼabagala buwe, nʼabali buwe, nʼesyonde siwe, nʼesyombũlĩ siwe, nʼehema yiwe, nʼebyo abya awite ebyosĩ; mobatwalabyo omo musya wʼeAkorĩ.

²⁵ Neryo Yosũa mwabũga, ati, Ko busana nakĩ wabirituletera obũlĩge kwehĩ? Omwami Mukulu akandikuletera obũlĩge mũnabwĩre. NʼAbaĩsraelĩ bosĩ mobamwĩta omo mabwe; kandi mobamũhĩsya omo muliro, babĩmwĩta omo mabwe.

²⁶ Kandi mobasingika endata kwiye ekilundo kinene kyʼamabwe, ekiriho erĩhĩka mũnabwĩre; neryo Omwami Mukulu mwabũnũkala oko bukali bwʼerihitana liwe. Kyaleka erĩna lyʼaho iryahulwa mo Musya wʼobũlĩge, erĩhĩka na mũnabwĩre.