Yosũa 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Abandu ba Ĩsraelĩ bakasoka eYorodanĩ

¹ Neryo Yosũa mwabuka omo ngyakya-ngyakya; mobalũa eSĩtĩmũ, mobahĩka eYorodanĩ, iye nʼabana ba Ĩsraelĩ; kandi mobalalirira embere wʼerisoka.

² Neryo enyũma wʼebiro bisatu, abasondolĩ mobalaba omo kilaliriro;

³ mobahana bandu, bati, Omugulu mukalangira erĩsandũko lyʼendagano yʼOmwami Mukulu Nyamuhanga wenyũ, nʼabahererĩ Abalawĩ bakahekalyo, neryo mwasyahongoka aho muli, imwakwamalyo.

⁴ Nĩkwa hasyabya omwanya omo katĩkatĩ kenyũ nalyo, nga metere magana mwenda nʼamakũmĩ abiri (920); sĩmũsyehĩka hakũhĩ nalyo, imwabana eriminya enzira eyo mutolere erilabamo; kusangwa simwemwalaba omo nzira eno.

⁵ Kandi Yosũa mwabũga nabo ati, Muyihigule, kusangwa omo ngyakya Omwami Mukulu asyakola ebyʼeriswekera omo katĩkatĩ kenyũ.

⁶ Neryo Yosũa mwabũga nʼabahererĩ ati, Muheke erĩsandũko lyʼendagano, musoke embere syʼabandu. Nabo mobaheka erĩsandũko lyʼendagano, mobatangirira embere syʼabandu.

⁷ Kandi Omwami Mukulu mwabũga na Yosũa ati, Mũnabwĩre ngandĩtsũka erĩkũhamya omo meso wʼAbaĩsraelĩ bosĩ, babane eriminya ko nasyabya haguma nawe ngoko nabya na Musa.

⁸ Kandi Wasyahana abahererĩ abakaheka erĩsandũko lyʼendagano, uti, Omugulu mũkahĩka oko mũkeketyo wʼamagetsi wʼeYorodanĩ, mwasyahangana omo Yorodanĩ.

⁹ Kandi Yosũa mwabũga nʼabana ba Ĩsraelĩ ati, Mwase hano, mowe ebĩnywa byʼOmwami Mukulu Nyamuhanga wenyũ.

¹⁰ Neryo Yosũa mwabũga ati, Ũkwʼekĩ mwasyaminya ko Nyamuhanga oyuliho ali omo katĩkatĩ kenyũ, kandi siendisyabula erihigira eyĩhya embere syenyũ Omukanana, nʼOmũhĩtĩ, nʼOmũperezĩ, nʼOmũgĩrgasĩ, nʼOmũamorĩ, nʼOmũyebũsĩ.

¹¹ Lebaya, erĩsandũko lyʼendagano lyʼomukama wʼekihugo kyosĩ likasoka embere syenyũ omo Yorodanĩ.

¹² Neryo lino mwĩmaye abandu ĩkũmĩ nʼababiri omo bihanda bya Ĩsraelĩ, omundu muguma busana nʼobuli kihanda.

¹³ Neryo omugulu obulyatiro bwʼebisando byʼabahererĩ abahekĩre erĩsandũko lyʼOmwami Mukulu Omukama wʼekihugo kyosĩ, byasyahangana omo magetsi wʼeYorodanĩ, amagetsi wʼeYorodanĩ asyatũbwa, amagetsi awakasira endata asyahangana mo kilundo kiguma.

¹⁴ Neryo abandu babere babĩlũa omo mahema wabo, erisoka eYorodanĩ, abahererĩ abahekĩre erĩsandũko lyʼendagano ibane embere syʼabandu.

¹⁵ Nʼomugulu abahekĩre erĩsandũko bahĩka oko Yorodanĩ, nʼebisando byʼabahererĩ abahekĩre erĩsandũko byabitobera omo mbambalyo syʼamagetsi kusangwa eYorodanĩ lukabwaga oko mbambalyo syalo omugulu gosĩ wʼerigesa,

¹⁶ amagetsi awakandagala erĩlũa endata mwahangana, kandi mwayisumba mo kilundo, eAdamũ, omũyĩ owali hakũhĩ nʼeZaretanĩ; nago awandagala erilola ebwanga bwʼengetsi yʼeAraba, ye Ngetsi yʼomũnyũ, mwatwĩka kutsibu. Nʼabandu mobasokera hakũhĩ nʼeYerĩko.

¹⁷ Kandi abahererĩ abahekĩre erĩsandũko lyʼendagano lyʼOmwami Mukulu mobahangana mo ndeke oko kitaka kyũmĩre omo katĩkatĩ kʼeYorodanĩ; nʼAbaĩsraelĩ bosĩ mobasoka oko kitaka kyũmĩre, erĩhĩka aho ekihanda kyosĩ kyamabisokera eYorodanĩ yo ndeke.